“Оюутолгой”-гоос Монголд үлдэх үр өгөөжийг нэмэгдүүлэх чиглэлээр Австралитай хамтын ажиллагаагаа өргөжүүлнэ

Монгол, Австралийн худалдааны эргэлт 2025 онд 66.8 сая ам.долларт хүрчээ. Хоёр улсын худалдааны хэмжээг нэмэгдүүлэхээс гадна бүтцийг илүү тэнцвэртэй, төрөлжсөн, харилцан ашигтай болгох сонирхолтой байгаагаа Ерөнхий сайд Н.Учрал Австралийн холбооны улсын парламентын Төлөөлөгчдийн танхимын дарга Милтон Дикт бараалхах үеэрээ онцолжээ. Ялангуяа Монгол Улсаас Австралид нийлүүлэх экспортын бараа, бүтээгдэхүүний нэр төрөл болон хэмжээг нэмэгдүүлэхийг зорьж буйг онцоллоо.

Уул уурхай, эрдэс баялгийн салбар нь хоёр улсын эдийн засгийн хамтын ажиллагааны бодит үр дүнтэй чиглэлүүдийн нэг бөгөөд үүний гол илэрхийлэл нь зэс, алтны “Оюутолгой” төсөл гэж Ерөнхий сайд мөн онцолсон байна.

Монгол Улсын Засгийн газар уул уурхайн “Рио Тинто” групптэй хийсэн хэлэлцээгээр төслийн зардлыг бууруулах, Монголын талд ногдох өгөөжийг нэмэгдүүлэх чиглэлээр тодорхой үр дүнд хүрээд байгааг Ерөнхий сайд онцолсон байна.

Цаашид “Оюутолгой” төслөөс Монгол Улсад үлдэх үр өгөөжийг нэмэгдүүлэх, үндэсний боловсон хүчин бэлтгэх, дотоодын аж ахуйн нэгжүүдийн ханган нийлүүлэлтийн оролцоог өргөжүүлэх, технологи, ноу-хау нутагшуулах чиглэлээр хамтын ажиллагааг үргэлжлүүлэх байр сууриа илэрхийлжээ.

Сэргээгдэх эрчим хүчний туршлагаас суралцах санал тавив Ерөнхий сайд сэргээгдэх эрчим хүчний чиглэлээр дэлхийд тэргүүлэгч Австралитай хамтарч, хөрөнгө оруулалт, технологи, стандарт, магадлан итгэмжлэл болон мэргэжилтэн бэлтгэх туршлагыг Монголд нэвтрүүлэх сонирхлоо илэрхийлэв. Тухайлбал, дээврийн нарны цахилгаан үүсгүүрийн суурилуулалт, ашиглалтын аюулгүй байдал, чанарын баталгааг хангах чиглэлээр Австралийн “PV” суурилуулагч, зураг төсөл боловсруулагчдыг магадлан итгэмжлэх тогтолцооны туршлагыг судлах санал тавьжээ. Мөн мэргэжилтэн бэлтгэх, гэрчилгээжүүлэх чиглэлээр хамтран ажиллах боломжийг хөндсөн байна. Австралид Монгол Улсын 28 мянга орчим иргэн амьдарч буй бөгөөд Ерөнхий сайд тус улсад суралцах монгол оюутнуудын визийн нөхцөл, төгсөлтийн дараах ажиллах боломжийг илүү таатай болгох асуудалд онцгой анхаарахыг хүсчээ.