Дугаарын хязгаарлалтад орсон жолооч нарын зам ашигласны төлбөрийг 19,180 хүртэл төгрөгөөр хөнгөлөх эсэхийг хэлэлцэнэ

НИТХ-ын ээлжит хуралдаанаар хэлэлцэх 19 асуудлын нэг нь авто машины улсын дугаарын тэгш, сондгой хязгаарлалтад хамрагдсан иргэн, аж ахуйн нэгжийн авто зам ашигласны төлбөрийг хөнгөлөх асуудал юм.

Нийслэлийн Засаг дарга Б.Пүрэвдагва COP17 олон улсын хурал болон хичээлийн шинэ жилийн бэлтгэлтэй холбоотойгоор 14 хоног тээврийн хэрэгслийн улсын дугаарын тэгш, сондгой хязгаарлалтад хамрагдсан иргэд, аж ахуйн нэгжийн ирэх оны авто зам ашигласны төлбөрөөс хөнгөлөхөө мэдэгдсэн.

Үүний дагуу боловсруулсан тогтоолын төсөлд тээврийн хэрэгслийн ангиллаас хамааран 14 хоногийн хязгаарлалтад ногдох төлбөрийг 3,836–19,180 төгрөгөөр тооцож, 2027 оны төлбөрөөс хасахаар тусгажээ.

14 хоногийн хөнгөлөлтөд 4.2 тэрбум төгрөг тооцжээ

Нийслэлийн хэмжээнд өнгөрсөн есдүгээр сарын 1-ний байдлаар 744,246 тээврийн хэрэгсэл бүртгэлтэй байгаагаас 720,122 нь улсын дугаарын хязгаарлалтад хамрагдах тооцоотой байна.

Тогтоолын төсөлд тусгаснаар авто зам ашигласны төлбөрийн хөнгөлөлтийн нийт дүнг нэг хоногт 300.8 сая төгрөг, 14 хоногт 4.21 тэрбум төгрөгөөр тооцжээ.

Харин 30 хоногийн хугацаагаар тооцвол нийт хөнгөлөлт 9.02 тэрбум төгрөгт хүрэхээр байна.

Иргэд тээврийн хэрэгслийн ангиллаас хамааран нэг хоногт 274–1,370 төгрөг, 14 хоногт 3,836–19,180 төгрөг, 30 хоногт 8,220–41,100 төгрөгийн хөнгөлөлт эдлэхээр тооцсон байна.

Зарим тээврийн хэрэгсэлд хөнгөлөлт үйлчлэхгүй

Тогтоолын төсөлд дурдсанаар дипломат байгууллагын тээврийн хэрэгсэл, тусгай дуут болон гэрлэн дохио ашиглах зөвшөөрөлтэй автомашин, байлдааны болон тусгай зориулалтын тээврийн хэрэгсэлд уг хөнгөлөлт хамаарахгүй.

Мөн тусгай таних тэмдэг бүхий автомашин, нийтийн тээвэр, хүүхэд болон ажилчдын автобусыг хөнгөлөлтөд хамруулахгүй байхаар тусгажээ.

Эдгээр тээврийн хэрэгсэл нь дугаарын хязгаарлалтаас чөлөөлөгдөх зохицуулалттай холбоотойгоор хөнгөлөлтийн тооцоонд ороогүй байна. Тогтоолын төсөлд уг арга хэмжээг иргэн, аж ахуйн нэгжийн төлсөн авто зам ашигласны төлбөрийг хөнгөлөх санхүүгийн зохицуулалт гэж тодорхойлжээ. Нийслэлд өнгөрсөн оны нэгдүгээр сарын 1-нээс мөрдөж буй тарифаар 2,000 шоо сантиметр хүртэл хөдөлгүүртэй суудлын автомашины авто зам ашигласны жилийн төлбөр 100 мянган төгрөг, 2,001–3,000 шоо сантиметр хөдөлгүүртэй автомашиных 150 мянган төгрөг байхаар тусгажээ.

Харин 3,001–4,000 шоо сантиметр хөдөлгүүртэй автомашины жилийн төлбөр 200 мянга, 4,001 шоо сантиметрээс дээш хөдөлгүүртэй автомашиных 250 мянган төгрөгөөр тогтоосон байдаг.