Оросын алт Хонконг руу түүхэн дээд хурдаар урсаж байна

Орос гаралтай алт Хонконг руу урьд байгаагүй хэмжээгээр нийлүүлэгдэж, Барууны хориг арга хэмжээ дэлхийн үнэт металлын худалдааны чиглэлийг хэрхэн өөрчилснийг тод харуулж байна. Алтны онлайн зах зээлийн “BullionVault”-ийн тооцоогоор Хонконг энэ оны эхний долоон сард Оросоос 112.7 тонн алт импортолжээ. Уг хэмжээ өнгөрсөн оны бүтэн жилийн 92.1 тоннын дээд үзүүлэлтийг хэдийн давж, 2021 онд ердөө 3.3 тонн байсантай харьцуулахад огцом өсөв. Энэ нь Хонконгийн алтны нийт импортын бараг 15 хувийг бүрдүүлжээ. Харин 2021 онд уг үзүүлэлт 0.6 хувь байжээ.

Оросын алт Лондоноос Азийг чиглэсний учир... Украинд дайн эхлэхээс өмнө Оросын алтны салбар дэлхийн үнэт металлын гол төвүүдийн нэг болох Лондоны зах зээлтэй нягт холбоотой байв. Харин 2022 оноос хойш тогтоосон хориг арга хэмжээнүүд нийлүүлэлтийн уламжлалт сувгийг хааж, худалдааны урсгалыг Азийн зах зээл рүү чиглүүлжээ. Лондоны Үнэт металлын зах зээлийн холбоо 2022 оны гуравдугаар сард Оросын алт, мөнгө цэвэршүүлэгч зургаан компанийг олон улсын зах зээлд хүлээн зөвшөөрөгдсөн стандартыг илэрхийлдэг “Good Delivery” жагсаалтаас хассан. Үүний дараа АНУ, Их Британи болон бусад өрнөдийн орон Оросын алтанд хязгаарлалт тогтоосноор өмнө нь гол худалдан авагч байсан зах зээлүүдэд нэвтрэх боломж хумигдсан юм.

Хонконг Хятад руу чиглэх гол зангилаа болов Хоригийн дараах худалдааны шинэ бүтцэд Хонконг Оросын алтыг Азийн зах зээлд, ялангуяа Эх газрын Хятад руу дамжуулах чухал төв болон гарч иржээ. Орос, Хятадын харилцааны шинжээч Вита Спивак CNBC-д Хонконг Украинд бүрэн хэмжээний довтолгоо эхэлснээс хойш Орос-Хятадын худалдааны чухал зангилаа болсон гэж тайлбарлав. Түүний хэлснээр Хятад Оросын алтанд хориг тогтоогоогүй тул Хонконгод нийлүүлэгдэж буй алтны дийлэнх хэсэг Эх газрын Хятадыг чиглэдэг байна. Ингэснээр Оросын алтны худалдаа бүрэн зогсохын оронд худалдан авагч болон дамжин өнгөрөх төвүүд нь өөрчлөгдөж буй дүр зураг ажиглагдаж байна. Хонконгийн импортод Оросын эзлэх хувь хэдхэн жилийн дотор 0.6 хувиас 15 орчим хувь хүрсэн нь худалдааны чиглэл хэр эрчимтэй шилжсэнийг илтгэнэ.

Тодорхой бус байдал алтны эрэлтийг дэмжиж байна Нийлүүлэлтийн маршрут өөрчлөгдөхийн зэрэгцээ эдийн засаг, геополитикийн тодорхой бус байдал болон инфляц хөрөнгө оруулагчдын алт сонирхох шалтгааныг тодотгов. Санхүүгийн үйлчилгээний “StoneX” компанийн Чарльз Чанг тодорхой бус байдал өндөр үед хэрэглэгчид хуримтлалынхаа үнэ цэнийг хамгаалах нэг хэрэгсэл болгон алтыг сонгодог гэж тайлбарлажээ. Орос гаралтай алтны Хонконг руу чиглэсэн урсгал ийнхүү шинэ дээд түвшинд хүрсэн нь 2022 оноос хойших хориг арга хэмжээ нийлүүлэлтийг зогсоохоос гадна дэлхийн алтны худалдааны зураглалыг өөрчилснийг харуулж байна. Өмнө нь Лондон төвтэй байсан Оросын алтны экспортын урсгал Азийн зах зээл, тэр дундаа Хонконг болон Хятад руу улам төвлөрөх болжээ.