БНХАУ-д зорчих гэж байна уу: Ачаа тээш болон бичиг баримтаа нягтлахыг зөвлөв

Гадаад харилцааны яамны Консулын газар БНХАУ-д зорчих монгол иргэдэд аюулгүй байдлын сэрэмжлүүлэг хүргэж, хилээр нэвтрэх болон аяллын үеэр ачаа тээш, бичиг баримт, мөнгө санхүүтэй холбоотой эрсдэлээс урьдчилан сэргийлэхийг зөвлөлөө.

Тус байгууллагаас БНХАУ дахь Монгол Улсын Дипломат төлөөлөгчийн газраас гаргаж буй сэрэмжлүүлэг, зөвлөмжийг аяллын хугацаанд тухай бүр дагаж мөрдөхийг мөн сануулсан байна.

Нисэх буудал болон хилээр нэвтрэх үед ачаа солигдох, алдах эрсдэлээс сэргийлэхийн тулд тээшин дээрээ нэр, утасны дугаар, хаягаа тодорхой бичихийг зөвлөжээ. Мөн танихгүй хүний эд зүйл, ачааг авч явахгүй байх, гар цүнх болон тээшээ өөрөө шалгаж, хяналтаасаа гаргахгүй байхыг анхааруулсан байна.

Хилээр хар тамхи, мансууруулах бодис, галт зэвсэг, ангийн сум, түүх дурсгал болон соёлын үнэт зүйл оруулахыг хориглодог. Ийм төрлийн эд зүйл бусдын ачаатай андуурагдах эсвэл мэдэлгүй тээшинд орсон тохиолдолд хууль эрх зүйн ноцтой асуудал үүсэх эрсдэлтэй тул хил нэвтрэхээс өмнө ачаагаа сайтар шалгах шаардлагатайг Консулын газар онцолжээ.

Түүнчлэн хил нэвтрэх болон гаалийн мэдүүлгийн хуудсыг урьдчилан бөглөж бэлдэх, хязгаарлалттай бараа бүтээгдэхүүний зөвшөөрөгдсөн хэмжээг шалгахыг зөвлөсөн байна. Зөвшөөрсөн хэмжээнээс хэтэрсэн бараанд татвар, хураамж ногдуулж болзошгүй тул зорчигчид авч яваа бүтээгдэхүүнийхээ тоо хэмжээ, нөхцөл шаардлагыг урьдчилан нягтлах шаардлагатай.

Мөн гадаад паспортын хүчинтэй хугацааг тогтмол шалгаж, хугацаа дуусахаас өмнө шинээр авахыг сануулжээ. Паспорт, иргэний үнэмлэх зэрэг баримт бичгийг бусдад ашиглуулах, худалдах, барьцаалах болон хуурамчаар үйлдэхийг хориглодог.

Консулын газраас шаардлагагүй үед бичиг баримтын эх хувийг биедээ авч явахгүй, харин хуулбар болон зургийг гар утас, цахим шуудандаа хадгалахыг зөвлөсөн байна.

Хэрэв паспорт болон бусад баримт бичгээ гээсэн бол орон нутгийн цагдаагийн байгууллагад нэн даруй мэдэгдэж, тодорхойлолт авсны дараа БНХАУ дахь Монгол Улсын Дипломат төлөөлөгчийн газарт хандах шаардлагатай.

Олон нийтийн сүлжээгээр танихгүй хүмүүстэй харилцахдаа болгоомжтой байх, баталгаагүй этгээдтэй мөнгө санхүүгийн асуудлаар харилцахгүй байхыг дахин анхааруулжээ.