«Ард түмний колонк» санаачилгад зургаан хоногт 6,000 гаруй иргэн 109 сая төгрөг хандивлажээ

Шатахууны чанар, үнийн асуудлаар олон жил дуу хоолойгоо хүргэж ирсэн иргэн М.Орхонтуулын санаачилсан «Ард түмний колонк» буюу иргэдийн хандиваар шатахуун түгээх станц байгуулах аянд зургаан хоногийн дотор 6,000 гаруй иргэн 109 сая төгрөг хандивласан гэж тэрбээр LiveTV.mn-д ярьжээ.

М.Орхонтуулын хэлснээр уг санаачилга нь олон нийтийн удаа дараагийн хүсэлтэд үндэслэсэн бөгөөд гол зорилго нь ОХУ-аас чанартай шатахууныг шууд импортолж, дотоодын зах зээлд хамгийн хямд үнээр иргэдэд нийлүүлэх юм. Тэрбээр шатахууны чанарын асуудал 7–8 жилийн өмнөөс эхэлсэн, төрөөс шатахуун түгээх газруудын үнийг удаан хугацаанд хязгаарласны дараа чанаргүй, хольсон шатахуун ихээр орж ирсэн гэж үзэж байгаа юм.

Цугласан хөрөнгийн тухайд одоогоор нэг ч төгрөгийн зарлага гараагүй бөгөөд хандивлагчид мөнгө шилжүүлсэн огноо, цагаа хянах боломжтой «Шилэн данс» нээж байгаа гэж М.Орхонтуул мэдэгдэв. Санаачилга бүтэлгүйтвэл цугласан мөнгийг хандивлагч бүрт дутуугүй буцаан шилжүүлнэ гэж тэрбээр амласан. Мөн газрын тостой холбоотой байгууллагуудтай биечлэн уулзаж, гарц хайхаар ОХУ-ыг зорихоор төлөвлөж буйгаа хэлжээ.

Түүний хэлснээр станц хувь хүнийх бус, ард түмний өмч байх бөгөөд хандивт оролцсон иргэд станц байгуулагдсаны дараа хувьцаа эзэмших, эсвэл шатахууныг хөнгөлөлттэй үнээр тогтмол худалдан авах эрхтэй болно.

Санаачилга X сүлжээнд олон янзын хариу үйлдэл дагуулж байна. LiveTV.mn-ийн энэ тухай нийтлэл арван мянга гаруй удаа үзэгдсэн бол эдийн засгийн асуудлаар бичдэг нэг хэрэглэгч хоёр түгээгууртай, 40–60 мянган литрийн багтаамжтай дунд оврын станц шинээр байгуулахад багадаа 1.5–2 тэрбум төгрөг шаардлагатай гэж эргэлзээгээ илэрхийлэв. Шатахууны үнэ, чанарын асуудал сүүлийн үед олон нийтийн анхаарлын төвд байгаа бөгөөд аравдугаар сард жилийн инфляц 13.4 хувьд хүрэхэд шатахууны үнэ 2.8 нэгж хувиар нөлөөлсөн гэж BloombergTV Mongolia тооцоолжээ.