NVIDIA Meta-д 3 тэрбум ам.долларын хөрөнгө оруулж, хиймэл оюуны хамтын ажиллагаагаа өргөжүүлнэ

NVIDIA компани Meta-гийн хувьцааны саналд оролцож, 3 тэрбум ам.долларын хөрөнгө оруулалт хийхээр боллоо. Талууд мөн Meta-гийн Muse цуврал загвар болон хэрэглэгчийн өмнөөс даалгавар гүйцэтгэх хиймэл оюуны агентуудыг хөгжүүлэх хамтын ажиллагаагаа өргөжүүлэхээр болсноо аравдугаар сарын 26-нд мэдэгдлээ.

Хамтын ажиллагааны хүрээнд хиймэл оюуны загварыг сургах, сургасан загвараар мэдээлэл боловсруулж, хариу гаргах тооцооллын гүйцэтгэлийг сайжруулахад анхаарах юм. Мөн техник, программ хангамжийн ажиллагааг уялдуулж, системийг ашиглах нийт зардлыг бууруулахаар төлөвлөжээ.

Muse загварууд болон тэдгээрт суурилсан агентууд NVIDIA-ийн тооцооллын дэд бүтцийг ашигладаг. Зах зээлд нэвтэрснээс хойш хэрэглэгчдийн татан авалт эрчимтэй өсч, гүйцэтгэлийн сорилд тэргүүлэх түвшний үзүүлэлт гаргасан гэж компаниуд мэдээлсэн ч мэдэгдэлдээ татан авалтын тоо, харьцуулсан сорилын дэлгэрэнгүй дүнг дурдаагүй байна.

Meta дараагийн үеийн хиймэл оюуны агентуудаа ажиллуулахын тулд NVIDIA-ийн Vera Rubin платформ болон Vera төв процессорын хэрэглээг нэмэгдүүлэхээр төлөвлөж байна. Энэ нь цахилгаан эрчим хүчний нэгж хэрэглээнд ногдох тооцооллын гүйцэтгэлийг дээшлүүлэх зорилготой юм.

Түүнчлэн дата төвийн сүлжээний үр ашиг, өгөгдөл дамжуулах хүчин чадлыг нэмэгдүүлэхэд Spectrum-X Ethernet болон BlueField-4 технологийг ашиглана. Агентуудыг аюулгүй ажиллуулах OpenShell, тэдгээрийн үйлдлийг хянах Sentry технологийн чиглэлээр хамтран ажиллах боломжийг мөн судлахаар болжээ.

NVIDIA-ийн үүсгэн байгуулагч, гүйцэтгэх захирал Женсен Хуанг хиймэл оюуны агентуудыг хэрэглэгчийн зорилгыг ойлгож, дүгнэлт хийж, программын хэрэгслүүдийг ашиглан түүний өмнөөс ажил гүйцэтгэх технологи хэмээн тодорхойлсон байна. Тэрбээр энэ өөрчлөлт нь хүмүүс компьютертой харилцах арга барилыг өөрчилнө гэж үзэж буйгаа илэрхийлжээ.

Харин Meta-гийн үүсгэн байгуулагч, гүйцэтгэх захирал Марк Зукерберг Muse-ээр дамжуулан хэрэглэгч бүрийг хувийн хиймэл оюуны туслахтай болгох зорилготойг онцолсон байна. Талуудын өргөжүүлсэн хамтын ажиллагаа нь эдгээр загвар, агентын хүчин чадал, үр ашиг, аюулгүй ажиллагааг сайжруулахад чиглэж байна.