Франц даяар 410 мянган хүн жагсаж, мянга орчим хүн баривчлагдлаа

Францад 10 дугаар сарын 24-нд, бямба гарагт амьжиргааны өртөг өсөж, сургуулийн нөхцөл муудаж байгааг эсэргүүцсэн жагсаал улс даяар дахин өрнөж, Дотоод хэргийн яамны тооцоогоор 410 мянга орчим хүн гудамжинд гарлаа. Жагсаалыг зохион байгуулагчдын нэг CGT үйлдвэрчний эвлэл оролцогчдын тоог 800 мянга орчим гэж мэдэгдсэн байна. Энэ тухай BBC, AP агентлаг мэдээллээ.

Дотоод хэргийн сайд Лоран Нуньес улсын хэмжээнд мянга орчим хүн баривчлагдсан бөгөөд энэ тоо нэмэгдэх төлөвтэй гэж мэдэгджээ. Парист 142 хүнийг баривчилсан нь өмнөх бямба гарагийнхаас хоёр дахин бага байна. Өмнөх амралтын өдөр болсон үймээн, дээрмийн үеэр улсын хэмжээнд 2,700 гаруй хүн баривчлагдаж байсан тул засгийн газар энэ удаа 70 мянган цагдаа гаргаж, хэд хэдэн хотод хязгаарлалт тогтоосон юм.

Парисын цагдаагийн тооцоогоор нийслэлд 110 мянган хүн жагссан бол CGT 250 мянга гэж тооцжээ. Өдөртөө ихэнхдээ тайван болсон жагсаалын төгсгөлд Парисын Порт де Венсенн орчимд жагсагчид цагдаа руу юм шидэж, цагдаа нулимс асгаруулагч хий, усан буу хэрэглэсэн байна. Марсельд хогийн сав шатааж, гудамжийг хаасан бол Бордод нүүрээ далдалсан хэсэг бүлэг хүн барилгын хаалт хуулж хаалт босгожээ. Лион, Нант хотод ч цагдаа нулимс асгаруулагч хий хэрэглэсэн байна.

Сайд Нуньесийн хэлснээр Тулуз болон Клермон-Ферран хотод хоёр хүн хүнд гэмтсэн. Мөн Парист жагсаалын арын хэсэгт "хэдэн мянган радикал идэвхтэн, тэр дундаа үймээн дэгдээгчээр тогтоогдсон 500 орчим хүн" цугларсан гэж тэрбээр AFP агентлагт хэлжээ.

Жагсагчид татвар, амьжиргааны өртгийн дарамт, залуучуудын ирээдүйн талаарх санаа зовнилоо илэрхийлж байна. Парист жагсаалд оролцсон 26 настай бүсгүй BBC-д ярихдаа хүмүүс хэтэрхий удаан хугацаанд хүндрэл амссан тул гудамжинд гарсан гэжээ. Үүнтэй зэрэгцэн Брюссель, Ром, Милан хотод ч жагсаал болсон байна.

Эх сурвалж: BBC, AP