Citi Wealth-ийн судалгаа: Өрхийн оффисууд инфляцаас сэрэмжилж байгаа ч өсөлтийн эрэл хайгуул хэвээр

Citi Wealth-ийн шинэхэн тайлангаар өрхийн оффисуудын хувьд инфляц гол түгшүүр хэвээр байгааг онцолжээ. Жилийн судалгаанд хамрагдсан 351 байгууллагын 63 хувь инфляцыг хамгийн том эрсдэл гэж нэрлэсэн байна. Энэхүү судалгааг зургадугаар болон долдугаар сард явуулсан бөгөөд бусад эрсдэлээс илүүтэйгээр үнийн өсөлтийн орчин хөрөнгө оруулалтын шийдвэрийг тодорхойлж буйг тайланд тэмдэглэжээ.

Гэхдээ инфляц, зах зээлийн тогтворгүй байдлын айдас нь тэднийг өсөлтийн боломж хайхаас нь болиулаагүй дүр зураг харагдана. Сүүлийн 12 сарын хугацаанд тогтмол орлогот хөрөнгөд хийх нийт хуваарилалт ерөнхийдөө тогтвортой хэвээр байсан ч бууруулсан нь нэмэгдүүлснээс цэвэр дүнгээр 3 хувь илүү байжээ. Үүний зэрэгцээ нийтийн арилжааны хувьцааны эзлэх хувийг цэвэр дүнгээр 34 хувь нь нэмэгдүүлсэн бөгөөд 42 хувь нь өөрчлөөгүй гэж хариулсан байна.

Хувийн хөрөнгө оруулалт болон бэлэн мөнгө рүү цэвэр дүнгээр тус бүр 15 хувь нь нэмэлт хөрөнгө шилжүүлсэн нь тодорхойгүй орчинд “хатуу” хамгаалалт, “урт” өсөлт хоёрыг зэрэгцүүлэх оролдлого гэж Citi Wealth тайлбарласан байна. Ирэх 12 сард дэлхийн хөгжингүй зах зээлийн хувьцаанд өртөлтөө цэвэр дүнгээр бараг гуравны нэг нь нэмэгдүүлэхээр төлөвлөсөн бол хувийн хөрөнгө оруулалтад шууд болон сангаар дамжуулан хуваарилалтаа өсгөхөө цэвэр дүнгээр 10 хувь нь төлөвлөжээ. Харин хувийн зээл дээр хамгийн болгоомжтой байр суурь ажиглагдаж, ирэх 12 сард цэвэр дүнгээр 12 хувь нь бууруулахаар төлөвлөсөн байна.

Бусад ангиллуудад хандлага жигд бус байна. Хөгжиж буй зах зээлийн тогтмол орлогот хөрөнгө, бэлэн мөнгөнд дундаж хандлага сөрөг ч бууруулах ялгаа ердөө 6 хувь байв. Түүхий эдэд илүү хөрөнгө оруулахыг 11 хувь нь хэлсэн ч цэвэр дүнгээр 3 хувьтай тэнцсэн нь бодит нэмэгдэл хязгаарлагдмал байгааг харуулна.

Бүсчилсэн зураглалаар Хойд Америкт үл хөдлөх хөрөнгөнд сонирхол хамгийн өндөр гарчээ. Хойд Америкийн өрхийн оффисуудын 37 хувь нь үл хөдлөх хөрөнгөд илүү хуваарилахаар төлөвлөсөн гэж тайланд дурдсан бол судалгаанд хамрагдагсдын нийт дундажтай харьцуулахад энэ үзүүлэлт 25 хувь байна. Citi Wealth-ийн Александр Моннье Хойд Америкийн өрхийн оффисууд шууд эзэмшлийн үл хөдлөх хөрөнгө, шууд хувийн хөрөнгө оруулалтын дундаж хуваарилалтаараа хамгийн өндөр байгааг онцолжээ.

Тайланд инфляц болон зах зээлийн тогтворгүй байдлын айдас шууд хөрөнгө оруулалтын сонирхлыг сааруулаагүй гэж тэмдэглэсэн нь анхаарал татна. Өрхийн оффисуудын 40 хувь нь шууд хөрөнгө оруулалтын идэвхээ ямар нэг хэмжээгээр нэмэгдүүлэхээр зорьж байгаа бол зөвхөн 11 хувь нь бага зэрэг бууруулах эсвэл түр зогсоохоор төлөвлөсөн байна. Моннье мөн “Өрхийн оффисууд улам нарийн төвөгтэй болж, тодорхойгүй үед ухрахын оронд хөрөнгө оруулалтаа хадгалах идэвхтэй эрсдэлийн удирдлагыг илүүд үздэг болсон гэж би бодож байна” хэмээн хэлээд, “Дарааг үеийнхэн цаасан багцын оронд шууд хөрөнгө оруулалт, бодит биет хөрөнгөнд илүү татагдаж байна” гэж нэмжээ. “Хедж сан бол тайлан дээрх нэг мөр байж мэднэ, харин бизнес эсвэл үл хөдлөх хөрөнгө эзэмшвэл юуг эзэмшиж байгаагаа илүү ойлгож, мэдрэх боломжтой” гэсэн байр суурь нь энэ шилжилтийг илүү тодотгож байна.