Японы Төв банк тус улсын суурь инфляц 2 хувьд хүрсэн гэж дүгнэж магадгүй

Японы Төв банк тус улсын шинэ хүнсний үнийг хасч тооцсон суурь инфляцын түвшин 2 орчим хувьд хүрсэн гэж дүгнэж магадгүй талаар эх сурвалжууд даваа гарагт мэдээлжээ.

Төв банк уг үнэлгээг аравдугаар сарын 29-нд эхлэх хоёр өдрийн мөнгөний бодлогын хурлын дараа, аравдугаар сарын 30-нд танилцуулах улирлын эдийн засаг, үнийн төлөвийн тайландаа тусгах боломжтой байна.

Компаниуд түүхий эд, үйлдвэрлэл болон бусад зардлын өсөлтөө хэрэглэгчдэд борлуулах бараа, үйлчилгээний үнэд шингээж эхэлсэн. Үүний үр дүнд Японы Төв банкны инфляцыг 2 хувьд тогтвортой барих зорилт биелэхэд "тун ойртож байгаа" гэж үзэж байна.

Төв банк мөнгөний бодлогоо тодорхойлохдоо богино хугацааны болон түр зуурын хүчин зүйлсийн нөлөөг хассан үнийн суурь өөрчлөлтийг чухалчилдаг. Өмнөх төсөөллөөр суурь инфляц 2026 оны санхүүгийн жилийн хоёрдугаар хагасаас 2027 оны санхүүгийн жилийн хооронд 2 хувьд тогтворжино хэмээн тооцож байв.

Японы Төв банкны ерөнхийлөгч Казүо Үэда есдүгээр сарын мөнгөний бодлогын хурлын дараа суурь инфляцын түвшин “2 хувьд бараг хүрч байна” гэж мэдэгдсэн юм.

Одоогоор Төв банкны хувьд инфляц 2 хувьд хүрсэн эсэхээс илүүтэй уг түвшинд тогтвортой хадгалагдах эсэх нь гол асуудал болж буй. Инфляц дахин саарах эсвэл төсөөлснөөс хурдан өсөх эрсдэл аль аль нь байгааг тус банк анхаарч байгаа тул үнийн суурь өсөлтийг үргэлжлүүлэн ажиглахаар төлөвлөжээ.

Японы Засгийн газар болон Төв банк 2013 онд гаргасан хамтарсан мэдэгдлээр хэрэглээний үнийн индексээр хэмжигдэх инфляцыг 2 хувьд хүргэх зорилт тогтоосон. Гэхдээ хэрэглээний үнийн индексэд төрийн дэмжлэг зэрэг түр зуурын хүчин зүйлс нөлөөлдөг аж.

Тухайлбал, шинэхэн хүнсний бүтээгдэхүүний үнийг хассан суурь инфляц наймдугаар сард жилийн дүнгээр 1.7 хувиар өссөн байна. Гэхдээ Засгийн газрын шатахууны татаас үнийн өсөлтийг тодорхой хэмжээгээр сааруулжээ.