“Юнител Групп” 20 жилийн ойгоороо 80 ажилтнаа олон улсын технологийн төвүүдэд сургана
“Юнител Групп” 20 жилийн ойгоо тохиолдуулан 2026 онд 80 ажилтнаа Сингапур, Индонез зэрэг улсын технологи, инновацын төвүүдэд сургах “Foreign Study Program” хөтөлбөр хэрэгжүүлж байна.

Монголын харилцаа холбоо, технологийн салбарт үйл ажиллагаа явуулдаг “Юнител Групп” байгуулагдсаны 20 жилийн ойг тохиолдуулан ажилтнуудынхаа ур чадварыг олон улсын түвшинд хөгжүүлэх “Foreign Study Program” хөтөлбөрийг 2026 онд хэрэгжүүлж байна.
Тус хөтөлбөрийн хүрээнд нийт 80 ажилтныг Сингапур, Индонез зэрэг улсын технологи, инновацын төвүүдэд сургаж, хиймэл оюун болон дижитал технологийг өдөр тутмын ажилд ашиглах практик мэдлэг эзэмшүүлэхээр зорьжээ.
Хөтөлбөрийн онцлог нь гадаад сургалтад хамрагдсан ажилтнууд олж авсан мэдлэгээ зөвхөн өөрийн ажилд ашиглахаас гадна баг, хамт олондоо түгээхэд оршиж байна. Тодруулбал, сургалтад хамрагдагсад “Мэдлэгийн элч” болж, шинэ арга барил, технологийн шийдлүүдийг бусад ажилтанд танилцуулж, турших боломж бүрдүүлэх юм.
“Юнител Групп”-ийн Хүний нөөц хариуцсан дэд захирал С.Оюунсүрэнгийн тайлбарласнаар, уг хөтөлбөр нь өндөр гүйцэтгэлтэй ажилтнуудыг урамшуулахын зэрэгцээ олон улсын туршлагыг байгууллагын хэмжээнд түгээх зорилготой. Тэрбээр хөтөлбөрийн гол үнэ цэн нь ажилтнууд сурсан зүйлээ өдөр тутмын ажилдаа хэрэгжүүлж, үр дүнтэй арга барилаа хамт олонтойгоо хуваалцахад оршиж байгааг онцолжээ.
Хиймэл оюуны хэрэглээ өргөжихийн хэрээр байгууллагуудын хувьд шинэ технологи нэвтрүүлэхээс гадна түүнийг ашиглах ажилтнуудын ур чадварыг хөгжүүлэх шаардлага нэмэгдэж байна. Ийм нөхцөлд “Юнител Групп” технологийн хөгжил болон хүний нөөцийн чадавхыг уялдуулах чиглэлээр уг хөтөлбөрийг хэрэгжүүлж байгаа аж.
Хиймэл оюуны эрин үед ажилтнуудын ур чадвар чухал болж байна Дэлхийн эдийн засгийн форум (WEF) болон “PwC”-ийн хамтран боловсруулсан 2026 оны Artificial Intelligence and the Future of Entry-Level Work тайланд дэлхийн хэмжээнд 15–24 насны ажилтнуудын 37 хувь нь хиймэл оюуны нөлөөгөөр ажлын даалгавар нь мэдэгдэхүйц өөрчлөгдөх боломжтой мэргэжлээр ажиллаж байгааг дурджээ.
Мөн ажлын гараагаа эхэлж буй ажилтнуудын 28 хувь нь одоогийн ур чадварынхаа тал буюу түүнээс бага хэсэг нь гурван жилийн дараа ч хэрэгцээтэй хэвээр байна гэж үзсэн байна. Харин 68 хувь нь хиймэл оюуны хэрэглээний үр дүнд ажлын бүтээмж нэмэгдсэнийг мэдээлжээ.
Эдгээр үзүүлэлт нь байгууллагууд ажилтнуудынхаа ур чадварыг шинэчлэх, хиймэл оюуныг ажлын үйл явцад үр дүнтэй ашиглахад анхаарах шаардлагатай болсныг харуулж байна.
Шинэ мэдээг цахим шуудангаар авах бол бүртгүүлнэ үү.
Холбоотой мэдээ




