Г.Ганбаатар: Оюутолгойн ногдол ашгийг иргэдийн хуримтлалын дансанд бүртгэх ёстой

УИХ дахь Ардчилсан намын бүлэг 2027 оны төсвийн төсөлтэй холбоотой асуудлаар пүрэв гарагт Төрийн ордонд мэдээлэл өгөхдөө Оюутолгойн ногдол ашгийн зарцуулалтыг шүүмжилсэн байна.

УИХ-ын гишүүн Г.Ганбаатарын өгүүлснээр, Оюутолгойн ногдол ашгаас хоёр их наяд орчим төгрөгийг орон нутагт хэрэгжүүлэх дулааны цахилгаан станцууд болон зургаадугаар цахилгаан станцын төсөлд зарцуулах асуудал яригдаж байгаа аж. Тэрбээр уг хувилбар Үндэсний баялгийн сангийн тухай хуультай нийцэхгүй гэж үзэж байгаагаа илэрхийлэв.

"Үндэсний баялгийн сангийн тухай" хуульд уул уурхайн салбарын төрийн өмчийн оролцоотой компанийн төрийн эзэмшлийн хувьцаанд ногдох ногдол ашгийн тодорхой хэсгийг Хуримтлалын санд төвлөрүүлэхээр заасан. Мөн Хуримтлалын сангийн мөнгөн хөрөнгийг Монгол Улсын иргэн бүрийн хуримтлалын нэрийн дансанд бүртгэх зохицуулалттай. Баялгийн сангийн хөрөнгийг хуульд зааснаас бусад зориулалтаар зарцуулахыг хориглодог.

Тиймээс хоёр их наяд төгрөгийг иргэдийн нэрийн дансанд тэнцүү бүртгэвэл нэг хүнд ойролцоогоор 835 мянган төгрөг ногдоно гэж тооцоолж байгаагаа хэллээ. Мөн цахилгаан станцын төслүүдийг хэрэгжүүлэх шаардлагыг үгүйсгээгүй ч санхүүжилтийн эх үүсвэрийг иргэдийн хуримтлалтай холбоотой орлогоос гаргах нь буруу гэсэн байр сууриа илэрхийллээ.

2027 оны төсвийн төсөлд Оюутолгойн ногдол ашгийн орлого болон төрийн өмчит компаниудын нэмэлт ногдол ашгаас шалтгаалан нэгдсэн төсвийн зарлагын дээд хэмжээг нэмэгдүүлэн тооцох зохицуулалт дагалдах хуулийн төсөлд тусгасан байна. Засгийн газар 2027 оны төсвийн тэнцвэржүүлсэн орлогыг 41.3 их наяд, зарлагыг 43.6 их наяд төгрөгөөр төлөвлөсөн.

Мөн тэрбээр Оюутолгойн ногдол ашгийн хэмжээг эцэслэн тогтоохоос өмнө зарцуулалтын талаар ярьж байгаа нь эртэдсэн гэж үзэж буйгаа илэрхийлэв. Тэрбээр компанийн Төлөөлөн удирдах зөвлөл ногдол ашиг хуваарилах шийдвэр гаргасны дараа уг орлогын зарцуулалтыг хэлэлцэх ёстой гэж үзэж байгаа аж.