Eli Lilly-ийн туршилтын хосолсон эмчилгээ таргалалт, 2-р хэлбэрийн чихрийн шижинтэй өвчтөнд илүү үр дүн үзүүлж, дараагийн шат руу дөхөв

Eli Lilly таргалалт болон 2-р хэлбэрийн чихрийн шижинтэй өвчтөнүүдэд хийсэн дунд шатны туршилтаар хосолсон дэглэм нь зөвхөн өндөр тунгийн тирзепатидээс илүү жин хасуулсан гэж Лхагва гарагт мэдэгдэв. Тус компани 48 долоо хоногийн 2-р үе шатны үр дүнгээ танилцуулж, хамгийн өндөр тунтай хослол хэрэглэсэн хүмүүс дунджаар жингийнхээ 23.3%-ийг буюу ойролцоогоор 54 фунт хассан гэж мэдээллээ. Энэ нь одоо зах зээл дээрх таргалалтын Zepbound, чихрийн шижингийн Mounjaro тарилгад ашиглагддаг идэвхтэй найрлага тирзепатидын бие даасан хэрэглээнээс илүү өндөр үзүүлэлт болж байна.

Хос эмчилгээ нь Lilly-ийн туршилтын eloralintide (амилин дааврыг чиглэнэ) болон тирзепатидын бага тунг нэгтгэсэн бүтэцтэй. 9 миллиграмм eloralintide болон 15 миллиграмм тирзепатидын хослолтой энэ дэглэм нь зөвхөн 15 миллиграмм тирзепатид хэрэглэсэн бүлгийн 14.8% буюу 34.4 фунтын дундаж жин хасалтаас давжээ. Eloralintide-ийг дангаар нь хэрэглэсэн өвчтөнүүд хамгийн ихдээ 12.3% буюу 28.6 фунт жин бууруулсан гэж Lilly мэдээлсэн байна. Үр дүнг Италийн Милан хотод болсон Чихрийн шижинг судлах Европын холбооны чуулганд танилцуулжээ.

Цусан дахь сахарын гол үзүүлэлт болох A1C дээр ч ялгаа гарсан байна. Lilly-ийн тайлснаар, хос дэглэмийн бүлгүүдэд A1C дунджаар хамгийн ихдээ 2.9%-иар буурсан бол зөвхөн тирзепатид 2.4%, харин амилины эм 1.4%-иар буурчээ. Компанийн хувьд энэ нь жин бууруулахтай зэрэгцэн бодисын солилцооны үзүүлэлтүүдийг сайжруулах боломжийг зэрэг харуулж байгаа гэсэн тайлбар руу хөтөлнө. Гэхдээ илүү хүчтэй үр дүнгийн цаана тэсвэрлэх чадварын асуудал давхар сөхөгдөж байна.

Учир нь гаж нөлөөнөөс шалтгаалж эмчилгээг зогсоосон хувь хослолын бүлгүүдэд 10.8%–27% байсан нь зөвхөн тирзепатидын 2.9%-аас өндөр гарчээ. Хос эмчилгээний хамгийн түгээмэл гаж нөлөө нь ходоод гэдэсний зовиур бөгөөд ихэвчлэн хөнгөн, дунд зэрэг хэлбэртэй, тун нэмэх үед түлхүү ажиглагдсан гэж Lilly тайлбарлав. Энэ нь жин бууруулах эмийн ангилалд түгээмэл тохиолддог асуудлын нэг ч гэлээ, бодит хэрэглээнд “үр дүн ба тэсвэрлэлтийн” тэнцвэрийг шийдэх нь гол сорилт хэвээр байна. Тиймээс дараагийн шатанд тунгийн горим, хэрэглэх аргыг илүү нарийвчлан тохируулах шаардлага компанийн мэдэгдлийн төвд оржээ.

Lilly оны төгсгөлөөр 3-р үе шатны туршилтуудыг эхлүүлэхээр төлөвлөж, тунгийн горимыг тохируулна гэж мэдэгдэв. Мөн хоёр эмийг нэг тарилгад хамтад нь хийх ко-формуляц хувилбарыг 3-р үе шатанд ахиулж, өвчтөн нэг удаагийн тарилгаар тирзепатид болон eloralintide-ийг зэрэг тарих боломжтой болгохоор зорьж байна. Үүнтэй зэрэгцэн, Lilly хос бүтээгдэхүүнийг 2026 оны эцэс гэхэд 3-р үе шатны судалгаанд шилжүүлэх төлөвлөгөөтэй гэдгээ ч давхар мэдээлсэн байна.

Lilly Cardiometabolic Health-ийн ерөнхийлөгч Кен Кастер “өвчтөнүүд тирзепатид шиг эмээс хэрэгцээгээ бүрэн хангаж чаддаггүй байж магадгүй” гэж хэлээд, eloralintide-ийг дангаар нь хэрэглэхэд ч мөн адил “хэрэгцээгээ бүрэн хангахгүй” тохиолдол гарч болохыг дурдсан байна. Түүний хэлснээр 1, 2-р үе шатанд үр нөлөөг шалгахын зэрэгцээ хэрэглэх арга, тунгийн горимд ямар өөрчлөлт хийхээ сурч, дараа нь тохируулга хийдэг бөгөөд “бид үүнийг үргэлж хийдэг” аж. Кастер мөн 3-р үе шатанд тунгийн горимыг өөрчилснөөр үр нөлөө ба тэсвэрлэх чадварын “маш таатай тэнцвэрт” хүрнэ гэж үзэж байгаагаа онцоллоо. Одоо харин илүү хүчтэй үр дүнг илүү тогтвортой хэрэглээ рүү шилжүүлж чадах эсэх нь, мөн зах зээл дээрх өрсөлдөөний дараагийн давалгаанд Lilly ямар алхам хийхийг шийдэх гол хэмжүүр болж байна.