Илон Маск: SpaceX GPU худалдан авахад зориулж 40 тэрбум ам.долларын өрийн санхүүжилт босгосон, неоклауд компаниуд нэгдэж, дампуурна

Илон Маск 10-р сарын 25-ны ням гарагт X сүлжээнд бичихдээ SpaceX хиймэл оюуны тооцоолуурт зориулсан график процессор (GPU) худалдан авах 40 тэрбум ам.долларын өрийн санхүүжилтээ “хаасан” гэж мэдэгджээ. Reuters-ийн мэдээлснээр Маск энэхүү амжилтыг компанийн хөрөнгө оруулалтын зэрэглэлтэй үнэлгээ болон Starlink хиймэл дагуулын интернэт, пуужин хөөргөлтийн бизнесийн орлоготой холбон тайлбарласан байна.

“Энэ нь голчлон нэгдүгээр болон хоёрдугаар улиралд ирэх GPU-ний худалдан авалтад зориулсан, хугацаанаас нь өмнө эргүүлэн төлөх боломжтой өр. Энэ улиралд томоохон хүчин зүйл болохгүй” гэж Маск бичжээ. Гэхдээ “хаасан” гэдэг нь яг юуг хэлж байгаа, хөрөнгө оруулагчид өрийн үнийн нөхцөлийг зөвшөөрсөн эсэх нь тодорхойгүй байна гэж Reuters тэмдэглэв. Reuters энэ сарын эхээр SpaceX Nvidia-гийн AI чип худалдан авахын тулд банк, хөрөнгийн менежментийн компаниудтай 40 тэрбум ам.доллар босгох яриа хэлэлцээ хийж байгааг мэдээлж байсан юм.

Маск мөн өрийн зах зээл “AI дата төвөөс хамааралгүй томоохон орлогогүй аливаа компанид мөнгө олгохоо бараг бүрэн зогсоосон” гэж анхааруулжээ. Иймээс AI-д зориулсан хүчин чадал түрээслүүлдэг “неоклауд” компаниуд томоохон нэгдэл, дампуурлын давалгаатай тулгарна гэж тэрээр таамаглаад, SpaceX неоклауд компани худалдаж авахгүй, энэ нь “утгагүй” гэж нэмж хэлсэн байна. Nebius, CoreWeave зэрэг неоклауд компаниуд олон салбарт үйлчилдэг томоохон үүлэн үйлчилгээ үзүүлэгчдээс ялгаатай нь гол төлөв технологийн харилцагчдад AI-д тохирсон хүчин чадал санал болгодог. Сүүлийн үед хөрөнгө оруулагчид өрөөр санхүүжсэн AI дэд бүтцийн тэлэлт тогтвортой бус болж байна гэх болгоомжлолоор АНУ-ын неоклауд болон дата төвийн компаниудын эсрэг бооцоо тавих болсон.

SpaceX-ийн санхүүгийн захирал Брет Жонсен дөрөвдүгээр улиралд 35-40 тэрбум ам.долларын хөрөнгийн зардал гарна гэж төсөөлж байгаа юм. Компанийн 9-р сарын 30-нд дууссан гурван сарын орлого өмнөх оныхоос 161 хувиар өсөж 14.58 тэрбум ам.долларт хүрсэн бөгөөд үүнээс хиймэл оюуны орлого бараг 10 дахин өсөж 7.56 тэрбум ам.доллар болжээ. Энэ нь SpaceX-ийн AI-д хийсэн их хэмжээний хөрөнгө оруулалт үр өгөөжөө өгч эхэлснийг харуулж буй хамгийн тод нотолгоо гэж Reuters дүгнэв.

Түүнчлэн SpaceX болон Tesla-гийн Остин хот дахь чип үйлдвэрлэлийн хамтарсан Terafab төсөл ирэх оны 5-6-р сард анхны туршилтын чипээ гаргаж, 2028 оны гуравдугаар улиралд бөөний үйлдвэрлэлд хүрэхээр төлөвлөж байна.

---

Эх сурвалж: Reuters (CNA), Reuters (Investing.com). Зураг: Reuters / Gonzalo Fuentes (CNA).