Гэр бүлийн бизнесүүдийн 75 хувь нь хиймэл оюуны хөрөнгө оруулалтын "хөөс хагарна" гэж үзжээ

Хиймэл оюун хөрөнгө оруулалтын хамгийн сонирхол татсан чиглэлүүдийн нэг хэвээр байгаа ч томоохон хөрөнгөтэй гэр бүлүүдийн хөрөнгө оруулалтыг удирддаг байгууллагууд буюу гэр бүлийн оффисуудын дунд хөөсрөлтийн болгоомжлол нэмэгджээ. “RBC Wealth Management” болон хөрөнгийн удирдлагын судалгааны “Campden Wealth” байгууллагын хамтарсан судалгаагаар оролцогчдын 85 хувь нь хиймэл оюуныг хөрөнгө оруулалтын тэргүүлэх сэдвээр нэрлэсэн бол 75 хувь нь ойрын таван жилд тус салбарын хөрөнгө оруулалтын хөөс хагарна гэж үзсэн байна. Судалгаанд Хойд Америкийн 155 гэр бүлийн оффис хамрагдаж, хиймэл оюуны өсөлтийн боломжид итгэх хандлага өндөр байгаа ч хөрөнгийн үнэлгээ болон урт хугацааны өгөөжтэй холбоотой эрсдэлийг анхаарч буй нь харагджээ.

Урт хугацаанд АНУ-ын хувьцааг илүүд үзэж байна Хөрөнгө оруулалтын хугацаа уртсах тусам тэргүүлэх чиглэлүүдийн эрэмбэ өөрчлөгдөж байна. Ирэх 2-оос 5 жилийн хугацаанд хамгийн өндөр өгөөж өгөх боломжтой активуудаар АНУ-ын хувьцааг оролцогчдын 69 хувь, хиймэл оюуныг 64 хувь, хувийн хөрөнгө оруулалтыг 62 хувь нь сонгосон байна. Үл хөдлөх хөрөнгийн өгөөжид итгэх хандлага мөн нэмэгджээ. Тухайлбал, ирэх 12 сарын хугацаанд үл хөдлөх хөрөнгийг өгөөжтэй гэж үзсэн оролцогчдын эзлэх хувь 26 байсан бол 2-оос 5 жилийн хугацаанд 51 хувь болж өссөн байна.

Засгийн газрын өр болон хиймэл оюуны хөөсрөлт гол эрсдэл Гэр бүлийн оффисуудын хувьд хиймэл оюуны хөрөнгө оруулалтын хөөсрөлтөөс гадна Засгийн газруудын өрийн хэмжээ нэмэгдэж байгаа нь томоохон эрсдэлд тооцогджээ. Судалгаанд оролцогчдын 76 хувь нь засгийн газрын хэт их зээлжилтийг ирэх таван жилийн зах зээлийн гол эрсдэлээр нэрлэсэн бол 75 хувь нь хиймэл оюуны хөрөнгө оруулалтын хөөс хагарах, 66 хувь нь хиймэл оюуны хөгжил хөдөлмөр эрхлэлтэд сөргөөр нөлөөлөх эрсдэлийг онцолсон байна. Үүний зэрэгцээ хөрөнгө оруулалтын боломжийг алдах вий гэсэн болгоомжлол буюу FOMO нь хөрөнгө оруулагчдын шийдвэрт нөлөөлж болохыг судалгаанд дурджээ.

Хувийн хөрөнгө оруулалтаа нэмэгдүүлэхээр төлөвлөжээ Судалгаанд оролцсон гэр бүлийн оффисуудын 31 хувь нь хувийн компаниудад хийх шууд хөрөнгө оруулалтаа нэмэгдүүлэхээр төлөвлөсөн байна. Мөн тавны нэгээс илүү хувь нь үл хөдлөх хөрөнгө болон гарааны бизнесийн хөрөнгө оруулалтаа нэмэгдүүлэх сонирхолтой байгаагаа илэрхийлжээ. Гэр бүлийн оффисууд хиймэл оюуныг зөвхөн технологийн салбарын хөрөнгө оруулалт бус, бусад салбарын компаниудын үйл ажиллагаа, өсөлтөд нөлөөлөх технологи гэж харж байна.