Уул уурхайн ТОП-50 компанийн үнэлгээ есдүгээр сард $264 тэрбумаар буурчээ

Дэлхийн хамгийн өндөр үнэлгээтэй уул уурхайн компаниудын хувьд есдүгээр сар огцом уналттай өндөрлөж, топ-50 компанийн зах зээлийн нийт үнэлгээ нэг сарын дотор 264 тэрбум ам.доллароор буурлаа.

Ингэснээр жагсаалтад багтсан компаниудын нийт үнэлгээ сарын эцэст 2.26 их наяд ам.доллар болж, жагсаалтын түүхэн дэх хоёр дахь том сарын уналт бүртгэгдэв. Хөрөнгө оруулагчид эрсдэлтэй хөрөнгөөс гарах хандлага нэмэгдсэнтэй зэрэгцэн үнэт металлын ханш огцом савласан нь уул уурхайн хувьцааны уналтыг эрчимжүүлжээ.

Хүүгийн өсөлт уул уурхайн хувьцаанд нөлөөлжээ

АНУ-ын Холбооны нөөцийн банк есдүгээр сарын 16-нд 2023 оноос хойш анх удаа бодлогын хүүгээ өсгөсөн нь дэлхийн санхүүгийн зах зээлд томоохон өөрчлөлт дагуулав.

Хүүгийн шийдвэрийн дараа бондын борлуулалт эрчимжиж, өгөөж нь 2008 оноос хойших дээд түвшинд хүрсэн бол ам.долларын ханш чангарчээ. Өндөр хүү болон ам.долларын өсөлт нь хүүгийн өөрчлөлтөд мэдрэмтгий хөрөнгийн эрэлтийг сулруулж, түүхий эд болон уул уурхайн хувьцаанаас хөрөнгө оруулагчид гарахад нөлөөлөв.

Үнэт металлын зах зээлд хөдөлгөөн илүү хүчтэй байлаа. Нью-Йоркийн арилжаагаар алтны фьючерсийн ханш наймдугаар сарын эцэст унц тутамдаа 4,441 ам.доллар байсан бол есдүгээр сарын эцэст 4,158 ам.доллар болж буурчээ. Мөнгөний ханш мөн сарын дүнгээр есөн хувиар суларч, платины бүлгийн металлууд ч уналттай хаагдсан байна.

Алт олборлогчид хамгийн их үнэлгээ алдав

Алт олборлогч компаниудын зах зээлийн үнэлгээ есдүгээр сард нийт 12.7 хувиар буурч, наймдугаар сард бий болсон 79 тэрбум ам.долларын өсөлтөө бүрэн алдлаа.

Алт олборлогч “AngloGold Ashanti”-ийн хувьцааны ханш сарын дүнгээр 16.4 хувиар буурснаар зах зээлийн үнэлгээ нь 9.4 тэрбум ам.доллароор агшив. “Gold Fields”-ийн хувьцааны ханш 21 хувиар суларч, компанийн үнэлгээ 8.6 тэрбум ам.доллароор буурчээ.

Зарим компанийн олборлолтын төлөв муудсан нь хувьцааны уналтыг улам нэмэгдүүлсэн байна. Тухайлбал, “Kinross” 2026 болон 2027 оны олборлолтын төлөвөө дунджаар найман орчим хувиар бууруулсны дараа хувьцааны ханш нь 21.3 хувиар буурчээ.

Харин Хятадын алт олборлогч “Shandong Gold” групп 2026 оны олборлолтын зорилтоо 1.16-аас 1.22 сая унц болгон бууруулсны дараа хувьцааны ханш 27.8 хувиар унасан нь топ-50 жагсаалтын хамгийн өндөр бууралт болов.

Зэс, литигийн зах зээл ч уналтыг тойрсонгүй

Зах зээлийн үнэлгээ буурсан нь зөвхөн алт олборлогчдоор хязгаарлагдсангүй. Зэс үйлдвэрлэгчдийн зах зээлийн нийт үнэлгээ есдүгээр сард 44 тэрбум ам.доллар буюу 7.6 хувиар буурчээ. Зэсийн ханш сарын эцсийн арилжаагаар нэг фунт нь 6.56 ам.долларт хаагдав.

Дэлхийн хамгийн том уул уурхайн компаниудын нэг “BHP” мөнгөн дүнгээр хамгийн их үнэлгээ алджээ. Тус компанийн зах зээлийн үнэлгээ сарын турш 26.4 тэрбум ам.доллар буюу 11 хувиар буурсан байна.

Батерейн гол түүхий эдийн нэг литигийн зах зээлд ч уналт үргэлжлэв. Гуанжоугийн бирж дээр литигийн карбонатын фьючерсийн ханш есдүгээр сард 22.5 хувиар буурч, тонн тутамдаа 122,800 юань буюу 18,300 ам.доллар болсон нь нэгдүгээр сарын эхний долоо хоногоос хойших хамгийн доод хаалт болжээ.

Хүү өндөр түвшинд хадгалагдаж, ам.долларын ханш чангарсаар байвал үнэт металлын эрэлт сул байх эрсдэл үргэлжилж, уул уурхайн хувьцааны ханшид ч нөлөөлөхөөр байна.