Улаанбаатарын 176 уулзвар, гарцад 2,600 гаруй ухаалаг камер суурилуулжээ
Улаанбаатар хот замын хөдөлгөөний удирдлагын системээ шинэчилж, Германы замын хөдөлгөөний технологийн “Yunex Traffic” компанийн мэргэжилтнүүд төслийн дараагийн шатны ажилд оролцож эхэллээ. Хотын 176 уулзвар, гарцад 2,600 гаруй ухаалаг камер суурилуулж, замын хөдөлгөөний мэдээллийг бодит цагийн горимд цуглуулах нэгдсэн сүлжээнд холбожээ. Дараагийн шатанд хөдөлгөөний бодит урсгалд тохируулан уулзваруудын нэвтрүүлэх чадварыг сайжруулах ухаалаг гэрлэн дохионы систем нэвтрүүлэхээр ажиллаж байна.
Улаанбаатар хот замын хөдөлгөөнийг бодит цагийн өгөгдөлд тулгуурлан удирдах системд үе шаттай шилжиж байна. Дэлхийн банкны дэмжлэгтэй хэрэгжүүлж буй шинэчлэлийн хүрээнд Германы замын хөдөлгөөний технологийн “Yunex Traffic” компанийн мэргэжилтнүүд ажиллаж эхэлснийг албаны эх сурвалж мэдээллээ.
Төслийн гол зорилго нь хотын хэмжээнд тээврийн хэрэгслийн урсгал хаана, ямар чиглэлд, ямар эрчимтэй байгааг бодит цагийн горимд тодорхойлж, тухайн мэдээлэлд үндэслэн хөдөлгөөний зохицуулалтыг оновчтой болгоход чиглэжээ. Төслийн ажлыг Замын хөдөлгөөний удирдлагын төв ОНӨТҮГ уялдуулан хэрэгжүүлж байна.
Албаны мэдээллээр одоогоор Улаанбаатарын 176 уулзвар, гарцад 2,600 гаруй ухаалаг камер суурилуулж, нэгдсэн сүлжээнд холбожээ. Камеруудаар цуглуулсан мэдээллийг төвлөрүүлснээр хөдөлгөөний урсгалыг бодит цагт хянахаас гадна зөрчилтэй тээврийн хэрэгслийг илрүүлэх боломж бүрдсэн байна.
Төслийн дараагийн шатанд ухаалаг гэрлэн дохионы систем нэвтрүүлэхээр ажиллаж байгаа аж. Уг систем нь хөдөлгөөний урсгалын мэдээлэлд тулгуурлан зохицуулалт хийх замаар уулзваруудын нэвтрүүлэх чадвар болон өөр өөр чиглэлийн хөдөлгөөний уялдааг сайжруулах зорилготой.
Ингэснээр Улаанбаатарын замын хөдөлгөөнийг зөвхөн зам, уулзвар зэрэг дэд бүтцийг өргөтгөхөөс гадна бодит цагийн мэдээлэлд тулгуурлан зохицуулах боломж нэмэгдэнэ. Мөн мэдээллийн нэгдсэн сан өргөжихийн хэрээр хөдөлгөөний өөрчлөлтөд илүү шуурхай хариу өгөх, зөрчил илрүүлэлт болон хяналтын үр ашгийг сайжруулах нөхцөл бүрдэхээр байгааг албаны эх сурвалж онцолжээ.
Холбоотой мэдээ
Эрдэнэбүрэний УЦС баруун бүсийн эрчим хүчний импортын хамаарлыг бууруулна
90 МВт-ын Эрдэнэбүрэний усан цахилгаан станц 2030 онд ашиглалтад орсноор баруун бүсийн цахилгааны хэрэгцээг дотоодын эх үүсвэрээр бүрэн хангана. Станц жилд 360 сая кВт.цаг цахилгаан үйлдвэрлэх хүчин чадалтай нь баруун бүсийн одоогийн 160 сая кВт.цагийн жилийн хэрэглээнээс хоёр дахин өндөр үзүүлэлт юм. Төсөл хэрэгжсэнээр ОХУ, БНХАУ-аас авах цахилгааны хэрэгцээ буурч, илүүдэл эрчим хүчийг төвийн бүсийн системд нийлүүлэх боломж бүрдэхээр байна.
Нийслэл өвлийг өөдрөг угтах уу:УБЦТС-ын урсгал засвар 99 хувийн гүйцэтгэлтэй байна
Тус компани найман дүүрэг, Төв аймгийн 16 сумын 536 мянга гаруй хэрэглэгчийн цахилгаан хангамжийн найдвартай байдлыг сайжруулах зорилгоор 3,323 дэд станц, шугам тоноглолыг засварлаж байна. Засвар, хөрөнгө оруулалтын ажлыг аравдугаар сард бүрэн дуусгахаар төлөвлөжээ. Хужирбулан, Гачуурт орчмын цахилгаан хангамжийг сайжруулах шугамын өргөтгөл үргэлжилж байна.
Сургуулийн автобусны аюулгүй байдалд хяналтыг үргэлжлүүлж байна
Наймдугаар сарын 17-31-нд 200 гаруй хүүхдийн автобусыг техникийн үзлэг, оношилгоонд хамруулжээ. Тэдгээрийн 90 гаруй хувь нь шаардлага хангасан байна. Энэ хичээлийн жилд нийслэлийн 84 сургуульд 64 чиглэлээр 67 автобус сурагч тээвэрлэж байна.
Улаанбаатар түгжрэлийг бууруулахын тулд 84 сургууль барьж, нийтийн тээврийн 16 шинэ чиглэл нээнэ
Улаанбаатар хот түгжрэлийг бууруулахын тулд нийтийн тээврийн хүртээмж, сургуулийн хүчин чадал, авто замын сүлжээг зэрэг сайжруулахаар төлөвлөжээ. Судалгаагаар гэрээсээ 400 метрийн дотор автобусны буудалд очдог иргэд нийтийн тээврийг сонгох магадлал өндөр. Улаанбаатарын иргэдийн 56 хувь нь ажил, хичээлдээ хувийн автомашинаар, 24 хувь нь нийтийн тээврээр зорчдог.
УБТЗ ₮500 саяар Сайншанд чиглэлийн төмөр замын гармыг шинэчиллээ
Дорноговь аймаг дахь 39 дүгээр зөрлөг болон Сайншанд өртөөний хооронд байрлах 875-р км-ийн гармыг шинэчилжээ. 24 цагийн жижүүрийн зохицуулалттайгаар байнгын ашиглалтад оруулсан байна. Тус гармаар орон нутгийн суудлын автомашинаас гадна хүнд даацын болон нийтийн тээврийн хэрэгсэл зорчдог.
Нийслэлийн гол замуудад нарны цэнэгтэй LED тэмдэглэгээ суурилуулж эхэллээ
Энэ нь жолоочид замын чиглэл, эгнээний зааг болон замын ирмэгийг илүү тод харах нөхцөл бүрдүүлнэ. Уулын зам, Наадамчдын зам, Чингисийн өргөн чөлөөнд нийт 976 ширхэг LED гэрэл байршуулсан байна. Замын хөдөлгөөний зохион байгуулалттай холбоотой ажлуудад Нийслэлийн Замын сангаас нийт 5.5 тэрбум төгрөг төсөвлөжээ.