Холливудын халуун зун: Бокс оффисын орлого $4.76 тэрбумд хүрлээ

АНУ-ын кино театрууд энэ зун 4.76 тэрбум ам.долларын тасалбарын орлого олж, өмнөх дээд амжилтыг ялимгүй давлаа. Кино салбарын мэдээлэл хянадаг “Rentrak”-ийн тооцоогоор тавдугаар сарын 1-нээс есдүгээр сарын 7 хүртэлх бокс оффисын орлого 2013 онд тогтоосон 4.75 тэрбум ам.долларын дээд амжилтыг шинэчилсэн байна.

Зуны улирал АНУ-ын кино театруудын жилийн нийт орлогын ойролцоогоор 40 хувийг бүрдүүлдэг тул томоохон студиудын хувьд хамгийн чухал үеүүдийн нэг хэвээр... “Rentrak”-ийн мэдээлснээр, энэ зуны орлого цар тахлын өмнөх 2019 оны түвшнээс бараг 10 хувиар давжээ.

Гэхдээ хоёр үеийг шууд харьцуулахад хуанли дээрх ялгаа бий. Энэ оны зуны тооцоонд 2013 оныхоос нэг долоо хоногоор урт хугацааны борлуулалт багтсан байна.

Орлогын 30 гаруй хувийг бүрдүүлсэн Японы “Sony” энтертайнмент компанийн “Spider-Man: Brand New Day” болон АНУ-ын медиа, энтертайнментийн “Universal” студийн “The Odyssey” бүтээлүүд нийлээд 1.5 тэрбум ам.доллароос дээш орлого олжээ.

Гэсэн ч “Rentrak”-ийн зах зээлийн чиг хандлага хариуцсан ахлах шинжээч Пол Дергарабедианы үзэж буйгаар салбарын тогтвортой өсөлт ганц, хоёр хит бүтээлээс илүү өргөн хүрээний контентын сонголтоос хамаарна.

Түүний тайлбарласнаар нэг кино улирлын нийт үзүүлэлтийг дангаараа төвлөрүүлэх бус, төрлийн тэнцвэртэй хөтөлбөр үзэгчдийг тогтмол кино театрт татах нь урт хугацаандаа илүү чухал юм.

Зун эхлэхээс ч өмнө 2019 оны бокс оффисын түвшнээс 830 сая ам.доллар буюу 24 хувиар хоцорч байсан бол зуны хүчтэй үзүүлэлт уг зөрүүг мэдэгдэхүйц нөхжээ.

Үзэгчдийн тоо бүрэн сэргээгүй ч тасалбарын үнэ өсөв

Орлого шинэ дээд түвшинд хүрсэн хэдий ч кино театрт очсон үзэгчдийн тоо цар тахлын өмнөх хэмжээнд хүрээгүй байна.

“S&P Global Market Intelligence”-ийн тооцоогоор үзвэрийн танхимын тоо цөөрсөнтэй холбоотойгоор энэ оны нийт кино театрын ирц 2019 оныхоос ойролцоогоор 250 сая үзэгчээр бага байна.

Киноны нийлүүлэлт ч буурчээ. Он гарсаар 2,000-аас дээш театрт зэрэг нээлт хийсэн 68 бүтээл гарсан нь 2019 оны мөн үеийн 79 киноноос 14 хувиар цөөн үзүүлэлт юм.

Гэсэн ч тасалбарын үнэ өссөн нь нийт орлогыг нэмэгдүүлэхэд чухал нөлөө үзүүлэв. Кино театрын салбарын “Cinema United” байгууллагын мэдээллээр 2019 онд АНУ-ын кино тасалбарын дундаж үнэ 9.16 ам.доллар байсан бол “EntTelligence”-ийн энэ оны тооцоогоор 12.75 ам.доллар болжээ.

Өндөр зэрэглэлийн том дэлгэцийн формат бүхий кино бүр ч үнэтэй байна. "Premium Large Format" буюу PLF тасалбар дунджаар 18.26 ам.доллар, “Imax”-ын тасалбар 20.57 ам.долларын үнэтэй байгаа нь нэг үзэгчээс олох орлого өссөнийг харуулав.

АНУ-ын энтертайнментийн “Disney” компани ч том дэлгэцийн эрэлт нэмэгдэж буйтай уялдуулан PLF театруудад зориулсан “Infinity Vision” баталгаажуулалтыг нэвтрүүлжээ. Тус компани уг тэмдэглэгээг өндөр чанартай театрал үзвэрийн орчныг илэрхийлэх стандарт хэмээн тайлбарласан байна.

Театруудын нэмэлт борлуулалт өслөө

Орлогын өсөлт зөвхөн тасалбараар хязгаарлагдсангүй. АНУ-ын кино театрын “Marcus Theatres” сүлжээ зуны улиралд тасалбарын орлогоороо дээд амжилт тогтоохын зэрэгцээ хүнс, ундаа, мерчандайз болон бусад концессын борлуулалтаараа шинэ оргилд хүрснээ мэдээлжээ.

Тус сүлжээний зуны үзэгчдийн тоо 2019 оноос хойших хамгийн өндөр түвшинд хүрсэн байна.

АНУ-ын кино театрын “Cinemark” компанийн дэлхийн контент хариуцсан тэргүүн дэд Ерөнхийлөгч Жастин Макдэниелийн хэлснээр, үзэгчдийг тогтвортой татахын тулд сонирхол татах шинэ бүтээлүүдийн тасралтгүй урсгал болон том дэлгэцийн илүү хүчтэй үзвэрийг зэрэг хөгжүүлэх шаардлагатай.

2026 оны зун кино театрын зах зээл бүрэн сэргээгүй боловч салбарын орлогын бүтэц өөрчлөгдөж буйг энэ бүхнээс харж болно.