“Wonder” сарын $10-аар рестораны брэнд бүтээх боломжийг санал болгоно

Ресторан нээхийн тулд заавал өөрийн гал тогоо, тоног төхөөрөмж, ажилтантай байх шаардлагагүй шинэ бизнесийн загварыг АНУ-ын хүнсний технологийн “Wonder” компани хөгжүүлж байна. Тус компани арваннэгдүгээр сарын 17-ноос эхлэн хэрэглэгчдэд сарын 10 ам.долларын төлбөрөөр хиймэл оюун ашиглан өөрийн рестораны брэндийг бүтээх боломж олгохоор төлөвлөжээ.

“Wonder Create” нэртэй уг үйлчилгээний тусламжтайгаар хэрэглэгч рестораныхаа нэр, лого, хоолны цэс, жор болон бүтээгдэхүүний үнийг хиймэл оюунаар боловсруулах боломжтой. Харин хоолыг “Wonder”-ийн гал тогоонд бэлтгэж, компанийн захиалга, хүргэлтийн сүлжээгээр хэрэглэгчдэд хүргэхээр төлөвлөсөн байна. Брэндийг үүсгэн байгуулагч нь захиалгын орлогоос хувь хүртэх боломжтой гэж CNBC мэдээлжээ.

Энэхүү загвар нь уламжлалт ресторан байгуулахад шаардлагатай анхны хөрөнгө оруулалт, байр түрээс, тоног төхөөрөмж болон өдөр тутмын үйл ажиллагааны зардлыг бууруулах боломжтой. Гэхдээ сарын 10 ам.доллар нь рестораны бүх зардлыг хамарсан төлбөр биш бөгөөд үйлчилгээний бодит нөхцөл, орлого хуваарилах журмаас ашигт ажиллагаа хамаарахаараа онцлог.

Рестораныг технологийн платформ болгон хөгжүүлж байна

“Wonder”-ийг 2018 онд Америкийн бизнес эрхлэгч Марк Лор үүсгэн байгуулжээ. Анх хөдөлгөөнт гал тогоотой фургон машинаар хоол бэлтгэн хүргэдэг байсан тус компани 2023 оноос байнгын салбарын загварт шилжсэн байна.

Одоо тус компани нэг байршилд 25-аас дээш рестораны брэндийн хоол санал болгодог. Хэрэглэгч нэг захиалгаар өөр өөр брэндийн хоол сонгох боломжтой бөгөөд хоол бэлтгэл, захиалга, хүргэлтийн үйл ажиллагааг компанийн технологийн системээр нэгтгэжээ.

Марк Лор рестораны брэндийг уламжлалт гал тогооноос тусгаарлан хөгжүүлэх боломжтой гэж үзэж байна. Түүний тайлбарласнаар, компанийн нэгдсэн гал тогоо, орцын сан, технологийн дэд бүтэц дээр шинэ брэндийн жор, нэр, бүтээгдэхүүнийг нэмснээр тусдаа ресторан барихгүйгээр үйл ажиллагаа явуулах боломж бүрдэнэ.

Энэ нь “Wonder Create”-ийн бизнесийн үндсэн санаа юм. Инфлюенсер, контент бүтээгч, бизнес эрхлэгчид өөрийн дагагчдад зориулсан хоолны брэнд бий болгож, захиалга бүрээс орлого олох боломжтойг компани онцолжээ.

Тэрбум гаруй ам.долларын худалдан авалтаар бизнесээ тэлжээ “Wonder” үйл ажиллагаагаа өргөжүүлэхийн тулд сүүлийн жилүүдэд тэрбум гаруй ам.долларын худалдан авалт хийсэн байна. Үүнд хоол хүргэлтийн “Grubhub”, хоолны иж бүрдэл нийлүүлэгч “Blue Apron”, хүргэлт, логистикийн “Relay” болон рестораны брэндүүд багтжээ.

Тус компани сүүлийн гурван жилийн хугацаанд Виржиниагаас Массачусетс хүртэлх мужуудад 170 салбар нээсэн бөгөөд 2027 онд Техасын зах зээлд анх удаа нэвтрэхээр төлөвлөж байна. Техас мужид 2027 оны эцэс гэхэд 100-аас дээш салбар нээх зорилт тавьжээ.

Компанийн салбаруудын онцлог нь хоолыг төвлөрсөн гал тогоонд урьдчилан бэлтгэж, салбаруудад хүргэсний дараа эцсийн боловсруулалт хийдэг байна. Ингэснээр салбар бүрд уламжлалт рестораны иж бүрэн гал тогоо байгуулах шаардлагыг багасгаж, шинэ байршилд үйл ажиллагаа эхлүүлэх хугацааг богиносгох боломжтой гэж үзэж байна.

Гэхдээ олон төрлийн хоолыг нэг системээр бэлтгэх нь чанар, амт болон хэрэглэгчийн сэтгэл ханамжийг тогтвортой хадгалах сорилттой тулгарна. Ялангуяа өрсөлдөөн өндөр Нью-Йоркийн зах зээлд хэрэглэгчдийн дахин худалдан авалт, бүтээгдэхүүний чанар компанийн өсөлтөд чухал нөлөөтэй хэвээр байна.

Робот гал тогоо цагт 500 хүртэл таваг хоол бэлтгэх хүчин чадалтай

“Wonder” рестораны үйл ажиллагааны зардлыг бууруулахын тулд робот технологид хөрөнгө оруулж байна. Тус компанийн “Infinite Makeline” автомат систем нь 68 төрлийн орц ашиглан цагт 500 хүртэл таваг хоол угсрах хүчин чадалтай аж.

Гэхдээ энэхүү системийг хоол бэлтгэх бүх үе шатад бүрэн автоматжуулаагүй. Харин ажилтнууд орц бэлтгэх, төхөөрөмжийг цэнэглэх, хоол эцэслэн боловсруулах, савлах зэрэг ажилд оролцсоор байна.

Мөн “Wonder” хэрэглэгчийн эрүүл мэндийн үзүүлэлт, хоолны сонголт, хэрэгцээнд тулгуурлан хоол төлөвлөх MEL нэртэй хиймэл оюуны платформ хөгжүүлж байна. Одоогоор уг үйлчилгээ нийт хэрэглэгчдэд нээлттэй болоогүй бөгөөд туршилтын хувилбарыг 2027 онд танилцуулах аж. Марк Лор 2040 он гэхэд хоолны төлөвлөлт, бэлтгэл, хүргэлтийг бүрэн автоматжуулах урт хугацааны зорилт тавьжээ.

9 тэрбум ам.долларын үнэлгээтэй компани IPO хийхээр бэлтгэж байна

“Wonder” 2026 оны долоодугаар сард 650 сая ам.долларын хөрөнгө босгосноо зарласан. Тус санхүүжилтийн өмнөх компанийн үнэлгээ есөн тэрбум ам.доллар байсан бөгөөд хөрөнгийг шинэ салбар нээх, робот технологи, хиймэл оюун болон дэд бүтцийн хөгжилд зарцуулахаар төлөвлөжээ.

Компани байгуулагдсанаасаа хойш нийт 3.3 тэрбум ам.долларын хөрөнгө татсан нь цаашид хувьцаагаа олон нийтэд санал болгох боломжийг судалж байгаа ч IPO гаргах тодорхой хугацааг зарлаагүй байна. “Wonder”-ийн хөгжүүлж буй шинэ загвар урт хугацаанд ашигтай ажиллах эсэх нь автоматжуулалтын бодит үр ашиг, хоолны чанар, хэрэглэгчдийн эрэлт болон өргөжилтийн зардлаас хамаарах юм.