2027 оны аяллын таван тренд: Есөн шид нь бүрдсэн биш, харин өөрт тохирсон аялал

2027 онд аялагчдын хувьд амралтын чанарыг аль болох олон газар үзсэн эсэхээр бус, аяллаас юу олж авснаар хэмжих хандлага эрчээ авах төлөвтэй байна. Зочлох үйлчилгээний “Hilton” компанийн 2027 оны аяллын трендийн тайланд аялагчид “төгс амралт”-аас татгалзаж, илүү уян хатан, өөрт тохирсон, бие болон сэтгэлээ сэргээх туршлагыг эрэлхийлж байгааг онцолжээ. Тус тайланг 14 улсын 14,000 гаруй аялагчийн дунд хийсэн судалгаанд үндэслэсэн бөгөөд ирэх оны аяллын зах зээлд нөлөөлөх таван гол чиг хандлагыг тодорхойлсон байна.

Яг ч ганцаараа биш, “хэсэгчлэн ганцаарчилсан” аялал Ганцаарчилсан аяллын хэв маяг өөрчлөгдөж байна. Тодруулбал, аялагчид бүх амралтаа ганцаараа өнгөрүүлэхийн оронд гэр бүл, найз нөхөдтэй хийж буй аяллынхаа тодорхой хэсгийг өөртөө зориулж эхэлжээ. Судалгаанд оролцогчдын 41 хувь нь ирэх нэг жилийн хугацаанд ганцаарчилсан аялал хийхээр төлөвлөж буйгаа хэлсэн байна. Харин “solo-ish” буюу хэсэгчлэн ганцаарчилсан аялал нь бусдаас тусгаарлагдахаас илүү өөрийн хүссэн хуваариар аялах эрх чөлөөг илэрхийлдэг. Тухайлбал, найзуудтайгаа уулзахаас нэг өдрийн өмнө очих эсвэл ажлын томилолтоо дуусгасныхаа дараа тус газраа хэд хоног үлдэж хоттой бие даан танилцах зэрэг хэлбэрээр аялагчид зөвхөн өөрт зориулсан хугацааг бий болгож байна.

Хиймэл оюунаас илүү зочид буудлын ажилтанд итгэж байна Үүний зэрэгцээ хиймэл оюуны хэрэгслүүд аяллын маршрут гаргах, мэдээлэл хайх түгээмэл суваг болж байгаа ч аялагчид тухайн газрыг сайн мэддэг хүний зөвлөгөөг илүү үнэ цэнтэй гэж үзэж буй. “Hilton”-ийн судалгаагаар аялагчдын 70 хувь нь аяллаа төлөвлөхдөө зочид буудлын ажилтнуудын зөвлөгөөнд итгэдэг бол хиймэл оюуны хэрэгсэлд итгэх хэрэглэгчид 63 хувьтай байв. Ялангуяа жуулчдын тэр бүр мэддэггүй орон нутгийн туршлага, газрыг олоход хиймэл оюунд итгэдэг аялагчдын хувь ердөө 18 байна. Мөн аялагчид “ойролцоох шилдэг ресторан”-ыг хайхаас гадна нутгийн хүмүүс хаана хооллодог, аль дүүргээр аялах нь сонирхолтой, ямар жуулчны газрыг алгасч болох талаар хүний зөвлөгөөг эрэлхийлэх болжээ.

Аялагчид шинэ зүйл сурахыг эрмэлзэж байна Мөн аяллын зорилго зөвхөн амрахаас илүүтэй шинэ зүйл сурч, өөрийгөө хөгжүүлэх болж байна. Тодруулбал, судалгаанд оролцогчдын 42 хувь нь аяллын үеэр шинэ сонирхол, хоббитой болж байсан гэж хариулжээ. Шинэ хэл сурах, хоол хийх сургалтад суух, ваар урлах, шинэ спорт турших эсвэл тухайн орны соёлын хөтөлбөрт хамрагдах зэрэг туршлага үүнд багтана. “Hilton” уг чиг хандлагыг “Growth Getaway” хэмээн нэрлэсэн бөгөөд аялагчид дурсгалын зүйл худалдаж авахаас илүү гэртээ буцсаныхаа дараа үргэлжлүүлэн хөгжүүлэх боломжтой чадвар, дадал эсвэл шинэ сонирхлыг аяллаасаа авч үлдэх хүсэлтэй буйг онцолжээ.

Эрүүл мэнд, сайн сайхан төвтэй аялал зөвхөн спа байхаа больж байна Түүнчлэн эрүүл мэнд, бие сэтгэлээ сэргээх зорилготой аяллын ойлголт илүү хүрээтэй болж буй. Аялагчид уламжлалт спа амралтаас гадна байгаль, идэвхтэй хөдөлгөөн, технологи, тайвшрал болон хүмүүстэй харилцах туршлагыг хослуулсан аяллыг сонирхох болжээ. Судалгаанд оролцогчдын 65 хувь нь биеэ тайвшруулж, мэдрэлийн системээ амраахад тустай бүтээгдэхүүн, үйлчилгээг "зориудаар эрэлхийлдэг" гэж хариулсан бол 76 хувь нь аялалаар явах нь гэртээ байх үедээ тэр бүр авч чаддаггүй сэтгэлзүй болон биеэрэ сэргэх мэдрэмжээ авдаг гэв. Түүнчлэн аялагчдын 79 хувь нь бие болон сэтгэлзүйгээ сэргээхэд цэвэр агаар, байгальд аялах нь чухал гэж үзсэн байна. Мөн усан сан, саун, хүйтэн усанд орох, усан эмчилгээ болон халуун рашаантай холбоотой үйлчилгээний сонирхол нэмэгдэж буйг тайланд дурджээ.

Богино боловч олон удаагийн аялал Өөр нэг сонирхолтой зүйл нь жилдээ нэг удаа урт хугацаагаар амрах уламжлалт хэв маяг богино, олон давтамжтай аялалтай зэрэгцэх төлөвтэй байна. Тодруулбал, судалгаанд оролцогчдын 21 хувь нь 2027 онд аяллын төлөвлөгөөндөө богино хугацааны аяллыг олноор нэмэхээр төлөвлөжээ. Ийм аяллыг ажил, гэр бүлийн хуваарьтай зохицуулахад хялбар бөгөөд богино хугацаанд төлөвлөж, жилийн турш олон газар үзэх боломж олгодог аж. Богино хугацааны аяллын дотор ч хэрэглэгчдийн сонголт ялгаатай байна. Тухайлбал, зарим аялагч концерт, ресторан, спортын тэмцээн эсвэл явган аялал зэрэг нэг гол туршлагад зориулж бүх аяллаа төлөвлөдөг бол нөгөө хэсэг нь хэдхэн хоногт аль болох олон зүйл хийхийг зорьдог. Судалгаагаар аялагчдын 51 хувь нь нэг тодорхой туршлагыг тойруулан аяллаа төлөвлөх дуртай гэж хариулсан бол 67 хувь нь богино амралтын хугацаандаа хэд хэдэн үйл ажиллагааг багтаахыг илүүд үзжээ.