Мэргэжлийн хөрөнгө оруулагчид Ази, хөгжиж буй зах зээл болон ҮХХ-өөр багцаа төрөлжүүлж эхэллээ

Дэлхийн санхүүгийн зах зээлд геополитикийн эрсдэл, газрын тосны ханш, бодлогын хүүгийн төлөв болон хиймэл оюуны хөрөнгө оруулалтын тогтвортой байдлын талаарх эргэлзээ зэрэг олон хүчин зүйл нэгэн зэрэг нөлөөлж буй энэ үед мэргэжлийн хөрөнгө оруулагчдын анхаарал нэг асуудал дээр төвлөрч байна. Тэр нь өнгөрсөн жилүүдэд өндөр өгөөж үзүүлсэн цөөн компани, салбар болон зах зээлд хэт төвлөрөх эрсдэл юм.

CNBC зургаан хөрөнгө оруулагчаас өнөөгийн зах зээлийн хамгийн том эрсдэл болон түүнд тохируулан багцын байршуулалтаа хэрхэн өөрчилж буйг тодруулахад тэдний байр суурь нэг цэгт огтлолцжээ. Зах зээлийн дараагийн хөдөлгөөнийг таамаглан нэг сэдэвт бооцоо тавихаас илүү хөрөнгө оруулалтаа бүс нутаг, салбар болон активын ангиллаар өргөн төрөлжүүлэх шаардлага нэмэгдэж байна.

Хөрөнгө оруулалтын менежментийн “IBOSS” компанийн хөрөнгө оруулалтын менежер Крис Рашийн үзэж буйгаар өнөөгийн нөхцөлд хөрөнгө оруулагчдын гаргаж болох хамгийн том алдаа нь өмнөх өсөлтийн тэргүүлэгчдэд хэт их найдсаар, дэлхийн бусад зах зээл дэх боломжийг орхигдуулах юм.

Тэрбээр мөн АНУ-ын хөрөнгийн зах зээл бусад бүс нутгаас тогтвортой илүү өгөөж үзүүлнэ гэсэн ойлголт өмнөх шиг баталгаатай байхаа больсныг онцолжээ. Үүний зэрэгцээ “Magnificent Seven” буюу "Гайхамшигт 7" хэмээх АНУ-ын технологийн томоохон компаниудын өрийн хэмжээ нэмэгдэж байгаа нь эдгээр компанид төвлөрсөн хөрөнгө оруулалтын эрсдэлийг нэмэгдүүлж болзошгүй гэж үзсэн байна.

Иймээс Раш хөрөнгө оруулалтын багцыг зөвхөн АНУ-ын томоохон технологийн компаниудаар хязгаарлахын оронд үл хөдлөх хөрөнгийн хөрөнгө оруулалтын сан буюу REIT, Их Британийн хувьцаа, Азийн болон хөгжиж буй зах зээлийн үнэт цаасаар төрөлжүүлэх боломжийг онцолжээ.

Нэг зах зээл өсөлтийг үзүүлж байхад нөгөө нь огцом саарч байна

Харин хөрөнгө оруулалт, баялгийн удирдлагын “7IM” компанийн баялаг, хөрөнгө оруулалт болон төрийн бодлогын стратеги эрхэлсэн захирал Бен Кумарын хувьд энэ жилийн гол сорилт зах зээл бүхэлдээ савлаж байгаад бус, салбаруудын хөдөлгөөн хоорондоо улам их зөрөх болсонд оршиж байна.

Түүний онцолсноор энэ жил нийт зах зээлийн савлагааг бус, салбар тус бүрийн савлагааг удирдах нь хамгийн том сорилт байжээ.

Өөрөөр хэлбэл, хөрөнгийн зах зээлийн гол индекс харьцангуй тогтвортой харагдсан ч түүний доторх салбаруудын хөдөлгөөн огт өөр байж болно. Нэг салбар богино хугацаанд эрчимтэй өсөхтэй зэрэгцэн нөгөө хэсэг нь огцом буурах боломжтой учраас зөвхөн индексийн ерөнхий чиглэлийг дагасан хөрөнгө оруулалтын стратеги хангалтгүй болж байна.

Ийм орчинд салбар хоорондын тэнцвэр болон багцын бүтэц нийт зах зээлийн чиглэлийг таамаглахаас дутахгүй ач холбогдолтой болж буйг хөрөнгө оруулагчид онцолжээ.

Хөрөнгө оруулагчид зах зээлийн бусад сегментэд төвлөрч эхэлжээ

Мэргэжлийн үйлчилгээ, аудит, зөвлөх үйлчилгээний “Forvis Mazars” компанийн хөрөнгө оруулалтын ерөнхий захирал Бен Сигер-Скоттын хувьд зах зээлд одоогоор эсрэг чиглэлд үйлчилж буй хоёр том хүчин зүйл байна. Нэг талд Ирантай холбоотой геополитикийн нөхцөл байдал эрсдэлийг нэмэгдүүлж байгаа бол нөгөө талд АНУ-ын компаниудын ашиг, орлого хөрөнгийн зах зээлийн өсөлтийг өдөөж байна.

Энэ хоёр хүчин зүйлийн дунд тэрбээр багцынхаа бүтцийг өөрчилж, АНУ-ын технологийн томоохон компаниудад төвлөрсөн байршуулалтаа бууруулан зах зээлийн бусад сегментэд хөрөнгө оруулах болсон хэмээжээ. Мөн зах зээлийн үнэлгээгээр жинлэсэн индексийг дагахаас илүү компани бүрд ойролцоо жин ногдуулдаг тэнцүү жинтэй стратегийг ашиглаж эхэлсэн байна.

Зах зээлийн үнэлгээгээр жинлэсэн индексийн хувьд хамгийн өндөр үнэлгээтэй хэдхэн компанийн хувьцааны ханш нийт индексийн хөдөлгөөнд үлэмж нөлөөлдөг. Харин тэнцүү жинтэй стратеги нь энэ төвлөрлийг бууруулж, нэг эсвэл хэдхэн том компанийн хувьцааны ханш огцом өөрчлөгдөхөд нийт багц дагаж савлах эрсдэлийг хязгаарлах боломжтой.

Хиймэл оюуны хөрөнгө оруулалт зах зээлд шинэ дарамт үүсгэж байна

Хөрөнгө оруулалтын менежментийн “Saltus” компанийн хамтарсан хөрөнгө оруулалтын ерөнхий захирал, түнш Чарли Амблерийн хувьд дараагийн том эрсдэл нь хүүгийн зах зээлд үүсээд буй “гацалт” юм.

Түүний үзэж буйгаар Төв банкнууд хиймэл оюуны дэд бүтцэд асар их хөрөнгө оруулалт хийгдэж байгаа үед урт хугацааны бодлогын хүүг тогтоон барихад хүндрэлтэй байна.

Хиймэл оюуны дата төв, тооцооллын хүчин чадал, эрчим хүч болон холбогдох дэд бүтцэд шаардагдах их хэмжээний хөрөнгө оруулалт нь эдийн засгийн хөрөнгө оруулалтын эрэлтийг өндөр түвшинд хэвээр хадгалах хүчин зүйл болж байна. Энэ үзэгдэл нь инфляц, эдийн засгийн өсөлт болон урт хугацааны хүүгийн төлөвийг үнэлэх Төв банкнуудын тооцоог улам төвөгтэй болгож болзошгүй юм.

Ингэснээр хиймэл оюуны өсөлтийн сэдэв зөвхөн технологийн компаниудын хувьцааны ханшаар хязгаарлагдахгүй, бонд болон хүүгийн зах зээлээр дамжин хөрөнгө оруулалтын бусад ангилалд ч нөлөөлөх эрсдэлтэй болж байна.