“The MongolZ” Бээжинд "аман хүзүүдэж", $210 мянгаар ганзага мялаалаа

“The MongolZ” баг БНХАУ-ын Бээжин хотноо болсон “Intel Extreme Masters Beijing 2026” тэмцээнээс мөнгөн медаль хүртэж, дэлхийн чансааны шилдэг 10 багийн тоонд дахин багтжээ.

“Counter-Strike 2” тоглоомын нэгдүгээр зэрэглэлийн тус тэмцээний аваргын төлөө “The MongolZ” Европын “MOUZ” багтай өрсөлдөж, 0:3-аар хожигдон, дэд байрт шалгарч, 210 мянган ам.долларын шагнал хүртжээ.

Дэлхийн чансааны 54 дүгээр байраас есдүгээр байр хүртэл урагшиллаа

“The MongolZ”-ын хувьд энэ удаагийн амжилт нь шинэ бүрэлдэхүүнтэй тоглож эхэлснээс хойших чансааны уналтаа сэргээж, олон улсын томоохон тэмцээний шигшээд дахин шалгарснаараа онцлог юм.

Тус баг зургаадугаар сард болсон дэлхийн аваргын дараа бүрэлдэхүүндээ хоёр шинэ тоглогч нэгтгэсэн ч дараагийн гурван томоохон тэмцээнд өндөр амжилт үзүүлж чадаагүй юм.

Үүний улмаас долоодугаар сард дэлхийн чансааны шилдэг 15 багийн тоонд багтаж байсан “The MongolZ” аравдугаар сарын 20-ны байдлаар 54 дүгээр байр хүртэл ухарчээ.

Харин аравдугаар сарын 22-нд Сербийн Белград хотод болсон тэмцээнд түрүүлснээр чансааны 24 дүгээр байр руу дэвшсэн байна.

Үүний дараа Румын улсын Бухарест хотод болсон тэмцээний хэсгийн шатнаас хасагдсан ч дэлхийн чансааны 17 дугаар байрт бичигдэх болсон юм.

Улмаар Бээжингийн тэмцээний финалд шалгарсан амжилтаараа есдүгээр байрт дэвшиж, дэлхийн шилдэг 10 багийн тоонд эргэн оржээ.

Томоохон тэмцээнүүдийн урилга авах боломж нэмэгдэв

Дэлхийн чансаагаа ахиулсан нь “The MongolZ” багийн хувьд ирэх оны эхээр болох олон улсын тэмцээнүүдэд оролцох боломжийг нэмэгдүүлж байна.

Тухайлбал, зарим томоохон тэмцээний урилгын эрхийг дэлхийн чансаанд үндэслэн олгодог тул шилдэг 10-т багтсан нь Монголын багт давуу тал болох юм.

Гэхдээ тэмцээний урилга, чансаа тооцох хугацаа ялгаатай учраас 2027 оны хоёрдугаар сарын тэмцээнүүдэд оролцох эрх нь зохион байгуулагчдын албан ёсны урилгаар баталгаажна.

“The MongolZ”-ыг цаашид арваннэгдүгээр сарын 24-нд Сингапурт эхлэх “PGL Major 2026” дэлхийн аварга шалгаруулах тэмцээн хүлээж байна.