"Bitget" кибер халдлагаар алдагдсан хөрөнгөөс $1.1 саяыг нь царцаажээ

Криптовалютын “Bitget” бирж өнгөрсөн долоо хоногийн кибер халдлагаар алдагдсан хөрөнгөөс ойролцоогоор 1.1 сая ам.долларыг царцаажээ. Гэхдээ уг хөрөнгө биржид бодитоор буцаан шилжсэн эсэх нь одоогоор тодорхойгүй байна.

Халдлагын улмаас бараг 388 сая ам.долларын хохирол учирсан гэх мэдээлэлтэй харьцуулахад царцаасан хөрөнгө нийт дүнгийн багахан хэсгийг эзэлж байгааг шинжээчид онцоллоо. “Bitget”-ийн гүйцэтгэх захирал Грэйси Чэнь алдагдсан хөрөнгийн томоохон хэсгийг эргүүлэн авах боломжид төдийлөн найдахгүй байгаагаа хэлжээ.

Хэрэглэгчдийн дансны үлдэгдэлд нөлөөлөөгүй гэж үнэн үү?

“Bitget”-ийн хамгаалалтын сан нь хэрэглэгчийн хөрөнгийг баталгаажуулах нөөцөөс тусдаа байдаг аж.

Тус компани хамгаалалтын сангаа өөрийн хөрөнгөөр дахин бүрдүүлж хэмжээгээ блокчэйнээр дамжуулан олон нийт шалгах боломжтой хэвээр үлдээсэн байна.

“Санхүүгийн цохилтыг Bitget өөрөө шингээж байгаа болохоос хэрэглэгчдэдээ үүрүүлээгүй” гэж Г.Чэнь онцолжээ.

Тус бирж есдүгээр сарын 29-ний Нөөцийн нотолгооны тайландаа нийт нөөцийн харьцаа 131 хувьтай, тайланд хамруулсан 19 крипто хөрөнгө тус бүр 100 хувиас дээш баталгаажсан гэж мэдээлсэн байна.

Гэхдээ халдлага яг ямар замаар өрнөсөн, хамгаалалтын системийн аль хэсэг эвдэгдсэн талаар бүрэн мэдээлэл гараагүй байна.

Гуравдагч талын хамгаалалтын системийг ашигласан байж болзошгүй

“Google Cloud”-ийн кибер аюулгүй байдлын “Mandiant” болон блокчэйн аюулгүй байдлын “SlowMist” компанийн есдүгээр сарын 30-ны тайлангуудад халдагчид гуравдагч талын хоёр хамгаалалтын бүтээгдэхүүний эмзэг байдлыг ашигласан байж болзошгүй гэж дурдсан байна.

“SlowMist” хамгийн эрт илэрсэн сэжигтэй ажиллагааг наймдугаар сарын 31-нээс мөрдөж, тухайн үед өмнө нь илрээгүй буюу эмзэг байдлыг ашигласан байж болзошгүй гэж үзжээ.

“Mandiant”-ийн дүгнэлтээр цахим халдагчид хувийн түлхүүр үг хулгайлахгүйгээр систем дотор өндөр түвшний хандалтын эрх авч, хөрөнгө татан авах ердийн үйл ажиллагааг тойрсон байж болзошгүй гэж үзэж байна.

Халдлага БНАСАУ-тай холбоотой гэж тайлангуудаар тогтоогоогүй ч Чэнь өмнө нь техникийн эхний шинж тэмдгүүд БНАСАУ-ын хакерын бүлгүүдийн ашигладаг арга барилтай төстэй байгааг хэлж байжээ.

Татан авалтыг үе шаттай сэргээж байна

Халдлагын дараа хязгаарласан зарим үйлчилгээг “Bitget” үе шаттай сэргээж эхэлсэн байна. Биткойн, эфир болон USDT-ийн татан авалтыг дахин нээсэн бол бусад криптовалютын татан авалт, фиат валют болон хэрэглэгч хоорондын үйлчилгээг баасан гарагт сэргээхээр төлөвлөжээ.

Чэнийн хэлснээр халдагчдын ашигласан арга нарийвчлалтай үйл ажиллагаа байсан бөгөөд хөрөнгийг шилжүүлсний дараа мөрөө арилгасан нь алдагдсан хөрөнгийг буцаан авахад хүндрэл учруулж байна.

Одоогоор царцаасан 1.1 сая ам.доллар нийт мэдээлэгдсэн хохирлын багахан хэсгийг эзэлж байгаа тул хөрөнгийн хэдий хэмжээ нь бодитоор эргэн ирэх нь тодорхойгүй байна. Халдлагын дараах үйл явдал криптовалютын биржүүд хэрэглэгчдийн хөрөнгийг хэрхэн тусгаарлан хамгаалдаг, нөөц болон хамгаалалтын сангаа хэр ил тод баталгаажуулдаг асуудлыг дахин анхаарлын төвд орууллаа.