Европын Холбоо Шенгений виз мэдүүлэх хугацаа, бүрдүүлэх материалыг танилцууллаа

Европын Комиссын Цагаачлал, дотоод хэргийн ерөнхий газар Шенгений богино хугацааны виз мэдүүлэхэд баримтлах хугацаа, бүрдүүлэх материал, хураамж болон хүсэлт шийдвэрлэх журмын талаарх мэдээллээ шинэчлэн танилцууллаа. Албан ёсны мэдээллээр Шенгений виз нь виз шаардлагатай Европын Холбооны бус улсын иргэдэд 180 хоногийн хугацаанд нийт 90 хүртэл хоног Шенгений бүсэд зорчих боломж олгодог аж. Шенгений визийг нэг удаагийн, олон удаагийн болон нисэх буудлын транзит гэсэн гурван хэлбэрээр олгодог. Нисэх буудлын транзит виз нь Шенгений бүсийн нисэх буудлын олон улсын транзит хэсгээр дамжин өнгөрөхөд зориулагдсан бөгөөд тухайн бүсээс гарч, улсын нутаг дэвсгэрт нэвтрэх эрх олгодоггүй.

Хэзээ, хаана виз мэдүүлэх вэ? Аялагч визийн хүсэлтээ төлөвлөсөн аяллаасаа хамгийн багадаа 15 хоногийн өмнө, харин хамгийн эртдээ зургаан сарын өмнөөс гаргаж болно. Нэг улс руу зорчих бол тухайн улсын консулын газарт хүсэлтээ өгнө. Харин хэд хэдэн Шенгений улсаар аялах тохиолдолд хамгийн олон хоног байрлах улсын консулын газарт хандах шаардлагатай. Улс бүрд ижил хугацаагаар байх бол аяллын маршрутын дагуу хамгийн түрүүнд нэвтрэх улсын консулын газар хүсэлтийг хариуцна. Ерөнхий дүрмээр виз мэдүүлэгч хууль ёсоор оршин суудаг газрыг хариуцсан консулын газарт хүсэлтээ гаргадаг.

Ямар материал бүрдүүлэх вэ? Виз мэдүүлэгчийн паспорт Шенгений бүсээс гарахаар төлөвлөсөн өдрөөс хойш дор хаяж гурван сарын хугацаанд хүчинтэй байх шаардлагатай. Мөн визийн анкет, ICAO стандартын цээж зураг болон шаардлагатай бусад материалыг бүрдүүлнэ. Аяллын үеийн яаралтай эмчилгээ, эмнэлэгт хэвтэх болон эх оронд нь буцаахтай холбоотой зардлыг хамарсан аяллын эрүүл мэндийн даатгал заавал шаардлагатай. Үүнээс гадна аяллын зорилго, байрлах газар, санхүүгийн боломж болон аяллын дараа эх орондоо буцаж ирэхээ нотлох баримт бүрдүүлнэ. Хүсэлт өгөх үед хурууны хээ авах бөгөөд зарим ангиллын виз мэдүүлэгчид уг шаардлагаас чөлөөлөгддөг.

Насанд хүрэгчдийн хураамж 90 евро Шенгений визийн үндсэн хураамж насанд хүрэгчдэд 90 евро, 6-12 насны хүүхдэд 45 евро байна. Армени, Азербайжан, Беларусийн иргэдэд 35 евро, Кабо-Вердегийн иргэдэд 67.50 еврогийн хураамж үйлчилдэг. Визийн үйлчилгээний төвөөр дамжуулан хүсэлт гаргавал нэмэлт үйлчилгээний төлбөр авах боломжтой. Визийн хүсэлтийг ердийн нөхцөлд 15 хоногийн дотор шийдвэрлэдэг. Нэмэлт шалгалт хийх эсвэл материал шаардах шаардлага гарвал хугацааг 45 хүртэл хоног болгон сунгаж болно. Харин ЕХ эсвэл Европын эдийн засгийн бүсийн иргэний гэр бүлийн гишүүн Чөлөөтэй зорчих тухай удирдамжийн шаардлагыг хангасан тохиолдолд хураамжаас чөлөөлөгдөж, хүсэлтийг түргэвчилсэн журмаар шийдвэрлүүлэх боломжтой. Виз олгохоос татгалзсан тохиолдолд консулын байгууллага шалтгааныг бичгээр мэдэгдэж, шийдвэрийг хэрхэн давж заалдах талаар мэдээлэл өгөх ёстой.