АНУ-ын газрын 10 жилийн бондын өгөөж 2007 оноос хойших дээд түвшинд ойртлоо

АНУ-ын Засгийн газрын бондын өгөөж баасан гарагийн арилжаагаар бага зэрэг өсөж, Холбооны Нөөцийн банк бодлогын хүүгээ дахин нэмэгдүүлэх хүлээлт хөрөнгө оруулагчдын анхаарлын төвд орлоо.

Пүрэв гарагийн арилжаагаар 2007 оны зургадугаар сараас хойших дээд түвшинд хүрээд байсан Засгийн газрын 10 жилийн хугацаатай бондын өгөөж өнөөдөр нэг орчим суурь нэгжээр нэмэгдэж, 5.17 хувьд хүрлээ.

Мөн өмнөх арилжаагаар 2004 оноос оноос хойших дээд түвшинд ойртоод байсан 30 жилийн хугацаатай бондын өгөөж 5.463 хувийн орчимд тогтвортой байлаа. Харин хоёр жилийн хугацаатай бондын өгөөж төдийлөн өөрчлөлтгүй, 4.899 хувийн түвшинд хадгалагадж байна.

Бондын өгөөж болон ханш эсрэг чиглэлд хөдөлдөг. Нэг суурь нэгж нь 0.01 нэгж хувьтай тэнцэнэ.

Бодлогын хүү өсөх хүлээлт нэмэгджээ

АНУ-ын Засгийн газрын бондын өгөөж өсөхөд Холбооны Нөөцийн банкны удирдлагуудын мөнгөний бодлогын талаарх хатуу байр суурь голлон нөлөөлж байна.

Холбооны Нөөцийн банкны Удирдах зөвлөлийн гишүүн Майкл Барр лхагва гарагт Чикагод хийсэн илтгэлдээ инфляцыг зорилтот түвшинд хүртэл цаг алдалгүй бууруулахын тулд мөнгөний бодлогод цаашид нэмэлт өөрчлөлт хийх шаардлага үүсч магадгүй хэмээн мэдэгдсэн. Тэрбээр эдийн засгийн өсөлт хүчтэй, хөдөлмөрийн зах зээл тогтвортой байгаа ч инфляц хоёр хувийн зорилтоос өндөр хэвээр байгааг онцолжээ.

Үүний зэрэгцээ газрын тосны ханш өндөр хэвээр, худалдан авалтын менежерийн индекс сүүлийн дөрвөн жил гаруйн дээд түвшинд хүрсэн нь инфляц тогтвортой саарах эсэх талаарх эргэлзээг улам нэмэгдүүлж байна.

“CME FedWatch” хэрэгслийн мэдээллээр арилжаанд оролцогчид аравдугаар сард бодлогын хүү нэмэгдэх магадлалыг 71 орчим хувиар үнэлж байна.

Бондын өгөөж дэлхий даяар өсчээ

АНУ-аар хязгаарлагдахгүйгээр дэлхийн томоохон бондын зах зээлд өгөөж өссөн долоо хоног өрнөж байна. Япон, Их Британи, Герман болон Евро бүсийн бусад Засгийн газрын бондын өгөөж түүхэн дээд түвшнээ шинэчилсээр байгаа бол өнөөдрийн байдлаар Евро бүс болон Японы бондын өгөөж ялимгүй буурсан байна.

Нидерландын санхүүгийн “ING” банкны Америк тивийн судалгааны албаны тэргүүн Падрейг Гарви болон хүүгийн стратегич Бенжамин Шрёдер нар ын үзэж буйгаар бодлогын хүү дахин өсөхтэй холбоотой эрсдэлийн нэлээд хэсгийг зах зээл хэдийн үнэлгээндээ тусгажээ. Гэхдээ Засгийн газрын өрийн нийлүүлэлттэй холбоотой хүчин зүйлс бондын өгөөжийг өндөр түвшинд хадгалах боломжтойг нэмж тэмдэглэсэн байна.

Хөрөнгө оруулагчид баасан гарагт нийтлэгдэх Мичиганы их сургуулийн хэрэглэгчийн итгэлийн индекс болон удаан эдэлгээтэй барааны захиалгын мэдээллийг анхааралтай хүлээж буй. Эдгээр үзүүлэлт эдийн засгийн эрэлт болон инфляцын төлөвийг дахин үнэлэхэд зах зээлд шинэ дохио болох юм.