“Эрдэнэс Тавантолгой” ХК-ийн цэвэр ашиг 1.5 их наяд төгрөгт хүрч, жилийн төлөвлөгөөгөө 50 хувиар давуулжээ
“Эрдэнэс Тавантолгой” ХК 2026 оны эхний есөн сарын байдлаар 1.5 их наяд төгрөгийн цэвэр ашигтай ажиллаж, жилийн төлөвлөгөөгөө 500 тэрбум төгрөгөөр давуулан биелүүлсэн гэж мэдээллээ.
“Эрдэнэс Тавантолгой” ХК-ийн 2026 оны эхний есөн сарын цэвэр ашиг 1.5 их наяд төгрөгт хүрч, жилийн төлөвлөгөөгөө 50 хувиар давуулан биелүүлсэн талаар компаниас мэдээллээ. Тус компани энэ онд нэг их наяд төгрөгийн цэвэр ашиг олохоор төлөвлөсөн бөгөөд есдүгээр сарын эцсийн байдлаар төлөвлөсөн хэмжээнээс 500 тэрбум төгрөгөөр илүү ашигтай ажиллажээ.
Компанийн мэдээлснээр тайлант хугацаанд нүүрс олборлолт 28.6 сая тоннд хүрсэн нь өмнөх оны мөн үеэс 6.4 сая тонн буюу 29 хувиар өссөн үзүүлэлт юм. Харин нүүрс борлуулалт 28.8 сая тоннд хүрч, өмнөх оны мөн үеэс 8.9 сая тонноор нэмэгджээ. Ингэснээр борлуулалтын хэмжээ 48 хувиар өссөн байна.
Мөн 2026 оны эхний есөн сарын борлуулалтын орлого 2 тэрбум ам.долларт хүрч, төлөвлөгөөний биелэлт 126 хувьтай гарчээ. Энэ нь өмнөх оны мөн үеийнхээс 68.1 хувиар өссөн дүн юм.
Түүнчлэн тус компани улс, орон нутгийн төсөвт нийт 1.4 их наяд төгрөгийн татвар, төлбөр, хураамж төлж, жилийн төлөвлөгөөгөө 33 хувиар давуулан биелүүлсэн гэж мэдээлэв.
Үүнээс гадна Их эзэн Чингис хааны мэндэлсэн өдрийг угтан төрд ногдох ногдол ашгийн өглөгөөс нэг их наяд төгрөг төвлөрүүлсэн байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ
