Улсын хэмжээнд 277,000 гаруй хүн улирлын томуугийн вакцинд хамрагджээ

Улирлын томуу, томуу төст өвчний эсрэг дархлаажуулалтад 2026 оны есдүгээр сарын 23-ны байдлаар улсын хэмжээнд зорилтот бүлгийн 277,546 хүн хамрагдсан талаар Эрүүл мэндийн яам мэдээллээ. Дархлаажуулалт орон даяар үргэлжилж байна.

Улаанбаатар хотын хэмжээнд вакцины хамралт 59.9 хувьд хүрчээ. Дүүргүүдээс Сонгинохайрхан 74.4 хувийн хамралтаар тэргүүлж, Хан-Уул дүүрэг 68.4 хувь, Багахангай дүүрэг 59.3 хувьтай байна.

Орон нутагт дархлаажуулалтын дундаж хамралт 49.3 хувьтай байгаа бөгөөд Ховд аймагт 60.8 хувь, Архангайд 59.8 хувь, Орхонд 58.8 хувьд хүрсэн нь бусад аймагтай харьцуулахад өндөр үзүүлэлт болжээ.

Бага насны хүүхдүүдийг вакцинд хамруулах ажил мөн үргэлжилж байна. Насны бүлгээр авч үзвэл 3-6 насны хүүхдийн хамралт 89.9 хувьтай байгаа бол зургаан сараас нэг нас хүртэлх хүүхдийнх 65.5 хувьтай байна. Харин 1-2 насны хүүхдийн хамралт 39.5 хувь буюу эдгээр насны бүлгээс хамгийн бага үзүүлэлттэй байгаа юм.

Томуугийн вирусийн идэвхжил нэмэгдэхээс өмнө хүүхэд болон гэр бүлийн бусад гишүүдээ улирлын томуугийн вакцинд хамруулахыг эрүүл мэндийн байгууллагууд иргэдэд уриаллаа.