"АНУ-д зорчих Монгол иргэдэд виз, цагаачлалын статусаа урьдчилан нягтлах хэрэгтэй"

Сүүлийн үед АНУ-ын олон улсын нисэх буудлуудаар нэвтрэх үед гадаадын иргэдийг нэмэлт шалгалтад хамруулах, зарим тохиолдолд удаан хугацаагаар саатуулах болон хилээр нэвтрүүлэхээс татгалзах тохиолдол гарах болсон тул АНУ-д зорчих Монгол Улсын иргэд виз, цагаачлалын статус болон аяллын зорилготой холбоотой баримт бичгээ урьдчилан нягтлахыг зөвлөжээ.

АНУ-ын Төрийн департаментын мэдээлснээр хүчинтэй виз нь гадаадын иргэнд АНУ-ын хилийн боомт хүртэл зорчиж, тус улсад нэвтрэх хүсэлт гаргах боломж олгодог. Харин хилээр нэвтрүүлэх эцсийн шийдвэрийг АНУ-ын Гааль, хил хамгаалах алба буюу “U.S. Customs and Border Protection” (CBP)-ийн ажилтан тухайн боомт дээр гаргадаг.

Иймээс хүчинтэй паспорт, виз болон шаардлагатай бусад баримт бичигтэй байсан ч зорчигчийг нэмэлт буюу “secondary inspection” шалгалтад шилжүүлж, аяллын зорилго, нэвтрэх нөхцөл болон цагаачлалын мэдээллийг нь нарийвчлан шалгах боломжтой.

Аяллын өмнө паспорт болон визийн хүчинтэй хугацаа, визийн ангилал зорчих зорилготой нийцэж байгаа эсэхийг нягтлах нь чухал. Мөн өмнө нь АНУ-д оршин сууж байсан бол I-94 бүртгэлээр зөвшөөрсөн хугацааг хэтрүүлээгүй эсэхээ шалгах шаардлагатай аж.

Оюутан болон солилцооны хөтөлбөрт хамрагдагчид I-20, DS-2019 зэрэг холбогдох баримт бичгийн хүчинтэй байдлыг шалгаж, АНУ-д байрлах газар, буцах нислэг, сургууль, ажил болон урилгатай холбоотой мэдээллийг шаардлагатай үед тодорхой, үнэн зөв өгөхөд бэлэн байхыг анхааруулжээ.

Өмнө нь визийн нөхцөл зөрчсөн, зөвшөөрөгдсөн хугацаанаас хэтрүүлэн оршин суусан, цагаачлалын статус өөрчлөгдсөн, баривчлагдсан эсвэл эрүүгийн хэрэгт холбогдож байсан бол аяллын өмнө өөрийн нөхцөл байдлыг нарийвчлан нягталж, шаардлагатай тохиолдолд мэргэжлийн зөвлөгөө авах нь зүйтэй гэж холбогдох байгууллагуудаас анхааруулжээ.

Зорчигчийг баримт бичиг болон цагаачлалын асуудлыг тодруулах, хууль тогтоомжийн хэрэгжилтийг шалгах, санамсаргүй сонголт болон бусад үндэслэлээр нэмэлт шалгалтад шилжүүлдэг.

Мөн АНУ-ын хилээр нэвтрэх үед “CBP” тодорхой нөхцөлд гар утас, компьютер зэрэг цахим төхөөрөмжийг шалгах эрхтэй. Тус байгууллага гадаадын иргэнийг хилээр нэвтрүүлэх эсэхийг шийдэхдээ тухайн хүний баримт бичиг, цагаачлалын түүх болон зорчих нөхцөл байдлыг бүхэлд нь харгалзан үздэг.