АНУ-ын сонгогчдын 75 хувь нь эдийн засгийн нөхцөл байдалд сэтгэл дундуур байна

АНУ-ын 2026 оны завсрын сонгуулийн үеэр явуулсан санал асуулгаар эдийн засгийн нөхцөл байдал болон ардчиллын төлөв байдал сонгогчдын хамгийн их анхаарч буй хоёр асуудал болжээ. Судалгаанд оролцогчдын 39 хувь нь эдийн засгийг хамгийн чухал асуудал гэж нэрлэсэн бол 32 хувь нь ардчиллыг нэгдүгээрт эрэмбэлсэн байна. Харин цагаачлалын асуудлыг 14 хувь нь хамгийн чухалд тооцжээ. Энэхүү судалгааг “SSRS” компани хэвлэл мэдээллийн байгууллагуудын консорциумын захиалгаар явуулсан бөгөөд 79,000 гаруй хүнийг хамруулжээ. Судалгаанд сонгуулийн өмнөх үеийн санал асуулгаас гадна урьдчилан болон сонгуулийн өдөр саналаа өгсөн иргэдийн хариултыг багтаасан байна. Судалгааны дүнгээр сонгогчдын 75 хувь нь АНУ-ын эдийн засгийн өнөөгийн нөхцөл байдлыг тааруу эсвэл муу гэж үнэлсэн бол ердөө 25 хувь нь сайн эсвэл маш сайн гэж хариулжээ. Харин өрхийн санхүүгийн байдлын тухайд оролцогчдын 44 хувь нь хоёр өмнөх оноос дордсон, 38 хувь нь өөрчлөгдөөгүй, 18 хувь нь сайжирсан гэж үзсэн байна.

Сонгогчдын 65 хувь нь Д.Трампын бодлого эдийн засгийг дордуулсан гэж үзжээ Үүний зэрэгцээ АНУ-ын Ерөнхийлөгч Дональд Трампын эдийн засгийн бодлогын талаарх үнэлгээ мөн сөрөг гарчээ. Судалгаанд оролцогчдын 65 хувь нь түүний бодлого АНУ-ын эдийн засгийн нөхцөл байдлыг дордуулсан гэж үзсэн бол 28 хувь нь сайжруулсан, 8 хувь нь нөлөө үзүүлээгүй гэж хариулсан байна. Завсрын сонгуульд санал өгөх шийдвэрт Трампын талаарх байр суурь хэрхэн нөлөөлснийг тодруулахад 43 хувь нь түүнийг эсэргүүцэж буйгаа илэрхийлэх нь санал өгөх нэг шалтгаан болсон гэжээ. Харин 16 хувь нь Трампыг дэмжихийн тулд санал өгсөн бол 41 хувь нь түүнийг санал өгөх шийдвэртээ нөлөөлөх хүчин зүйл гэж үзээгүй байна. Улс орны ерөнхий нөхцөл байдлын тухайд оролцогчдын 38 хувь нь уур бухимдалтай, 37 хувь нь сэтгэл дундуур байгаагаа илэрхийлжээ. Харин 18 хувь нь сэтгэл хангалуун, 7 хувь нь өөдрөг, урам зоригтой байгаагаа илэрхийлсэн байна. Түүнчлэн сонгогчдын 90 хувь нь төрийн авлигын асуудлыг санал өгөхөд нь шийдвэрлэх эсвэл томоохон нөлөө үзүүлсэн хүчин зүйл гэж нэрлэжээ.

Инфляц сонгогчдын өрхийн санхүүд хүндрэл учруулжээ Үнийн өсөлт Америкийн сонгогчдын өдөр тутмын амьдралд томоохон асуудал хэвээр байгааг судалгаа харууллаа. Оролцогчдын 79 хувь нь сүүлийн нэг жилийн хугацаанд инфляцын улмаас өөрсдөө болон гэр бүлийнхэн нь ноцтой эсвэл дунд зэргийн хүндрэлтэй тулгарсан гэж хариулжээ. Харин 21 хувь нь хүндрэл учраагүй гэж үзсэн байна. Тодруулбал, сонгогчдын 59 хувь нь бензин, дизель түлшний үнэ, 58 хувь нь хүнсний бүтээгдэхүүн болон өдөр тутмын хэрэглээний барааны үнэд ихээхэн санаа зовниж байгаагаа илэрхийлсэн байна. Үнийн өсөлтийн шалтгааны тухайд оролцогчдын 62 хувь нь ердийнхөөс өндөр байгаа үнийн түвшинг Трампын бодлоготой илүүтэй холбон тайлбарласан бол 38 хувь нь Ерөнхийлөгчийн хяналтаас гадуурх хүчин зүйлсээс шалтгаалсан гэж үзжээ.

Сонгогчдын 62 хувь нь Ираны эсрэг цэргийн ажиллагааг буруу шийдвэр хэмээв Гадаад бодлого, тэр дундаа Ираны эсрэг явуулсан цэргийн ажиллагаа мөн завсрын сонгуулийн чухал асуудлуудын нэг болжээ. Санал асуулгад оролцогчдын 62 хувь нь АНУ Ираны эсрэг цэргийн ажиллагаа явуулах шийдвэр гаргасан нь буруу гэж үзсэн бол 38 хувь нь зөв шийдвэр байсан гэж хариулсан байна. Түүнчлэн сонгогчдын 74 хувь нь уг мөргөлдөөн Конгрессын сонгуульд саналаа өгөхөд шийдвэрлэх эсвэл томоохон нөлөө үзүүлсэн гэжээ. Харин үлдсэн 26 хувь нь бага нөлөөтэй эсвэл огт нөлөөгүй гэж хариулсан байна.