Такаичи нөлөөгөө тэлсээр байна: Либерал Ардчилсан намын дэмжлэгтэй Гэнта Кожа мужийн захирагчийн сонгуульд яллаа

Японы Ерөнхий сайд Санаэ Такаичигийн Засгийн газрын дэмжлэгтэй Гэнта Кожа тус улсын Окинава мужийн захирагчийн сонгуульд ялж, хоёр дахь бүрэн эрхийн хугацаагаа дуусгаж буй Дэнни Тамакиг буулган авлаа. Тайвань болон Хятадад ойр орших Окинава муж нь Япон болон АНУ-ын бүс нутгийн батлан хамгаалах стратегид чухал байр суурь эзэлдэг аж.

Өдгөө 42 настай Кожа нийт саналын 59 хувийг авсан бол 66 настай Тамаки хоёр удаа дараалан мужийн захирагчаар ажилласан юм. Амьжиргааны өртөг нэмэгдсэн асуудал сонгуулийн кампанит ажлын гол сэдэв байсан ч үр дүн нь Окинавагийн цэрэг, аюулгүй байдлын бодлогод томоохон өөрчлөлт авчрах боломжтой гэж шинжээчид үзэж байна. Кожагийн ялалтаар Окинавад АНУ-ын цэргийн томоохон оролцоог багасгахыг зорьсон захирагчид 12 жил дараалан засагласан үе өндөрлөв.

Сонгуулийн үр дүн АНУ-ын тэнгисийн явган цэргийн Фүтэнма агаарын баазыг Окинавагийн гол арал дахь Хэноко руу шилжүүлэхийг эсэргүүцсэн мужийн эрх баригчдын хууль эрх зүйн тэмцлийг зогсоож болзошгүй юм.

Японы “Рюкюсийн их сургууль”-ийн гавьяат профессор Масааки Габэгийн үзэж буйгаар шинэ захирагч Токиогийн Засгийн газарт нисэх буудал, боомтуудыг цэргийн зориулалтаар ашиглах боломжийг өргөжүүлэхэд илүү нааштай хандаж магадгүй. Тэрбээр энэ талаар “Кожа холбогдох байгууламжуудыг цэргийн зориулалтаар ашиглахыг зөвшөөрч, зөвхөн иргэний зориулалттай байсан дэд бүтцийг цэргийн хэрэглээнд нээх боломжтой” хэмээн тайлбарлав.

Окинава дахь АНУ-ын цэргийн оролцоо олон арван жилийн турш орон нутгийн улс төрийн маргааны гол асуудлын нэг байсаар ирсэн. Харин бүс нутгийн аюулгүй байдлын нөхцөл өөрчлөгдөхийн хэрээр Токио Японы баруун өмнөд арлуудын цэргийн чадавхыг нэмэгдүүлж байна.

Кожагийн ялалт Ерөнхий сайд Санаэ Такаичи энэ онд үндэсний аюулгүй байдлын шинэ стратегиа танилцуулахаар бэлтгэж буй үед тохиов. Шинэ стратеги нь Дэлхийн хоёрдугаар дайнаас хойших Японы хамгийн том цэргийн хүчин чадлын өргөтгөлийг маш хурдтай хэрэгжүүлэхэд оршиж буй.

Такаичигийн Засгийн газар батлан хамгаалахын зардлыг нэмэгдүүлэх нь Зүүн Азид Хятад улс нутаг дэвсгэрийн зорилгоо цэргийн хүчээр хэрэгжүүлэхээс сэргийлэхэд шаардлагатай алхам хэмээн тайлбарладаг.

Окинава нь цэргийн стратегид “Арлын нэгдүгээр гинжин хэлхээ” хэмээн нэрлэдэг бүсэд багтдаг. Японоос Филиппин хүртэл үргэлжлэх уг арлуудын бүс Хятадын Номхон далайн баруун хэсэг рүү гарах гарцыг хязгаарлах стратегийн ач холбогдолтой юм.

Мөн Японы хамгийн баруун захын Ёнагуни арал Тайваниас ердөө 110 км зайд оршдог. Бээжин Тайванийг өөрийн нутаг дэвсгэрийн нэг хэсэг гэж үздэг бөгөөд сүүлийн жилүүдэд тус арлын орчим дахь цэргийн ажиллагаагаа эрчимтэй нэмэгдүүлсэн.

Токио, Бээжингийн харилцаа Ерөнхий сайд Такаичи өнгөрсөн онд хэрэв Хятад улс Тайваньд халдаж, уг мөргөлдөөн Японы аюулгүй байдалд заналхийлбэл Токио цэргийн хариу арга хэмжээ авч болзошгүй хэмээн мэдэгдсэнээс хойш улам хурцдаж буй.

Үүний зэрэгцээ Япон улс баруун өмнөд хэсгийн хэд хэдэн аралдаа пуужингийн болон электрон дайны анги нэгтгэл байршуулж, сум, зэвсгийн нөөц хадгалах дэд бүтцээ мөн өргөжүүлж байна. Окинавагийн шинэ удирдлага Токиогийн бодлоготой илүү ойр ажиллавал стратегийн ач холбогдолтой эдгээр арлууд дахь цэргийн дэд бүтцийн өргөтгөлийг хэрэгжүүлэхэд орон нутгийн улс төрийн саад багасах боломжтой.