Алтны экспортын орлого $805 саяд хүрлээ: Дэлхийн төв банкуудын алтны нөөц ирэх 12 сард ч нэмэгдэнэ

Оны эхний найман сарын байдлаар Монгол Улсын алтны экспортын орлого 805 сая ам.долларт хүрч, өмнөх оны мөн үеэс 255.6 сая ам.доллароор нэмэгдлээ. Экспортын биет хэмжээ өсөөгүй ч дэлхийн зах зээл дэх алтны өндөр ханш Монголын экспортын орлогыг тэлж байна.

Үндэсний статистикийн хорооны мэдээллээр Монгол Улсын нийт экспорт эхний найман сард 14.4 тэрбум ам.долларт хүрч, өмнөх оны мөн үеэс 57.2 хувиар өсчээ. Нийт экспортын өсөлтөд зэсийн хүдэр, баяжмал болон нүүрсний дараа боловсруулаагүй буюу хагас боловсруулсан алт чухал нөлөө үзүүлж, алтнаас олсон орлого жилийн өмнөхөөс 255.6 сая ам.доллароор нэмэгдсэн байна.

Биет хэмжээ буурсан ч орлого нэмэгдэв

Монгол Улс өнгөрсөн оны эхний найман сард 5.4 тонн алт экспортолж байсан бол энэ оны мөн үед 5.3 тонн болж, 0.1 тонноор буурчээ.

Өөрөөр хэлбэл, экспортолсон алтны хэмжээ бараг өөрчлөгдөөгүй байхад валютын орлого 250 гаруй сая ам.доллароор өссөн нь нэгж үнэлгээ мэдэгдэхүйц нэмэгдсэнийг харуулж байна.

Монголын экспортын орлогод дэмжлэг болж буй уг нөхцөл олон улсын зах зээл дэх алтны өндөр ханштай давхцав. Ашигт малтмал, газрын тосны газрын мэдээллээр наймдугаар сард дэлхийн зах зээл дэх алтны сарын дундаж ханш унц тутамдаа 4,402 ам.доллар байжээ.

Алт $4,000-ын босго давлаа

Олон улсын зах зээлд алтны ханш энэ долоо хоногт бага зэрэг суларсан ч өндөр түвшинд хадгалагдаж байна. Мягмар гарагийн Азийн арилжааны эхэнд спот алтны ханш 0.3 хувиар буурч, унц тутамдаа 4,128.69 ам.доллар болсон бол АНУ-ын алтны фьючерс 4,156 ам.доллар орчимд арилжаалагдав. Ам.долларын ханш чангарч, АНУ-ын Засгийн газрын бондын өгөөж өссөн нь алтны ханшид нөлөөлжээ.

Үүнээс нэг өдрийн өмнө спот алт унц тутамдаа 4,159.89 ам.долларт хүрсэн. АНУ-ын Засгийн газрын өрийн хэмжээ нэмэгдэж буйтай холбоотой болгоомжлол, Холбооны нөөцийн банк аравдугаар сард бодлогын хүүгээ өсгөх хүлээлт суларсан нь алтны эрэлтийг дэмжсэн байна.

Алтны ханш оны эхний хагаст огцом хэлбэлзсэн. Дэлхийн алтны зөвлөлийн мэдээллээр ханш өнгөрсөн нэгдүгээр сард унц тутамдаа 5,500 ам.долларыг давж түүхэн дээд түвшинд хүрсэн ч зургаадугаар сарын сүүлчээр 4,000 ам.доллараас доошилсон юм.

Төв банкууд болон хөрөнгө оруулагчдын эрэлт ханшийг дэмжиж байна

Алтны ханш өндөр түвшинд хадгалагдахад төв банкуудын худалдан авалт болон хөрөнгө оруулалтын эрэлт голлох нөлөө үзүүлж байна. Дэлхийн алтны зөвлөлийн судалгаанд хамрагдсан төв банкны нөөцийн менежерүүдийн 89 хувь нь дэлхийн төв банкуудын алтны нөөц ирэх 12 сард ч нэмэгдэнэ гэж үзжээ. Мөн 45 хувь нь өөрсдийн байгууллага алтны нөөцөө өсгөхөөр төлөвлөж байгааг илэрхийлсэн байна.

Хөрөнгө оруулагчдын эрэлт ч эрчимжиж, өнгөрсөн наймдугаар сард алтанд суурилсан биржээр арилжаалагддаг сангууд буюу ETF-д дэлхий даяар 18 тэрбум ам.долларын хөрөнгө шинээр орж, нийт эзэмшиж буй алт нь түүхэн дээд хэмжээнд буюу 4,189 тоннд хүрсэн байна.

Ийнхүү алтны экспортын биет хэмжээ өсөөгүй ч дэлхийн зах зээлийн өндөр ханш Монгол Улсын валютын орлогыг нэмэгдүүлж байна.