Засгийн газар нотариатын зарим үйлчилгээг цахимаар авах боломж бүрдүүлнэ

Хууль зүй, дотоод хэргийн сайд Засгийн газрын ээлжит хуралдааны шийдвэрийг танилцуулах үеэр Нотариатын тухай хуульд нэмэлт, өөрчлөлт оруулж, нотариатын зарим үйлчилгээг цахимаар, зайнаас авах боломж бүрдүүлэхээр төлөвлөж байгааг мэдээллээ.

Хуулийн өөрчлөлт хэрэгжсэнээр иргэд гадаадад оршин суугаа эсэхээс үл хамааран нотариатчтай видео холболтоор харилцаж, зайнаас үзүүлэхээр зөвшөөрсөн үйлчилгээг авах боломжтой болох юм. Ингэснээр тухайн үйлчилгээг авахын тулд нотариатын байгууллагад биечлэн очих шаардлагыг тодорхой хэмжээнд бууруулахаар зорьж байна.

Сайдын мэдээлснээр Монгол Улсад жил бүр нэг сая орчим нотариатын гэрчлэлт, баталгаажуулалтын үйлчилгээ үзүүлдэг. Эдгээрээс цахимаар үзүүлэх боломжтой үйлчилгээг сонгон, Монголын Нотариатчдын танхимтай хамтран үе шаттай нэвтрүүлэхээр төлөвлөжээ.

Харин их хэмжээний мөнгөн дүнтэй холбоотой болон эрх зүйн эрсдэл өндөртэй зарим үйлчилгээг эхний шатанд цахим хэлбэрт шилжүүлэхгүй. Тухайлбал, өв залгамжлал, үл хөдлөх хөрөнгийн эрх шилжүүлэхтэй холбоотой нотариатын үйлчилгээг зайнаас үзүүлэх үйлчилгээний эхний хүрээнд хамруулахгүй аж. Цаашид хэрэгжилтийн явц, үр дүнг үнэлсний үндсэн дээр цахимаар авах боломжтой үйлчилгээний төрлийг нэмэгдүүлэхээр төлөвлөж байна.

Мөн Монголын Нотариатчдын танхимтай хамтран хөгжлийн бэрхшээлтэй иргэд, хүүхэд, гэрч, хохирогч зэрэг зорилтот бүлэгт нотариатын үйлчилгээг хөнгөлөлттэй болон үнэ төлбөргүй үзүүлэх зохицуулалтын шийдэл боловсруулсан талаар сайд мэдээлэв.