Пусаны сувагт гацсан аварга загасыг 607 мянган хүн үзэж сонирхжээ

Өмнөд Солонгосын Пусан хотын Хойд боомтын нарийн сувагт гацсан 3.5 метр урт аварга загас санаандгүйгээр хотын шинэ үзвэр болж, 600 мянга гаруй хүний анхаарлыг татлаа.

Есдүгээр сарын 18-нд анх харагдсан уг загасыг Хойд боомтын солонгос нэр “Bukhang” болон нэрийн араас залгадаг “i” дагаврыг нийлүүлэн “Букан-и” хэмээн өхөөрдөн нэрлэх болжээ. Мэргэжилтнүүд уг амьтныг хүрэл өнгийн аварга загас буюу “bronze whaler” төрөлд хамаарах бөгөөд олзоо даган тэнгисээс сувагт орж ирсэн байж болзошгүй гэж үзэж байна.

Хойд боомтын эргийн цэцэрлэгт хүрээлэнд есдүгээр сарын 19-нөөс 28-ны хооронд 607 мянган хүн зочилжээ. Тус цэцэрлэгт хүрээлэн баярын өдрүүдэд ердийн үед өдөрт 2,000 орчим зочин хүлээн авдаг байна.

Пусаны эргийн хамгаалалтын алба “Букан-и”-г анх харагдсан өдөр нь сувгаас гаргахыг оролдсон ч зургаан цагийн дараа ажиллагааг зогсоожээ. Загасыг хүчээр гаргах нь гэмтээх эсвэл догшин авир гаргахад хүргэж болзошгүй гэсэн мэргэжилтнүүдийн зөвлөмжийн дагуу ийм шийдвэр гаргасан байна.

Мягмар гарагийн өглөө эргийн хамгаалалтын завинууд загасны араас ус хүчтэй шүршиж, сувгийн ам руу чиглүүлэхээр дахин оролдов. Албаныхны мэдээлснээр уг аргыг 2004 онд АНУ-ын Массачусетс мужийн гүехэн усанд гацсан цагаан аварга загасыг тэнгист буцаасан ажиллагаанаас санаа авчээ.

Гэвч “Букан-и” завинуудыг тойрон гарч, суваг руу дахин сэлсэн тул ажиллагаа амжилтгүй болжээ. Мягмар гарагийн үдээс хойш загас сувгаас гараагүй хэвээр байсан тул ажиллагааг дахин зогсоосон байна.

Өмнөд Солонгосын Загас агнуурын шинжлэх ухааны үндэсний хүрээлэнгийн мэдээлснээр “Букан-и”-ийн биеийн байдал тогтвортой байна. Гэхдээ сувагт хооллох болон чөлөөтэй хөдлөх боломж хязгаарлагдмал тул удаан хугацаанд тэнд үлдвэл сульдана гэж мэргэжилтнүүд анхааруулжээ.

“Букан-и” олон нийтийн анхаарлыг татсанаар Пусаны захиргаа түүнийг хүндэт сурталчилгааны элчээр "томилж", “Shafluencer” цол олгосон байна. Хотын Instagram хуудсаар явуулсан санал асуулгад оролцогчдын 91 хувь нь уг санааг дэмжжээ. Пусан хотын бэлгэ тэмдэг “Boogi” загасны өмнөөс батламжийг нь хүлээн авахаар болсон байна.

Пусан хотын дарга Чон Жэ Сү CBS радиод “Үнэхээр од болох шинжтэй. Тав, арван минут тутамд усны мандалд гарч ирдэг. Үнэхээр хөөрхөн” хэмээн ярьжээ.

Мягмар гарагт “Букан-и”-г үдэхээр ирсэн 62 настай Ким Жон Сүк хэмээх хүн “Хэд хоног энд харсаар байгаад дасчихжээ... Бага зэрэг гунигтай байна” хэмээн “Maeil Shinmun” сонинд ярьсан байна.

Харин аавтайгаа хамт загасыг үдэхээр ирсэн найман настай жаал “Зүгээр ээ. Букан-и найзуудтайгаа уулзахаар явж байгаа” гэжээ.