Энди Халдейн: Засгийн газар татвараа нэмдэг биш, зардлаа танадаг байх ёстой

Их Британийн Сангийн яамнаас мэдээлснээр тус улсын намрын төсвийн төслийг аравдугаар сарын 28-нд танилцуулахаар байгаа юм. Гэвч үүнээс өмнө Их Британийн Засгийн газар төсвөө зардлаа хязгаарлаж, бизнесүүдэд чиглэсэн татварын нэмэгдлээс зайлсхийх шаардлагатай гэж Английн Төв банкны ахлах эдийн засагч асан Энди Халдейн CNBC-д өгсөн ярилцлагадаа онцоллоо.

Английн Төв банкны Мөнгөний бодлогын хороонд 2021 оны зургадугаар сар хүртэл ажилласан Халдейн Их Британийн төсвийн өнөөгийн нөхцөл байдлыг “нимгэн мөсөн дээр алхаж” буйтай зүйрлэв.

Халдейны үзэж буйгаар ийм эрсдэлийг бууруулах хамгийн үр дүнтэй арга нь Засгийн газар зардлаа танахад бэлэн гэдгээ санхүүгийн зах зээлд харуулах юм.

Бондын зах зээл төсвийн бодлогыг анхаарч байна

Их Британийн Засгийн газрын бондын өгөөж сүүлийн жилүүдэд тогтвортой өссөнөөр тус улсын өрийн санхүүжилтийн зардал нэмэгдсэн. Халдейны онцолсноор олон улсын бондын зах зээл Засгийн газруудад "таагүй орчин" бүрдүүлж байгаа ч үр нөлөө нь Их Британи бусад орноос илүү хүнд тусч байгаа юм.

Түүний тайлбарласнаар Их Британийн инфляц харьцангуй өндөр хэвээр буйн зэрэгцээ эдийн засгийн өсөлт сул байгаа бөгөөд улсын төсвийг тэнцвэржүүлэх асуудал удаан хугацаанд үргэлжилж байна.

Ерөнхий сайд Энди Бёрнхэм долдугаар сарын 20-нд албан тушаалаа хүлээн авсан бөгөөд Жон Хили мөн өдөр Сангийн сайдаар томилогджээ. Энэ удаагийн намрын төсөв нь Бёрнхэмийн Засгийн газрын анхны төсөв болох бөгөөд Хили төсвийн сахилга батыг хадгалж, тодорхой бус нөхцөлд ашиглах санхүүгийн нөөц бүрдүүлэх зорилт тавиад байна.

Засгийн газар төсвийн бодлогоо чангатгахын зэрэгцээ амьжиргааны зардлыг бууруулах, эрх мэдлийг орон нутагт шилжүүлэх, батлан хамгаалахын зардлыг нэмэгдүүлэх зэрэг зорилтыг зэрэг хэрэгжүүлэхээр төлөвлөж байгаа. Сангийн сайд Хили ирэх төсөв Засгийн газрын төсвийн сахилга батыг сайтар хангаж, бизнес болон өрхүүдэд төлөвлөлт хийх тогтвортой орчин бүрдүүлэх ёстой гэж мэдэгдсэн.

Татварыг нэмэгдүүлэх нь өсөлтийг сулруулах эрсдэлтэй гэж үзлээ

Засгийн газар одоогоор нэмэлт зардлаа хэрхэн санхүүжүүлэхээ бүрэн танилцуулаагүй байгаа бөгөөд Бёрнхэм татвар нэмэх боломжийг үгүйсгээгүй юм. Мөн Их Британийн хэвлэлүүд арилжааны банкуудын гэнэтийн ашгаас нэмэлт татвар авах хувилбарыг хэлэлцэж магадгүй талаар мэдээлж буй.

Гэвч Халдейны үзэж буйгаар шинэ Засгийн газар төсвөө бүрдүүлэх үүднээс бизнесүүдэд татварын хэт үүрүүлэхээс зайлсхийх шаардлагатай байна. Учир нь түүний үзэж буйгаар эдийн засгийн өсөлтийн гол хөдөлгөгч хүч нь хувийн хэвшил боловч компаниудад хэт өндөр татварын ачаа үүрүүлсэн нь байж боломгүй шийдвэр ажээ.

Халдейн CNBC-д өгсөн ярилцлагадаа энэ талаар “Хувийн хэвшилд татварын ачаалал хязгаартаа хүрсэн" гэдгийг онцолж, "Мөн бид хэт их зээл авч байгаа учраас ийм замналаар бодлогоо үргэлжлүүлэх нь өсөлтийн зам биш” хэмээв.