Хурал дээр бусдад үг хэлэх боломж олгодоггүй хүнтэй “эвтэйхэн” харилцах таван арга

Ажлын хурал дээр бусдыг үг хэлүүлэхгүй, үргэлж өөрөө ярьдаг хүн байдаг. Тийм хүнтэй таарахаар яриаг нь таслах эвгүй, харин дуугүй суугаад байвал өөрийн санааг хэлж амжихгүй өнгөрөх нь бий. Гэхдээ заавал маргалдаж, нэгнийхээ үгийг булаацалдах шаардлагагүй. “Google”, “Microsoft” зэрэг компанид зөвлөхөөр ажиллаж байсан харилцааны стратегич Дори Кларк ийм нөхцөлд ашиглаж болох таван энгийн аргыг санал болгожээ.

1. Яриаг нь эелдгээр тасалж болно Зарим хүн ярьж эхэлсэн л бол зогсохгүй. Яриагаа дуусгахыг нь хүлээсээр байтал өөрийн санааг хэлэх боломж гарахгүй байх тохиолдол бий. Ийм үед “Сонирхолтой санаа байна. Үүн дээр нэг зүйл нэмээд хэлчих үү?” гэх мэтээр эелдгээр ярианд оролцож болно. Гол нь нөгөө хүнд эвгүй мэдрэмж төрүүлэлгүйгээр өөрийн хэлэх гэсэн санааг ойлгуулах юм.

2. Өөр хүнээс санал асуу Нэг хүн хэт удаан яриад байвал бусад оролцогчийг ярианд татан оролцуулж болно. Тухайлбал, “Чиний хэлсэн санаа сонирхолтой юм. Харин Бат энэ талаар юу гэж бодож байна?” гэж асуухад хангалттай. Ингэснээр тухайн хүний яриаг эвтэйхэн зогсоож, бусдад ч санаа бодлоо хуваалцах боломж олгоно.

3. Хэт их ярьж байгааг нь хэл Байнга бусдын яриаг давамгайлдаг хүмүүс өөрсдийгөө тийм байгааг анзаардаггүй ч байж болно. Тиймээс нэг удаа эвтэйхэн хэлээд үзэхэд гэмгүй. Тухайлбал, “Чи хурал дээр их гоё санаанууд хэлдэг ч бусаддаа боломж олгоцгооё” гэж хэлж болно. Ингэхдээ олны өмнө шүүмжлэхийн оронд тусад нь ярилцах нь илүү тохиромжтой.

4. Хоорондоо дохио тохиролц Хэрэв тухайн хүн өөрийгөө хэт их ярьдгаа ойлгож, засахыг хүсэж байвал хоорондоо жижигхэн дохио тохиролцож болно. Тухайлбал, хурал дээр хэт удаан ярьж, сунжирч эхэлбэл гараараа дохио өгөх, эсвэл хувь чатаар сануулж болох юм. Ингэснээр тухайн хүн өөрийн ярианы хэв маягийг анзаарч, цаашдаа бусдад үг хэлэх боломж олгож сурахад дөхөм болно.

5. Шаардлагатай бол удирдлагатайгаа ярилц Хэд хэдэн удаа хэлсэн ч өөрчлөгдөхгүй, эсвэл тухайн хүнтэй шууд ярилцахад хэцүү байвал удирдлагаасаа тусламж хүсэж болно. Гэхдээ заавал хэн нэгнийг нэрлэж, гомдол гаргах шаардлагагүй. Харин “Хурал дээр хүн бүр санал бодлоо хэлэх боломжтой байвал зүгээр юм. Үүнийг яаж зохицуулж болох вэ?” гэж санал тавьж болно. Ингэснээр нэг хүнийг буруутгахгүйгээр хурлын уур амьсгалыг сайжруулах боломжтой. Дори Кларкийн тайлбарласнаар, хэт их ярьдаг хүн бүр бусдыг үл тоомсорлох гэсэндээ ийм үйлдэл гаргадаггүй аж. Зарим нь зүгээр л өөрийгөө бусдад үг хэлэх боломж олгохгүй байгааг анзаардаггүй. Гэхдээ ийм байдал удаан үргэлжилбэл бусдын дургүйцлийг төрүүлж, багийн хамтын ажиллагаанд сөргөөр нөлөөлж болзошгүй юм.