Талархлын баярын үеэр АНУ-д онгоцны тийзийн үнэ 30 гаруй хувиар өсчээ

АНУ-д намрын аяллын улирал үргэлжилж буй энэ үед дотоодын нислэгийн тийзийн үнэ, чиглэл, аяллын хугацаанаас шалтгаалан ялгаатай байна. Ялангуяа Талархлын баярын үеэр эрэлт нэмэгдэж, нислэгийн үнэ жилийн өмнөхөөс огцом өссөнийг “Hopper” компани онцолжээ.

“Hopper”-ийн “сайн санал” ангиллын мэдээллээр Талархлын баярын үеийн тийзийн үнэ өнгөрсөн оныхоос 30 гаруй хувиар өндөр байна. Иймээс намар аялах америкчуудын хувьд нисэх өдрөө зөв сонгох нь зардлаа хэмнэхэд чухал нөлөөлөхөөр байна.

Богино нислэг бүхэн хямд биш

Арваннэгдүгээр сарын хамгийн боломжийн үнэтэй чиглэлүүдийн дунд Атланта болон АНУ-ын Дундад баруун, зүүн өмнөд бүсийн хотуудыг холбосон маршрутууд багтана. Хавайн арлууд хоорондын богино нислэг болон Флорида муж доторх зарим чиглэл харьцангуй хямд ангилалд орсон байна.

Гэхдээ нислэг ойр бол заавал хямд тийзээр аялна гэсэн үг биш юм. Нантакет, Мартасын Виньярдаас Нью-Йорк болон Вашингтон Ди-Си рүү нисэх чиглэлүүд өндөр үнэтэй маршрутуудын тоонд багтжээ. Нислэгийн үнэд зайнаас гадна тухайн чиглэлийн эрэлт, улирлын онцлог нөлөөлж байгааг уг зөрүү харуулав.

Аляскаас зүүн эрэг рүү нисэхэд хамгийн өндөр зардалтай

АНУ-ын алслагдсан бүсээс томоохон хотууд руу зорчих үнэ өндөр хэвээр байна. “Hopper”-ийн мэдээллээр Аляскаас зүүн эрэг рүү чиглэсэн нислэгүүд хамгийн өндөр өртөгтэй маршрутуудын тоонд оржээ.

"Аляска" онгоцны түлш болон зарим боловсруулсан бүтээгдэхүүнийхээ ихээхэн хэсгийг гаднаас авдаг. Алслагдсан байршил, түлш болон бусад нийлүүлэлтийн нөхцөлөөс шалтгаалан улирлын хямдралтай үед ч тус мужаас үйлдэх зарим нислэгийн үнэ өндөр байдгаараа онцлог юм.

Баярын өдрийг "тэвчвэл" хямд тийз олох боломж нэмэгдэнэ

“Hopper” хамгийн хямд нислэгүүдийг тооцохдоо Талархлын баярын аяллын хугацааг тусад нь авч үзжээ. Зорчигчдын эрэлт хамгийн их төвлөрдөг баярын өдрүүдийг хасвал Атланта, Флорида, Хавай болон бүс нутгийн зарим чиглэлд харьцангуй боломжийн тийз авах боломжтой.

Одоогийн үнийн зураглалаар Талархлын баярын үе намрын хамгийн өндөр зардалтай аяллын цаг тул өдрөө уян хатан сонгох нь зорчигчдод зардлаа бууруулах боломжийг олгоно.