Япончуудын 17% нь Такаичиг Засгийн газрыг тэргүүлэх хамгийн тохиромжтой улстөрчөөр сонгожээ

Японы “Mainichi Shimbun” сониноос аравдугаар сарын 24–25-ны өдрүүдэд улс даяар явуулсан олон нийтийн санал асуулгаар Ерөнхий сайд Санаэ Такаичи дараагийн Засгийн газрыг тэргүүлэх улстөрчдийн жагсаалтыг тэргүүлжээ. Гэвч судалгаанд оролцогчдын 38 хувь нь дараагийн Ерөнхий сайдаар хэнийг томилох талаар тодорхой хариулт өгөөгүй буюу мэдэхгүй гэж хариулсан нь аль нэг улстөрчийг сонгосон иргэдийн хувиас өндөр байна. Уг судалгааг Такаичигийн Засгийн газар байгуулагдсанаас хойш нэг жил өнгөрч буйтай холбогдуулан явуулжээ.

Эрх баригч намын дэмжигчдийн 55 хувь нь Такаичиг сонгожээ Санал асуулгаар Ерөнхий сайдад тохиромжтой улстөрчдийн жагсаалтад Такаичигийн араас Батлан хамгаалахын сайд Шинжиро Коизүми 12 хувийн дэмжлэгтэйгээр удаалж байгаа бол Дотоод хэрэг, харилцаа холбооны сайд асан Ёшимаса Хаяши 10 хувийн дэмжлэгтэйгээр гуравдугаарт эрэмблэгджээ. Түүнчлэн Гадаад хэргийн сайд Тошимицү Мотэги 3 хувь, Либерал ардчилсан намын Бодлогын судалгааны зөвлөлийн дарга Такаюки Кобаяши 2 хувийн дэмжлэг авсан байна. Үүний зэрэгцээ Засгийн эрх баригч Либерал ардчилсан намын дэмжигчдийн дунд Такаичигийн байр суурь харьцангуй бат бөх байгаа бөгөөд тэдний 55 хувь нь түүнийг Ерөнхий сайдаар үргэлжлүүлэн ажиллуулахыг дэмжжээ. Уг бүлэгт Ш.Коизүми 15 хувь, Ё.Хаяши 7 хувийн дэмжлэг авсан байна. Харин нам бус иргэдийн 53 хувь нь дараагийн Ерөнхий сайдад хэн тохирохыг мэдэхгүй гэж хариулжээ.

Засгийн газрын рейтинг ба ажиллах хугацааны хүлээлт Мөн Ерөнхий сайд Санаэ Такаичиг хэр удаан албан тушаалдаа ажиллах шаардлагатайг тодруулахад оролцогчдын 32 хувь нь аль болох удаан ажиллуулахыг хүссэн бол 23 хувь нь ойрын хугацаанд огцрох ёстой гэж үзжээ. Түүнчлэн судалгаанд оролцогчдын 17 хувь нь түүнийг эрх баригч намын даргын бүрэн эрхийн хугацаа дуусах хүртэл, 7 хувь нь парламентын Төлөөлөгчдийн танхимын гишүүний бүрэн эрхийн хугацаа дуусах хүртэл Ерөнхий сайдаар ажиллах нь зүйтэй гэж тодорхойлсон байна. Бүхэлд нь авч үзвэл судалгаанд оролцогчдын 45 хувь нь Такаичигийн Засгийн газрын үйл ажиллагааг дэмжиж, 41 хувь нь дэмжихгүй байгаагаа илэрхийлжээ. Засгийн газраа дэмжиж буй иргэдийн 66 хувь нь Такаичиг аль болох удаан ажиллаасай гэж хүссэн бол дэмждэггүй иргэдийн 55 хувь нь түүнийг ойрын хугацаанд огцрох ёстой гэж хариулсан байна.