Хэйс: Хиймэл оюуны хямралын дараах үед криптовалют ихээхэн ашиг хүртэж магадгүй

Криптовалютын “BitMEX” биржийн гүйцэтгэх захирал асан, крипто хөрөнгө оруулалтын “Maelstrom” компанийн хамтран үүсгэн байгуулагч бөгөөд хөрөнгө оруулалт хариуцсан захирал Артур Хэйс хиймэл оюуны дата төвийн бүтээн байгуулалт хэт тэлж, эцэстээ хүчин чадлын илүүдэл үүсгэнэ гэж үзэж байна. Тэрбээр Сингапурт болсон “Gamma Prime Investing Conference”-ийн үеэр CNBC-ийн асуултад хариулахдаа хүн төрөлхтөн хиймэл оюуны дата төв барихад “хэдэн их наяд ам.доллар үр ашиггүй зарцуулж” байгаа бөгөөд одоогийн бүтээн байгуулалтын үр дүнд тооцоолох хүчин чадал асар их, маш хямд болно гэжээ. Технологийн компаниуд илүү дэвшилтэт хиймэл оюуны загвар хөгжүүлэх, ажиллуулахад шаардлагатай тооцоолох хүчин чадлаа баталгаажуулахын тулд дата төв, чип болон бусад дэд бүтцэд их хэмжээний хөрөнгө оруулалт хийж буй. Харин Хэйс одоогийн өсөлтийг технологийн өмнөх томоохон давалгаануудтай адил хэт бүтээн байгуулалтаар төгсөнө гэж таамаглаж байна. Тэрбээр энэ талаар “Санхүүгийн түүх болон технологийн томоохон нэвтрэлтийг судалбал үргэлж хэрэгцээнээс давуулан бүтээн байгуулсан байдаг” гэдгийг онцолж, “Дараа нь уналтад орж, эцэст нь салбарыг аврах арга хэмжээ авдаг” гэдгийг хэлжээ.

2027-2028 онд эрсдэл илэрч магадгүй Хэйсийн тооцоолсноор одоо баригдаж буй дата төвүүдийн ихэнх нь 2027 оны сүүлээс ашиглалтад орж эхлэх үед зах зээлийн бодит эрэлт хэр хүчтэй байгааг шалгах мөчлөг эхлэхээр байна. Тэрбээр “SpaceX”, “OpenAI”, “Anthropic” зэрэг тооцоолох хүчин чадлын томоохон хэрэглэгчдийг нэрлэж, эдгээр компани одоогоор ашигтай ажиллахгүй байгааг нэмж онцлов. Мөн дата төвүүд ашиглалтад орсны дараа дэд бүтцийн компаниуд урьдчилан тохирсон тооцоолох хүчин чадлын төлбөрөө авах шаардлагатай болно гэж үзэж байна. Харин өөдрөг хувилбараар хиймэл оюуны хэрэглээ ирэх 12 сарын хугацаанд хангалттай хурдтай өсч, салбарын компаниуд ашигтай ажиллах хэмжээнд хүрвэл шинээр бий болж буй хүчин чадлыг зах зээл шингээх боломжтой ажээ.

Хямрал криптовалютын өсөлтийн суурь болох уу? Хэйсийн таамаглалын хоёр дахь хэсэг нь боломжит уналтын дараа эрх баригчид болон Төв банкуудын авч болох арга хэмжээтэй холбоотой банйа. Тодруулбал, түүний үзэж буйгаар технологийн хэтэдсэн хөрөнгө оруулалтын дараа томоохон уналт үүсвэл санхүүгийн системийг тогтворжуулах арга хэмжээ зах зээл дэх мөнгөний нийлүүлэлт, хөрвөх чадварыг нэмэгдүүлж болзошгүй аж. Тэрбээр 2008 оны дэлхийн санхүүгийн хямралын дараах үйл явдлыг жишээ болгон дурдав. Хэйс энэ талаар “Аз болоход илүүдэл хөрвөх чадварыг шингээх биткойн болон бусад криптовалют бий” гэдгийг онцолж, “Зах зээлийг аврах үед аль хөрөнгө хамгийн сайн гүйцэтгэл үзүүлэхийг бид мэднэ, зүгээр л тэвчээртэй байх хэрэгтэй” хэмээжээ.