АИ-92 бензинийг евро стандартынх гэж зарсан байж болзошгүй хоёр ШТС-ыг шалгаж байна

АИ-92 энгийн евро стандартын шатахууныг сольж борлуулсан байж болзошгүй асуудлаар хоёр аж ахуйн нэгжийн шатахуун түгээх станцад нарийвчилсан шалгалт хийж байгаа талаар Монополийн эсрэг газрын дарга Б.Амарсанаа мэдээллээ. Тэрбээр нэр бүхий хоёр аж ахуйн нэгжийн тус бүр нэг шатахуун түгээх станцаас дээж авч, лабораторийн шинжилгээнд хүргүүлснийг онцолжээ. Гэхдээ шинжилгээ болон хяналт шалгалтын эцсийн дүгнэлт гараагүй байгаа юм. Тиймээс тухайн шатахуун түгээх станцууд хэрэглэгчдийг төөрөгдүүлсэн, эсвэл өөр төрлийн шатахууныг сольж борлуулсан нь одоогоор тогтоогдоогүй байна.

Давхардсан тоогоор 482 ШТС-д шалгалт хийжээ

Аж үйлдвэр, эрдэс баялгийн яам, Монополийн эсрэг газар, Ашигт малтмал, газрын тосны газар болон Нийслэлийн ЗДТГ-ын хамтарсан удирдамжийн дагуу давхардсан тоогоор 482 шатахуун түгээх станцад шалгалт хийжээ.

Шалгалт эхлэхээс өмнө зарим Шатахуун түгээх станц зөвхөн нэг түгээгүүрийн хошуугаар бензин олгож, дараалал үүсгэж байгаа талаар иргэдээс гомдол гарч байсан юм.

Харин хяналт шалгалтын дараа хоёр болон гурваас дээш хошуугаар шатахуун олгож буй станцын тоо 60 хувиар нэмэгдсэнийг Монополийн эсрэг газраас мэдээлсэн байна.

ШТС-уудын 25 хувьд 30-аас олон автомашин дугаарлажээ

Хяналт шалгалтын үеэр Шатахуун түгээх станцуудын 75 хувьд нь 30 хүртэлх автомашин, үлдсэн 25 хувьд нь 30-аас олон автомашин дараалал үүсгэсэн байжээ.

Мөн хөгжлийн бэрхшээлтэй иргэдэд шатахуун түгээх станцууд дараалал харгалзахгүй үйлчилж байгааг Монополийн эсрэг газраас онцолсон байна.

Шатахуун түгээх станцуудын 96 хувь нь Benzin.mn цахим хуудсанд мэдээллээ бүрэн оруулж байгаа бол төрөл, чанартай холбоотой шалгалтын үр дүн гарснаар АИ-92 энгийн болон евро стандартын бүтээгдэхүүнийг сольж борлуулсан эсэхийг тогтоох боломж бүрдэх аж.