В.Путин: Сонгуулийн ирц өндөр байгаа нь сонгогчид Украин дахь дайны бодлогыг дэмжиж буйн илрэл

ОХУ-ын Ерөнхийлөгч Владимир Путин есдүгээр сарын 18-20-нд болсон парламентын сонгуулийн өндөр ирцийг Украин дахь дайнд оролцож буй зэвсэгт хүчин болон үндэсний аюулгүй байдлыг бэхжүүлэх бодлогыг иргэд дэмжиж буйн илрэл хэмээн тайлбарлалаа. Сонгуулийн төв хорооны мэдээлснээр санал өгөх эрхтэй иргэдийн 59.3 хувь нь сонгуульд оролцжээ.

Путин сонгуулийн өмнө санал хураалтыг Украинд дөрвөн жил гаруй үргэлжилж буй дайны талаарх олон нийтийн байр суурийг харуулах нэг үзүүлэлт болгон тодорхойлж байсан. Харин сонгуулийн дараа тэрээр өндөр ирцийг улс орны аюулгүй байдлыг бэхжүүлэхэд чиглэсэн эрх баригчдын үйл ажиллагаанд үзүүлсэн дэмжлэг гэж тайлбарласан байна.

Тэрбээр фронтод байгаа цэргүүдэд хандан санал хураалтын дүнг тэдэнд үзүүлж буй дэмжлэгтэй холбон тайлбарлаж, иргэд цэргүүд болон ялалтад итгэж буйг онцолжээ.

“Нэгдсэн Орос” парламентад 355 суудал авах төлөвтэй байна Саналын 95 гаруй хувийг тоолсны дараах дүнгээр эрх баригч “Нэгдсэн Орос” нам нийт саналын 57.83 хувийг авчээ. 2021 оны Төрийн Думын сонгуулиар тус нам 49.8 хувийн санал авч байсан тул намын жагсаалтаар авсан саналын хувь өмнөх сонгуулиас өссөн үзүүлэлт болов.

Мөн урьдчилсан дүнгээр “Нэгдсэн Орос” нам Төрийн Думын 450 суудлын 355-ыг буюу бараг 80 хувийг эзлэхээр байна. Ингэснээр тус нам Үндсэн хуулийн олонх болох 301 суудлын босгыг давж, бусад парламентын хүчний дэмжлэггүйгээр хууль батлах, Үндсэн хуульд өөрчлөлт оруулах үйл явцыг эхлүүлэх хэмжээний олонхоо хадгалах аж.

ОХУ-ын парламентын доод танхимын уг сонгууль нь 2022 онд Украинд бүрэн хэмжээний дайн эхэлснээс хойших анхны Төрийн Думын сонгууль байв. "Reuters" агентлагийн мэдээлснээр Оросын улс төрийн тогтолцоонд дайныг эсэргүүцсэн нэр дэвшигчдийн ихэнх нь сонгуульд оролцох боломжгүй байсан бөгөөд сонгуулийн өрсөлдөөний нөхцөлд шүүмжлэл дагуулсан байна.