"Kalshi"-ийн арилжаачид криптовалютын эрх зүйг он дуустал батлагдахгүй гэж үзэж байна

АНУ криптовалютын зах зээлд олон жил хүлээгдсэн зохицуулалтын тодорхой хүрээг бий болгож чадах эсэхэд хөрөнгө оруулагчдын эргэлзээ нэмэгдэж байна.

Тодруулбал, тамаглалын зах зээлийн “Kalshi” платформын арилжаачид АНУ-ын крипто хөрөнгийн зохицуулалтын суурь дүрмийг тогтоох "Clarity Act" буюу "Дижитал хөрөнгийн зах зээлийн тодорхой байдлын тухай хуулийн төсөл" энэ он дуусахаас өмнө хууль болох магадлалыг 25 хувиас доогуур үнэлжээ. Түүнчлэн 2027 оны дөрөвдүгээр сар гэхэд батлагдах магадлал ч 50 хувьд хүрэхгүй байгаа нь хууль тогтоох үйл явц удааширч болзошгүй гэсэн хүлээлтийг харуулж байна.

Энэ таамаглал нь зөвхөн криптовалютын ханшид нөлөөлөх улс төрийн үйл явдал биш. Хуулийн төсөл удаашрах тусам крипто бирж, хөрөнгө оруулагч болон салбарын компаниуд аль зохицуулагчийн ямар дүрмийг дагаж мөрдөх вэ гэсэн тодорхойгүй байдалтай удаан хугацаанд нүүр тулах эрсдэлтэй байгаа юм.

SEC үү, CFTC юу: Маргааны төвд зохицуулагчдын эрх мэдлийн зааг байна

"Clarity Act"-ийн үндсэн зорилго нь АНУ-ын Үнэт цаас, биржийн хороо буюу SEC болон Түүхий эдийн фьючерсийн арилжааны комисс буюу CFTC-ийн крипто хөрөнгийн зах зээл дэх эрх хэмжээний заагийг илүү тодорхой болгоход чиглэж байгаа юм.

Өөрөөр хэлбэл ямар крипто хөрөнгийг үнэт цаас гэж үзэж SEC хариуцах, аль хэсэг нь түүхий эдийн ангилалд орж CFTC-ийн хяналтад байхыг илүү тодорхой болгох замаар компаниуд болон хөрөнгө оруулагчдад мөрдөх нэгдсэн “суурь дүрэм” бий болгох зорилготой.

Хуулийн төсөл өнгөрсөн оны долдугаар сард АНУ-ын Төлөөлөгчдийн танхимаар батлагдсан бөгөөд ирэх есдүгээр сарын 15-нд Сенатад журмын санал хураалтад орох хуваарьтай байна. Гэхдээ “Kalshi”-ийн арилжаачдын үнэлгээ Сенатын шатанд улс төрийн тохиролцоонд хүрэх нь зах зээлийн оролцогчдын төсөөлж байснаас илүү хүндрэлтэй байж болохыг илтгэж байна.

SEC болон CFTC сүүлийн жилүүдэд крипто хөрөнгийн талаар тус тусын чиглэл, байр сууриа гаргасан ч хоёр байгууллагын эрх хэмжээний зааг хууль тогтоомжийн түвшинд бүрэн тодорхой болоогүй хэвээр байгаа юм.

Цагаан ордон шахалтаа нэмэгдүүлж байна

“Reuters”-ийн мэдээлснээр Цагаан ордон хуулийн төслийг урагшлуулахын тулд хууль тогтоогчдод шахалтаа нэмэгдүүлж байгаа бөгөөд АНУ-ын Ерөнхийлөгч Доналд Трамп Конгрессыг "Clarity Act"-ийн “шударга хувилбар”-ыг батлахыг уриалжээ. Трамп болон крипто салбарын удирдлагуудын уулзалтад SEC-ийн дарга Пол Аткинс, CFTC-ийн дарга Майкл Селиг нар мөн оролцсон гэж “Reuters” мэдээлсэн байна.

Вашингтоноос ирэх ийм дохио нь крипто салбарын хувьд чухал боловч эцсийн үр дүн Сенат дахь санал хураалт, улс төрийн тохиролцооноос хамаарна. Иймээс “Kalshi”-ийн магадлал нь хуулийн төслийн бодит үр дүнг урьдчилан тогтоож байгаа үзүүлэлт гэхээс илүүтэй тухайн мөч дэх арилжаачдын хүлээлт, улс төрийн эрсдэлийн үнэлгээ гэж ойлгох нь зүйтэй.

Конгресс гацвал CFTC өөрөө хөдөлж магадгүй

Хуулийн төсөл батлагдахгүй удвал АНУ-ын крипто зохицуулалт зогсоно гэсэн үг биш.

CFTC-ийн дарга Майкл Селиг "Clarity Act"-ийг батлах нь Конгресст гацвал CFTC одоо байгаа бүрэн эрхийнхээ хүрээнд крипто хөрөнгийн зах зээлд зохицуулалтын дэглэм бий болгох чиглэлд ажиллаж болно гэсэн байр суурь илэрхийлжээ.

Энэ хувилбар хэрэгжвэл Конгрессоос нэгтгэсэн хууль батлахын оронд зохицуулалтын бодит дүрэм агентлагуудын тайлбар, журам болон хэрэгжилтээр хэсэгчлэн бүрдэх боломжтой.

Харин бизнесүүдийн хувьд энэ нь шинэ эрсдэл дагуулна. Хууль тогтоомжоор эрх мэдлийн заагийг тодорхой тогтоохгүй бол компаниуд SEC болон CFTC-ийн шаардлагыг тайлбарлах, нийцлийг хангах, хууль эрх зүйн эрсдэлээ удирдахад илүү их хөрөнгө зарцуулах шаардлагатай болж болзошгүй юм.

Крипто компаниудад ханшаас гадна Вашингтоны хуанли ч чухал болов

Ингэснээр крипто зах зээлийн хөрөнгө оруулагчид болон компаниудын хувьд биткойн, бусад крипто хөрөнгийн ханшийн мөчлөгөөс гадна АНУ-ын хууль тогтоох үйл явцыг анхааралтай ажиглах шаардлага улам нэмэгдэж байна.

Криптовалютын биржийн оператор “Coinbase”, блокчэйн төлбөр тооцооны технологийн “Ripple”, венчур хөрөнгө оруулалтын “Andreessen Horowitz”, хөрөнгийн биржийн “Nasdaq” оператор зэрэг томоохон нэрс крипто зохицуулалтын хэлэлцүүлэгт тогтмол дурдагддаг. Гэхдээ өнөөгийн маргааны гол асуудал аль нэг компанийн ашиг сонирхлоос илүү өргөн хүрээтэй бөгөөд АНУ-ын крипто зах зээлийг цаашид ямар байгууллага, ямар дүрмээр хянах вэ гэдэгт төвлөрч байна.

Хэрэв "Clarity Act" батлагдвал салбарын компаниудад урт хугацааны хөрөнгө оруулалт, бүтээгдэхүүн хөгжүүлэлт болон нийцлийн зардлаа илүү тодорхой төлөвлөх боломж бүрдэх хүлээлттэй байгаа юм. Харин хууль дахин хойшилбол зохицуулалтын тодорхойгүй байдал үргэлжилж, компаниудын хууль эрх зүйн болон нийцлийн зардал өндөр хэвээр үлдэх эрсдэлтэй ажээ.

Тиймээс крипто зах зээлийн дараагийн чухал огноо нь есдүгээр сарын 15. Сенатын санал хураалт АНУ крипто хөрөнгийн зах зээлд удаан хүлээгдсэн “суурь дүрэм”-ээ бий болгоход ойртож байна уу, эсвэл зохицуулалтын тодорхойгүй байдал 2027 он руу шилжих үү гэдгийг илүү тодорхой харуулах төлөвтэй байна.

CNBC болон “Kalshi” нь хэрэглэгч татах болон цөөнхийн хөрөнгө оруулалттай холбоотой арилжааны харилцаатай болохыг CNBC-ийн мэдээлэлд дурдсан болно.