"Tesla" Вьетнамын зах зээлд орохоор бэлтгэж, "VinFast" экосистемээрээ давамгайлж байна

АНУ-ын цахилгаан автомашин үйлдвэрлэгч “Tesla” компани энэ сард Вьетнамд “Tesla Motors Vietnam” нэртэй хуулийн этгээд бүртгүүлсэн нь тус улсын хурдацтай тэлж буй цахилгаан автомашины зах зээлд нэвтрэх бэлтгэл байж болохыг бизнесийн бүртгэлийн баримтуудад харууллаа.

Гэхдээ “Tesla”-гийн өмнө аль хэдийн өндөр төвлөрсөн зах зээл бий. HSC-ийн судалгаагаар Вьетнамын цахилгаан автомашин үйлдвэрлэгч “VinFast” дотоодын цахилгаан автомашины зах зээлийн 92 хувийг эзэлж байна. Тус компани автомашины борлуулалтаас гадна цэнэглэлт, борлуулалтын дараах үйлчилгээ болон цахилгаан төлбөрийн сүлжээг нэг системд нэгтгэсэн нь шинэ өрсөлдөгчдөд өндөр босго тогтоожээ.

Зах зээл хурдацтай тэлж байна

Олон улсын эрчим хүчний агентлагийн тавдугаар сард гаргасан мэдээллээр Вьетнам улс 2025 онд Зүүн Өмнөд Азийн хамгийн том цахилгаан автомашины зах зээл болсон.

Зах зээлийн судалгааны “Counterpoint Research” компанийн дэд ерөнхийлөгч Питер Ричардсоны мэдээлснээр Вьетнам дахь цахилгаан автомашины борлуулалт хоёрдугаар улиралд өмнөх оны мөн үеэс 89 хувиар нэмэгджээ.

Хурдтай өсч буй эрэлт нь “Tesla” зэрэг олон улсын үйлдвэрлэгчдэд шинэ боломж нээж байгаа ч автомашины бүтээгдэхүүнээс гадна цэнэглэх боломж, засвар үйлчилгээ, түгээлтийн хүртээмж хэрэглэгчдийн сонголтод улам чухал болж байна.

“VinFast”-ийн гол давуу тал нь дэд бүтэц

АСЕАН-ий автомашины зах зээлийн шинжээч Суппареэк Саванвөнгийн мэдээлснээр “VinFast” Вьетнамд 150 мянгаас дээш машин цэнэглэх хүчин чадалтай бөгөөд уг сүлжээ нь үндсэндээ өөрийн автомашинуудад зориулсан бүтэцтэй.

“VinFast”-ийн ард Вьетнамын тэрбумтан Фам Нят Вөөнгийн байгуулсан “Vingroup” холдинг бий. Тус группийн баттерей цэнэглэлт, үйлчилгээ болон тээврийн бизнесүүдийг хамарсан өргөн сүлжээ нь хэрэглэгчдэд автомашин худалдаж авахаас эхлээд өдөр тутам ашиглах хүртэл нэгдсэн үйлчилгээ санал болгодог.

“Vingroup” энэ оны эхний хагас жилд 221.97 их наяд донг буюу 8.52 тэрбум ам.долларын орлого олсныг санхүүгийн тайландаа мэдээлжээ.

Автомашины салбарын судалгааны “BMI” компанийн ахлах шинжээч Кокецо Тсоай “Tesla” Вьетнамд амжилттай өрсөлдөхийн тулд түгээлт, үйлчилгээ болон цэнэглэх сүлжээнд хэрэглэгчдийн итгэлийг шинээр бүрдүүлэх шаардлагатайг онцолжээ.

“Tesla”-гийн боломж премиум сегментэд төвлөрч байна

“Tesla”-гийн "Model 3" болон "Model Y" загварууд Вьетнамын зах зээлд хамгийн боломжтой сонголт байж болох ч эхний шатанд премиум сегментэд илүү өрсөлдөх төлөвтэй байна.

Питер Ричардсоны хэлснээр “Tesla”-гийн дэлхийд танигдсан брэнд, технологи болон программ хангамжийн давуу тал нь өндөр орлоготой хэрэглэгчдийн сонирхлыг татах боломжтой.

Гэсэн ч Вьетнамын цахилгаан автомашины зах зээлд өрсөлдөөн зөвхөн автомашины үзүүлэлт, брэндийн нэр хүндээр хязгаарлагдахгүй. Цэнэглэх цэгийн хүртээмж, засвар үйлчилгээ, борлуулалтын дараах дэмжлэг болон түгээлтийн сүлжээ хэрэглэгчдийн сонголтод улам их нөлөөлж байна.