Дизелийн үнэ 70 хувиар өсөхөд АНУ Европоос стратегийн нөөцөө гаргахыг хүсчээ

АНУ-ын засаг захиргаа Франц, Герман зэрэг Европын холбоотнуудаас дизель түлшний стратегийн нөөцөө зах зээлд гаргаж, нийлүүлэлтийг нэмэгдүүлэхийг хүссэн нь Вашингтон дизелийн экспортыг хязгаарлах боломжийг авч үзэж байгаа энэ үед АНУ болон Европын хооронд эрчим хүчний бодлогын шинэ хэлэлцээ өрнүүлэхэд хүргэв.

Ираны дайнаас үүдэлтэй нийлүүлэлтийн тасалдал дизелийн үнийг эрчимтэй өсгөж байна. Америкийн Автомашины Холбоо буюу AAA-ийн мэдээллээр АНУ-д дизель түлшний дундаж үнэ галлон тутамдаа 6.39 ам.долларт хүрсэн нь дайн эхэлснээс хойш 70 орчим хувийн өсөлт болжээ. АНУ-ын Сангийн сайд Скотт Бессент Европын орнуудыг хүлээсэн үүргээ биелүүлж, нийлүүлэлтийн тасалдлыг бууруулахын тулд нэмэлт түлшийг “нэн даруй” зах зээлд гаргахыг уриалсан байна.

Экспортын хориг Европын анхаарлыг татав Вашингтон Европоос нийлүүлэлт нэмэгдүүлэхийг хүсч байгаа ч нөгөө талд АНУ-ын дизелийн экспортыг хязгаарлах хувилбарыг хэлэлцэж байна. Трампын засаг захиргаа дотоодын түлшний үнийг бууруулах боломжуудын нэг болгон экспортын хязгаарлалтыг судалж буй бөгөөд Европын Холбоо ийм алхам хоёр талын эдийн засагт сөргөөр нөлөөлж болзошгүйг анхааруулжээ. Милуоки хотод болсон Их 20-ийн худалдааны хэлэлцээний үеэр АНУ-ын худалдааны төлөөлөгч Жэймисон Грир Европын орнуудтай түлшний нийлүүлэлтийг нэмэгдүүлэх чиглэлээр хамтран ажиллах боломжтойг илэрхийлсэн байна. Харин Европын Холбооны худалдаа хариуцсан комиссар Марош Шефчович АНУ дизелийн экспортод хориг тавих алхам хийвэл Европын хувьд “гэнэтийн” шийдвэр болно гээд, эдийн засагт ноцтой үр дагавар авчирч болзошгүйг онцолжээ. Европын орнууд стратегийн нөөцөөс дизель гаргах эсэх талаар хэлэлцэж байгаа ч одоогоор нэгдсэн шийдвэр гараагүй байна. Нөөцөө бууруулах нь богино хугацаанд нийлүүлэлтийг нэмэгдүүлэх боломжтой ч Ираны дайн үргэлжилж, дэлхийн түлшний нийлүүлэлт тогтворгүй хэвээр байгаа үед Европ өөрийн эрчим хүчний аюулгүй байдлыг давхар тооцох шаардлагатай болжээ.

Францын Ерөнхийлөгч Эммануэл Макрон стратегийн нөөц, экспорт болон үйлдвэрлэлийн хүчин чадлын зохицуулалтыг хэлэлцэх "Их долоо"-ийн уулзалтыг ирэх долоо хоногуудад зохион байгуулахаа өмнө нь мэдэгдсэн. Францын Ерөнхийлөгчийн Тамгын газрын мэдээлснээр Макрон, Трамп нар НҮБ-ын Ерөнхий Ассамблейн үеэр уулзахдаа дизелийн стратегийн нөөц гаргах асуудлыг тусгайлан хэлэлцээгүй аж.

Зах зээлийн хувьд Европ стратегийн нөөцөөс хэр хэмжээний түлш гаргах, АНУ экспортын хязгаарлалтын хувилбараа үргэлжлүүлэх эсэх нь гол анхаарал татаж байна. Эдгээр шийдвэр нь АНУ болон Европ дахь дизелийн нийлүүлэлт, улмаар тээвэр, үйлдвэрлэл болон хэрэглэгчдийн түлшний зардалд шууд нөлөөлөх юм.