5 жилийн дараа анх удаа кофены зах зээлд 3 сая шуудайны илүүдэл гарах төлөвтэй байна

Дэлхийн зах зээл дээр кофены ханш буурч, сүүлийн гурван сарын доод түвшинд хүрлээ.

Тодруулбал, арабика сортын кофены арванхоёрдугаар сарын фьючерс Нью-Йоркийн “ICE Futures U.S.” биржийн даваа гарагийн арилжаагаар фунт тутамдаа 1.46 хувийн уналттай хаагджээ. Харин робуста кофены арваннэгдүгээр сарын фьючерс Лондоны “ICE Futures Europe” биржийн арилжаагаар тонн тутамдаа 3,337 ам.долларт хүрч, 1.74 хувиар буурсан байна.

Ханшийн уналтад дэлхийн зах зээлийн нийлүүлэлт нэмэгдэх төлөв ажиглагдсан нь голлон нөлөөлжээ. Олон улсын кофены байгууллагаас есдүгээр сарын 10-ны өдөр тооцоолсноор дэлхийн кофены үйлдвэрлэл 2025/26 улиралд 183.6 сая шуудай буюу 11 сая орчим тоннд хүрч, өмнөх улирлаас 4.4 хувиар өсөхөөр байна.

Харин хэрэглээ тус хугацаанд 0.9 хувиар буурч, 180.6 сая шуудай болсон тул дэлхийн кофены зах зээл 3 сая шуудайны илүүдэл гарахаар байгаа юм. Ингэснээр нийлүүлэлт хэрэглээнээс давсан үзүүлэлт сүүлийн таван жилд анх удаа бүртгэгдэх төлөвтэй болжээ.

Бразил, Вьетнамын нийлүүлэлт нэмэгдэж байна Дэлхийн томоохон үйлдвэрлэгч Бразил болон Вьетнамд ургацын нөхцөл сайжирч байгаа нь нийлүүлэлтийн төлөвийг нэмэгдүүллээ. Бразилын арабика кофены гол бүс болох Минас-Жерайс мужид есдүгээр сарын 20-ноор дууссан долоо хоногт 33.4 миллиметр хур тунадас орсныг “Somar Meteorologia” мэдээлжээ. Уг хэмжээ нь тухайн үеийн олон жилийн дунджаас 142 хувиар их бөгөөд кофены мод цэцэглэх чухал үед орсон бороо 2026/27 улирлын ургацад эерэгээр нөлөөлөх боломжтой аж. Үүний зэрэгцээ Бразилын одоогийн ургац хураалт дуусах шатандаа орсноор экспорт нэмэгдэж буй. Кофе экспортлогчдын “Cecafe” байгууллагын мэдээллээр тус улсын нийт кофе экспорт наймдугаар сард өмнөх оны мөн үеэс 31 хувиар нэмэгдэж, 4.16 сая шуудайд хүрсэн нь тухайн сарын түүхэн дээд үзүүлэлт болов. Харин арабикагийн экспорт 26 хувиар өссөн бол робустагийнх 54 хувиар дээшилжээ.

Түүнчлэн робуста кофены дэлхийн хамгийн том үйлдвэрлэгч Вьетнамын экспорт ч өсөлттэй байгаа юм. Тус улсын Үндэсний статистикийн газрын мэдээллээр 2026 оны эхний найман сард кофены экспорт өмнөх оны мөн үеэс 13.7 хувиар нэмэгдэж, 1.33 сая тоннд хүрчээ. Мөн Вьетнамын 2025/26 улирлын үйлдвэрлэл 6 хувиар өсч, сүүлийн дөрвөн жилийн дээд түвшин болох 29.4 сая шуудайд хүрэх төлөвтэй байна.

Нөөц болон цаг агаарын нөхцөл байдлаас шалтгаалан хханш хэлбэлзэж магадгүй Хэдийгээр нийлүүлэлт нэмэгдэх төлөв давамгай байгаа ч арабика кофены нөөц хэрэглээнд хүрэхгүй хэвээр байна. “ICE” биржийн баталгаажсан арабикагийн нөөц өнгөрсөн мягмар гарагт 217,646 шуудай болж, сүүлийн 27 жилийн доод түвшинд хүрсэн ч баасан гараг гэхэд 258,415 шуудай болж сэргэсэн байна.

Харин робустагийн “ICE” биржийн нөөц өнгөрсөн даваа гарагт 5,043 лот болж, сүүлийн 9.5 сарын дээд түвшинд хүрсэн нь робустагийн ханш буурахад нөлөөлж байна.