Алт "зүсээ хувиргав": Бондын өгөөжөөс хамаарах уламжлалт хамаарлаа эвдэж эхэллээ

Алтны ханш 2022 оноос хойш бондын өгөөж өссөн үед ч зэрэгцэн чангарсан нь хөрөнгө оруулагчдын аюулгүй активын талаарх уламжлалт ойлголт өөрчлөгдөж эхэлсний дохио гэж хөрөнгө оруулалтын “Sprott” компанийн удирдах түнш Жон Хэтавэй үзэж байна.

Уламжлалт байдлаар бондын өгөөж өсөхөд хүүгээс орлого хүртдэггүй алт авах сонирхлыг бууруулах хүчин зүйлд тооцогддог. Харин сүүлийн жилүүдийн хөдөлгөөн уг хамаарлыг сулруулж, алт зөвхөн зах зээлийн эрсдэлээс хамгаалах хэрэгсэл бус, мөнгөний өөр хувилбарын шинжтэй болж байгааг Хэтавэй онцолжээ.

Тэрбээр хөрөнгө оруулалтын “Incrementum” компанийн түнш Рональд-Питер Штёферлегийн хамт есдүгээр сарын 22-нд болсон “Precious Metals Summit”-ийн үеэр алтны зах зээлд гарч буй бүтцийн өөрчлөлтийн талаар байр сууриа илэрхийлсэн байна.

Алтны өгөөж сэргэж байна

Шинжээчдийн үзэж буйгаар алт Засгийн газрын бондтой өрсөлдөхүйц хөрөнгийн байр сууриа бэхжүүлэхийн зэрэгцээ ам.долларын эсрэг мөнгөний өөр хувилбар болох шинж чанараа тэлж байна.

Тогтмол орлоготой хөрөнгийг найдвартай “аюулгүй хоргодох байр” гэж үздэг уламжлалт ойлголт суларч байгаа нь уг өөрчлөлтийн нэг шалтгаан гэж Хэтавэй тайлбарлав.

Үүний зэрэгцээ алтны зах зээл дэх институцийн болон жижиглэнгийн хөрөнгө оруулагчдын оролцоо харьцангуй бага хэвээр байгаа нь цаашид шинэ хөрөнгө оруулалт орох боломж байгааг харуулсан гэж тэрбээр үзжээ. Төв банкууд алтны худалдан авалтаа тогтвортой үргэлжлүүлбэл алт руу чиглэх хөрөнгийн урсгал нэмэгдэх нөхцөл бүрдэх юм.

Алт олборлогчдын үнэлгээ харьцангуй доогуур байна

Шинжээчид алт олборлогч компаниудын үйл ажиллагааны тэнцвэр, ашигт ажиллагаа, мөнгөн урсгал арван жилийн өмнөхөөс сайжирсан ч зах зээлийн үнэлгээ нь харьцангуй доогуур хэвээр байгааг онцолжээ. Алтанд чиглэх сонирхол нэмэгдвэл хөрөнгийн урсгал олборлогч компаниудын хувьцаанд ч шилжих боломжтой гэж мэргэжилтнүүд үзэж байна.

Гэхдээ салбарын хөрөнгө оруулагчидтай харилцах арга барилаа өөрчлөх шаардлагатайг Штёферле тэмдэглэв. Түүний үзэж буйгаар хямрал, инфляц, санхүүгийн сүйрэлд төвлөрсөн өгүүлэмжээс илүүтэй компаниудын санхүүгийн сахилга бат, мөнгөн урсгал, үйл ажиллагааны үр ашгийг тодорхой харуулах нь хөрөнгө оруулагчдын хүрээг тэлэхэд чухал аж.