“Zelle”: Залуусын 52% нь төлбөрөөс зайлсхийхийн тулд болзож буй хүнтэйгээ харилцаагаа тасалж байжээ

АНУ-ын төлбөрийн үйлчилгээний “Zelle” компанийн шинэ судалгаагаар Z үеийн залуус идэвхтэй нийгмийн амьдралтай байх сонирхол өндөр байдаг боловч болзоо, уулзалтын зардлаа зохицуулахад хүндрэлтэй тулгарч байна.

Судалгаанд хамрагдсан Z үеийнхний 52 хувь нь болзооныхоо дараа төлбөрийг хувааж төлөхөөр тохирсон ч өөрт ногдох мөнгийг төлөхөөс зайлсхийхийн тулд тухайн хүнтэй холбоо таслах, блоклох эсвэл сошиал сүлжээнд дагахаа больж байсан хэмээн хариулжээ.

Гэхдээ санхүүгийн хүндрэл зөвхөн болзооны төлбөрөөр хязгаарлагдсангүй. Z үеийн судалгаанд оролцогчдын 20 хувь нь найз нөхөдтэйгөө уулзах, гадуур хооллох болон бусад нийгмийн үйл ажиллагаанд оролцохын тулд өр тавьж байсан бол 19 хувь нь ийм зардлаа нөхөхөөр гэр бүл, найз нөхдөөсөө санхүүгийн тусламж хүссэн байна.

Өөрөөр хэлбэл, залуус нийгмийн харилцаагаа хадгалах хүсэлтэй байгаа ч түүнд зарцуулах мөнгө өрхийн төсөвтэй нь зөрчилдөх тохиолдол гарч буйг судалгааны үр дүн харуулж байна.

Иймээс мэргэжилтнүүдийн зүгээс өндөр үнэтэй ресторанаар үйлчлүүлж, өндөр үнэтэй оройн зоог зооглохын оронд арай илүү хямд сонголтыг санал болгож буй. Тодруулбал, "KTLA"-ийн хэрэглэгчийн асуудал хариуцсан сэтгүүлч Дэвид Лазарусын үзэж буйгаар санхүүгийн боломж хязгаарлагдмал үед болзооны зардлыг бууруулах энгийн хувилбарууд байдаг аж. Тухайлбал, залуус хамтдаа кофе уух, алхах, явган аялал хийх зэрэг харьцангуй бага зардалтай уулзалтыг сонгож болох аж.

Мөн болзоо эхлэхээс өмнө төлбөрийг хэн, хэрхэн төлөхөө тодорхой ярилцах нь дараа үүсэх үл ойлголцлоос сэргийлэх боломжтойг тэрбээр онцолжээ. Ялангуяа төлбөрөө хуваахаар төлөвлөж байгаа бол уг тохиролцоог урьдчилан тодорхой болгохыг зөвлөсөн байна.

Лазарус судалгааны үр дүнг америкчуудын санхүүгийн нөхцөл амаргүй болсон ч дуртай зүйл, нийгмийн амьдралаасаа танах сонирхол бага байгааг илэрхийлэх нэг дохио гэж тайлбарлажээ. Харин “Zelle”-ийн судалгаанаас харахад Z үеийнхний зарим залуусын хувьд идэвхтэй нийгмийн амьдралаа хадгалах зардал нь өр тавих, ойр дотнын хүмүүсээсээ мөнгө хүсэх хэмжээнд хүрсэн байна.