Ипотекийн зээлийн дараалалд хэддүгээрт байгаагаа цахимаар шалгах боломж бүрдэх үү?

УИХ дахь Ардчилсан намын бүлэг төрийн үйлчилгээний цахим хүсэлтийн дарааллыг ил тод болгох тогтоолын төслийг хэлэлцэхийг дэмжжээ. Уг санаачилга хэрэгжсэнээр иргэд төрийн байгууллагад гаргасан хүсэлтийнхээ явц, дараалал болон шийдвэрлэх хугацааны талаарх мэдээллийг цахимаар хянах боломж бүрдэнэ гэж тус нам үзэж байна.

УИХ-ын гишүүн Ц.Баатархүүгийн мэдээлснээр иргэд өөрийн хүсэлт нийт дарааллын хэддүгээр байрт байгаа, хэзээ шийдвэрлэгдэхээр хүлээгдэж буй, мөн оноо нь ямар шалгуураар бүрдсэнийг харах боломж бүрдүүлэх аж.

Ингэхдээ хүсэлт гаргагчийн хувийн мэдээллийг хамгаалж, нийтэд ил тод байх болон хувь хүний нууцад хамаарах мэдээллийг ялган зохицуулах шаардлагатайг тэрбээр онцолжээ.

Хөнгөлөлттэй орон сууцны зээлийн хүсэлт 50 мянгад дөхжээ

Төслийг санаачлагчид орон сууцны хөнгөлөлттэй зээлийн хүсэлт давхардсан тоогоор 47–50 мянгад хүрсэн талаар мэдээлсэн байна.

Тухайлбал, хүсэлтийн дараалал, онооны мэдээлэл тодорхой бус байх нь зээл олгох үйл явцын шударга байдалд эргэлзээ үүсгэдэг тухай албаныхан тайлбарлажээ. Харин эдгээр мэдээллийг цахимаар шалгах боломж бүрдүүлснээр иргэд хүсэлтийнхээ явцыг хянаж, шийдвэр гарах хугацааг илүү тодорхой төсөөлөлтэй болно гэж үзэж байна.

Мөн хүсэлтийн дарааллыг ил тод болгох нь танил тал, хувийн харилцаагаар давуу байдал олгодог гэх хардлагыг бууруулж, төрийн үйлчилгээний шийдвэр гаргалтад тавих олон нийтийн хяналтыг нэмэгдүүлэх зорилготой аж.

Тогтоолын төсөл батлагдаж, холбогдох зохицуулалт хэрэгжсэн тохиолдолд иргэд төрийн үйлчилгээний хүсэлтээ зөвхөн бүртгүүлээд хүлээх бус, шийдвэрлэлтийг тодорхой мэдээлэлд тулгуурлан хянах боломж бүрдэх юм.