Өдөр тутмын жижиг шийдвэрээ өөрөө гаргадаг ахмадууд сэтгэл санаа хангалуун амьдардаг
Германы “Фридрих Шиллерийн их сургууль”-ийн судлаачид нас ахих үед гарах өөрчлөлтийг хүн хэрхэн хүлээж авах нь "өөрөө бие даан шийдвэр гаргах чадвартай" гэх итгэлээс шууд хамаардгийг тогтоожээ.
Өглөө сэрэхэд нуруу хөших, эсвэл бороо орохоор үе мөч янгинах үед бид "За даа, хөгширч байгаа нь энэ дээ" гэж бодох нь бий. Гэтэл бодит байдал дээр ахмад настнуудын ихэнх нь амьдралдаа тун сэтгэл хангалуун байдаг аж. Тэгвэл яагаад тэд бэрхшээл тулгарсан ч эерэг хандлагаа хадгалж чаддаг вэ хэмээх асуултад Германы судлаачид хариулт олжээ.
Мариа Вирт тэргүүтэй “Фридрих Шиллерийн их сургууль”-ийн судалгааны баг 2026 онд дундаж нас нь 65-тай 268 ахмад настныг хоёр долоо хоногийн турш өдөр бүр судалсан байна. Оролцогчид тухайн өдөр өөрийгөө хэр аз жаргалтай байгаа болон өдөр тутмын ажил, үйл ажиллагаандаа хэр зэрэг нөлөөлж чадсанаа үнэлжээ.
Хяналтаа алдсан мэт санагдах үед л сэтгэлээр унадаг
Судалгааны дүнгээр амьдралаа гартаа авч, өөрөө шийдэж чадаж байна гэж мэдрэх нь аз жаргалыг тодорхойлох хамгийн гол хүчин зүйл байв. Өөрөөр хэлбэл, өвдөг тань өвдөж байсан ч "би сунгалт, иог хийгээд гайгүй болчихно" гэж бодоод хөдөлж чадвал сэтгэл санаа өөдрөг хэвээр үлддэг. Харин ямар ч аргагүй, миний мэдлээс гарчихлаа гэж бодож эхэлсэн өдрүүдэд насжилтын сөрөг өөрчлөлтүүд хүнийг шууд гутранги болгодог байна.
Хэвшмэл ойлголтод автахгүй байх нь чухал
Хэвлэл мэдээлэл, зар сурталчилгаанд хөгшрөлтийг зөвхөн чадвараа алдах, арчаагүй болох мэтээр харуулдаг хэвшмэл ойлголтууд хүний урам зоригийг мохоож, "надаас юу ч шалтгаалахгүй" гэсэн бодолд хүргэдэг аюултайг судлаачид анхааруулжээ. Мэдээж нас ахих тусам бие махбод хуучин шигээ байхаа больдог ч түүнд бууж өгөх үү, эсвэл өөрийнхөөрөө зохицуулаад авч явах уу гэдэг нь хувь хүний хандлагаас шууд шалтгаална.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
