Хэлэлцээний ширээнд "нуусан хөзрүүд": Худалдааны харилцааг тогтвортой байлгах нь хоёр орны ашиг сонирхолд нийцнэ

АНУ-ын Ерөнхийлөгч Дональд Трамп, БНХАУ-ын дарга Ши Жиньпин нарын уулзалт хоёр улсын худалдааны түр эвлэрлийг хоёр сараар сунгах алхам боллоо. Тарифын маргааныг дахин хурцатгахаас сэргийлсэн уг зохицуулалт ирэх арваннэгдүгээр сарын 10-нд дуусах байсан ч 2027 оны нэгдүгээр сарын 10 хүртэл хүчинтэй байхаар болжээ.

Талууд хэлэлцээгээ үргэлжлүүлэх хугацаатай болсон ч тариф, газрын ховор элемент, хөдөө аж ахуйн худалдан авалт, дэвшилтэт чипийн экспорт зэрэг гол зөрчлийг шийдвэрлэсэн өргөн хүрээний тохиролцоо биш юм.

Бээжингийн дотоод сорилт

Худалдааны харилцааг тогтвортой байлгах сонирхол БНХАУ-ын дотоод эрэлт сул байгаа үед чухал алхам болж байна. Тус улсын жижиглэн худалдааны борлуулалт наймдугаар сард өмнөх оны мөн үеэс ердөө 0.4 хувиар, оны эхний найман сарын дүнгээр 1.1 хувиар өсчээ.

Сургуульд суралцдаггүй 16-аас 24 насныхны ажилгүйдэл наймдугаар сард 18.9 хувьд хүрсэн бол томоохон хотуудын орон сууцны ханшийн үзүүлэлтүүдийн дийлэнх нь өмнөх оны түвшнээс доогуур байна.

Хэрэглээ, хөдөлмөрийн зах зээл болон үл хөдлөх хөрөнгийн эрэлт сулрч буй нь Бээжингийн хувьд экспортын зах зээлд нэвтрэх боломжоо хадгалах, тарифын шинэ өсөлтөөс зайлсхийх ач холбогдлыг нэмэгдүүлж байна.

Тайванийн асуудал хэлэлцээний ширээн дээр үлдэв

Вашингтоны уулзалтаар Тайванийн маргаанд томоохон ахиц гарсангүй. Ши Жиньпин АНУ-ыг “Тайванийн тусгаар тогтнол”-ыг эсэргүүцсэн байр сууриа хадгалж, асуудалд болгоомжтой хандахыг уриалсныг БНХАУ-ын Гадаад хэргийн яам мэдээлэв.

Трамп тавдугаар сарын Бээжингийн уулзалтын дараа Тайваньд нийлүүлэхээр төлөвлөсөн 14 тэрбум ам.долларын зэвсгийн багцын зөвшөөрлийг хойшлуулж, уг багцыг БНХАУ-тай хийх хэлэлцээний “маш сайн хөзөр” гэж тодорхойлсон. Тухайн уулзалтаар Ши Жинпинь Тайванийн асуудлыг буруу зохицуулбал хоёр улсын хооронд “мөргөлдөөн, бүр зөрчил” үүсэх эрсдэлтэйг анхааруулжээ.

Хиймэл оюуны яриа хэлэлцээ үргэлжилнэ

Хоёр удирдагч хиймэл оюуны ашиг тус, эрсдэлийн талаар яриа хэлэлцээг үргэлжлүүлж, технологийг урвуулан ашиглахаас хамтран сэргийлэх шаардлагатай гэж үзжээ. Ши Жиньпин хиймэл оюун “хүний хяналтад байх ёстой” хэмээн онцолсон ч хяналтын тодорхой стандарт, ослын үед мэдээлэл солилцох заавал мөрдөх механизм зарласангүй.

Худалдааны эвлэрлийг сунгасан шийдвэр хоёр улсын харилцааг богино хугацаанд тогтворжуулах боломж олголоо. Гэвч тариф, чип, газрын ховор элемент болон Тайванийн асуудлыг шийдвэрлээгүй тул Вашингтон, Бээжин зөрчлөө арилгаснаас илүүтэй дараагийн хэлэлцээнд зориулж хугацаа авсан дүр зурагтай байна.