АНУ-ын худалдааны алдагдал $105.6 тэрбумд хүрч, 2025 оны гуравдугаар сараас хойших дээд түвшинд хүрлээ

АНУ-ын Худалдааны яамнаас мягмар гарагт мэдээлснээр, тус улсын худалдааны алдагдал наймдугаар сард 105.6 тэрбум ам.долларт хүрч, өмнөх сараас 13.7 хувиар өслөө. Энэхүү тоо нь шинжээчдийн 102 тэрбум ам.долларын хүлээлтээс давсан үзүүлэлт төдийгүй 2025 оны гуравдугаар сараас хойших дээд түвшинд болж буй. Тухайн үед АНУ-ын Ерөнхийлөгч Дональд Трамп худалдааны түнш орнуудад харилцан тариф тогтоох бодлогоо зарлахаас өмнө импорт огцом нэмэгдэж байсан юм.

Харин импортын хэмжээ сарын дүнгээр 4.3 хувиар нэмэгджээ. Уг өсөлтөд АНУ-д эрчимжиж буй хиймэл оюуны дэд бүтцийн бүтээн байгуулалттай холбоотой бараа бүтээгдэхүүний нийлүүлэлт, мөн импортын тарифын өөрчлөлт нөлөөлсөн гэж Худалдааны яамны мэдээлэлд дурджээ. Гэхдээ сарын үзүүлэлт огцом нэмэгдсэн ч оны эхнээс тооцсон худалдааны алдагдал 138.2 тэрбум ам.доллар болж, өмнөх оны мөн үеэс бараг 20 хувиар буурсан байна.

“Nationwide”-ийн санхүүгийн эдийн засагч Орен Клачкин импортын барааны үнийн өсөлт худалдааны өөрчлөлтийг бодит хэмжээнээс өндөр харагдуулж байгаа ч цэвэр экспорт гуравдугаар улирлын дотоодын нийт бүтээгдэхүүний өсөлтийг сааруулах төлөвтэй байгааг онцоллоо.

Гэхдээ тэрбээр импортын өсөлтийг эдийн засгийн сулрал гэхээс илүү дотоодын эрэлт өндөр байгаагийн илрэл гэж үзэж буйгаа нэмж хэлэв. Импорт нэмэгдэх нь ДНБ-ий тооцоонд хасах нөлөө үзүүлдэг ч өсөлт нь хэрэглээ болон дотоодын эрэлт нэмэгдсэнтэй холбоотой бол эдийн засгийн бусад хэсгийн өсөлтөөр нөхөгдөх боломжтой.

Худалдааны тайлан гарсны дараа хөрөнгө оруулалтын “Goldman Sachs” банк АНУ-ын гуравдугаар улирлын эдийн засгийн өсөлтийн төлөвөө өмнөх хувилбараас 0.3 нэгж хувиар бууруулан, 3.1 хувь болголоо.

Мөн Атлантагийн Холбооны нөөцийн банкны “GDPNow” загвар гуравдугаар улирлын өсөлтийн тооцоогоо өмнөхөөс 0.1 нэгж хувиар бууруулж, 3.7 хувьд хүргэжээ.