Д.Трамп хиймэл оюуны зэвсэгт хүчин байгуулж, тэргүүнийг нь томилохоор төлөвлөж байна

АНУ-ын Ерөнхийлөгч Дональд Трамп хиймэл оюуны салбарт хяналт тавих шинэ “AI Force” буюу "Хиймэл оюуны зэвсэгт хүчин" байгуулж, тус салбарын бодлогыг хариуцах шинэ зөвлөх томилохоор төлөвлөж байгаагаа “Truth Social” платформд бямба гарагт мэдэгдлээ. Гэхдээ шинэ бүтэц хэрхэн ажиллах, цэргийн эсвэл иргэний байгууллага байх эсэх талаар дэлгэрэнгүй мэдээлэл өгөөгүй байна.

Трамп “AI Force”-ийг анхны бүрэн эрхийн хугацаандаа байгуулсан АНУ-ын Зэвсэгт хүчний салбар болох “Space Force”-тэй зүйрлэсэн ч хиймэл оюуны шинэ бүтэц батлан хамгаалах салбарт харьяалагдах эсэх нь тодорхойгүй. “Washington Post”-ын мэдээлснээр Цагаан ордон энэ талаар тайлбар өгөөгүй байна.

Трампын мэдэгдэл хиймэл оюуны хурдацтай хөгжилтэй холбоотой эрсдэлийг хэрхэн зохицуулах талаар Вашингтон болон технологийн салбарт хэлэлцүүлэг өргөжиж буй үед гарлаа.

Тэрбээр шинэ зохицуулалт нэмж бий болгохын оронд одоо мөрдөгдөж буй эрүүгийн болон иргэний хууль тогтоомжийг ашиглан хиймэл оюуны хууль бус хэрэглээг хянах боломжтой гэж үзэж буйгаа илэрхийлжээ.

Трамп энэ талаар “Бид энэхүү гайхалтай салбарын өсөлтийг ямар нэг байдлаар сааруулахгүй, боомилохгүй" гэдгийг онцолж, "Харин хөгжихөд нь дэмжлэг үзүүлж, анхаарал тавина” гэж мэдэгдсэн байна. Тэрбээр хиймэл оюуны сөрөг хэрэглээг одоо байгаа эрүүгийн болон иргэний эрх зүйн тогтолцоогоор зохицуулах боломжтой гэж нэмжээ.

Технологийн салбарын зарим удирдлага, судлаачид илүү хүчирхэг хиймэл оюуны систем хөгжихийн хэрээр аюулгүй байдлын нэмэлт арга хэмжээ шаардлагатай гэж үзэж байна.

Хиймэл оюуны “Anthropic” компанийн судлаачаар ажиллаж байсан Жэйкоб Коксон энэ сарын эхээр ажлаасаа гарахдаа хиймэл оюун хөгжүүлэгчдийн дунд технологийн урт хугацааны эрсдэлийн талаар ноцтой болгоомжлол байдгийг онцолжээ.

Харин Трамп хиймэл оюуны хөгжлийг удаашруулах, холбооны түвшинд нэмэлт зохицуулалт бий болгох саналуудыг дэмжихгүй байгаагаа илэрхийлсээр ирсэн. Тэрбээр хиймэл оюуныг дараагийн томоохон аж үйлдвэрийн өөрчлөлт хэмээн тодорхойлж, АНУ БНХАУ-аас технологийн давуу байдлаа хадгалах шаардлагатай гэж мэдэгдсэн байна.

Трамп мөн ойрын хугацаанд “AI czar” буюу хиймэл оюуны бодлогын шинэ зөвлөхөө зарлана гэжээ. Венчур хөрөнгө оруулагч Дэвид Сакс өмнө нь Трампын хиймэл оюун болон криптовалютын бодлогын зөвлөхөөр ажиллаж байсан бөгөөд одоо Ерөнхийлөгчийн Шинжлэх ухаан, технологийн зөвлөхүүдийн зөвлөлийн хамтарсан даргаар ажиллаж байна.

Трампын мэдэгдэл АНУ, БНХАУ хиймэл оюуны аюулгүй байдлыг эдийн засаг, худалдааны яриа хэлэлцээний нэг хэсэг болгон авч үзэж эхэлсэн үетэй давхцав.

АНУ-ын Сангийн сайд Скотт Бессент, БНХАУ-ын Төрийн зөвлөлийн Ерөнхий сайдын орлогч Хэ Лифэн нар есдүгээр сарын 20-нд Нью-Йорк дахь “JPMorgan Chase”-ийн төв байранд уулзаж, хиймэл оюун, худалдаа болон стратегийн ач холбогдолтой ашигт малтмалын асуудлаар хэлэлцээ хийжээ. АНУ-ын Худалдааны төлөөлөгч Жеймисон Грир мөн уулзалтад оролцсон байна.

Хоёр улсын хиймэл оюуны хэлэлцээ нь хүчирхэг системүүдээс үүдэж болох нийтлэг эрсдэлийг бууруулах боломжид төвлөрч байгаа бөгөөд Бессент АНУ энэ чиглэлээр БНХАУ-тай ярилцахад нээлттэй байгааг өмнө нь мэдэгдсэн юм.